Yobbu 39
39
1“Omanyire ebiha bi mbusi chomu ngulu chibuliramo?
Waali nobweeneho emboongo niyiibula?
2Onyala ohubala emyoosi kichimala nichiri asito,
oba wamanya ebiha bi chiibuliramo,
3ebiha bichiinamiramo mani cheebula otwaana twachio,
mani chaawona obuchuuni bw'ohulumwa?
4Otwaana twacho tuguma mani twaanyoola amaani, nituli mu siino;
mani bwaahula twaakama ohukobola eyiri ng'ina yaabwo. 5“Wiina owaleha esuhiri ndeende ohukeendaanga ataali omuundu ochaaya?
Wiina owachiboolola mani chang'alaalaanga,
6chi ndaberesa esiparara ohuba edaala lyacho,
neende esyaalo sy'omuunyu ohuba obwiihalo bwaacho?
7Haba sichidaha esiyoka syomu siko;
haandi abulao onyala ohuchikeda mani yaachihosa emirimo.
8Chikeendaana muungulu nichaaya,
mani chikoonya obunyasi bw'ohulya.
9“Endaawu njalaba yinyala yaahuhalaabanira?
Yinyala yeyalisa esiro syoosi yi byaayo byao biriraanga?
10Onyala ohuyiboya neende emikoye,
oba yinyala yaahulimira mu mukuunda kwao?
11Onyala ohuyeesika olwohuba yiri neende amaani maangi,
haandi onyala wayilehera emirimo kyao?
12Onyala ohuyeesika oti yinaakobole,
mani yaaleeta emwo yao mu sihubbakiro?
13“Embaya ch'ewudo chibaambuha bulai muno;
nae abulao ewudo lyahabburuha ohuhira awudu.
14Olwohuba ewudo lireha amaki kaalyo mu loba,
mani obubafu bw'eloba bwaakabasa,
15mani ewudo lyeebirira liti ohukulu hunyala ohukaata,
haandi oba lyeebirira liti ebisolo biteende binyala ohukaseenakira.
16Ewudo lisaandya muno otumwiinyi twalyo, twaaba koti otutaali otwalyo;
mani lyeekesa liti haba sirideebayo ohuhalaabanira bihaya; 17olwohuba Nasaae yaliloonga atyo lihaye ohuba neende amakesi,
haandi haba siyaliba amakesi k'ohumanya.
18Nae nilichaaka ohwiiruha,
lidoong'a sa nilicheha efaraasi neende omwiirusi wayo.
19“Niiwe oberesaanga efaraasi amaani?
Niiwe ofwaasaanga ekosi lyayo amaani?
20Niiwe okeraanga niyiduuma koti esike?
Ohufuuta hwaayo hw'amaani hutiisa abaandu.
21Yedeeya niyiseenakira eloba, mani yeekesa yiti yiri neende amaani;
yiiruhaanga neende amaani kayo koosi yikutaanira ebilwaaniso by'omusuku wayo mu biita.
22Efaraasi haba siyimanyire obuti, haandi haba siyesiinduhaanga;
haba siyiiruhaanga olugaanga.
23Ebilwaaniso bi beerusi bachio bakiinga bigwaaranaho mani
byaamesamesera mu mubasu.
24Yibbachuha embiro neende obwaalaba buungi niyichia mu moni;
niyiwulira ekono ly'eturumbete, haba siyesimiirisa.
25Buli luboobba eturumbete, yiboola yiti, ‘Otyoo!’
Yinyala ohuwunyiirisa eye nilisisiiri eyale,
haandi yaawulira esiyoka sy'abahoongo b'eye nibasisiiri eyale.
26“Niiwe oweekesaanga eeswi ohubburuha,
neende ohubaambula embaya chalyo nichewuunjire emwaalo?
27Niiwe olagiraanga eeswi ohuniina aakulu
mani lyoombaha esiyu syalyo aakulu?
28Lyoombahaanga esiyu syalyo hu lwaanda
mani limenya hu makina maleeyi.
29Eyo niyo yilibonera esiindu si lineete lyaalya;
emoni chaalyo chaasibonera eyale.
30 #
Mat 24:28; Luk 17:37. Otumwiinyi twalyo tunuuna amabaanga;
haandi elyeene lyaaba eyiri esiindu sifwiire.”
Currently Selected:
Yobbu 39: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
