Yobbu 41
41
1 #
Sab 74:14; 104:26; Yis 27:1. “Wahanyala ohuloba esisyuuhira-banaabi silaangwa siti lefiataani, neende elobo ly'eng'eeni,
oba waboya olulimi lwasyo neende omukoye?
2Wahanyala ohwiingisa omukoye mu lyoolu lyasyo,
oba waafumita olusaya lwasyo neende elobo?
3Siinyala ohuhwekweeda siti osikwiire esisa?
Siinyala ohulomaloma naawe bulai siti osilehe?
4Siinyala ohuhola endagaano naawe mani syaasuubisa ohuba ohuhuhalaabanira endaalo choosi?
5Onyala ohubaya nasyo koti luwahabaya neende eyoni,
oba onyala ohusiboyeraanga abahalaabani bao bahaana ohubasaangaasa?
6Abanaabi banyala ohusyoosanira?
Abachurusi banyala ohusibaaka mani baasikusa?
7Onyala ohusifumita efumo mani lyaabita mu sihoba syalyo,
oba waadomola omutwe kwasyo neende omuuma kufumita eng'eeni?
8Teemaho ohuyiigeeng'aho omuhono ohuyilwaania;
obone n'oba waheebirireho ohutoochwa hwooba nonaatoochwe nayo, mani huboneho haandi nooba wahateemeho ohuyegeeng'aho ehabi liindi!
9Omuundu yesi-yesi obonaho sa esisyuuhira-banaabi ati,
amaani kamubwechaangamo; mani abbwooyoha akwa sa aasi.
10Abulao omuundu mwaalaba onyala ohuteemaho ohusisimusa.
Mani wiina onyala ohweema mu moni wasyo?
11Wiina owamberesaho esiindu yi mba hoyera ohutuunga?
Buli siindu siri hu syaalo syaange nisyo.
12“Haba siinyala ohubuleera hu bidiira hu makulu k'esisyuuhira banaabi,
oba hu maani kasyo maangi, oba hu huboneha hwasyo hulai.
13Wiina onyala ohusifwaalula esyefwaalo syasyo sy'aakulu?
Wiina onyala ohufumita eseero lyasyo liri amahabi kabiri?
14Wiina mweene owahanyala ohwaasamya esa ya chasyo
chirimo ameeno katiisa ako?
15Omukoongo kwasyo kuliho amakaamba,
akaambaana haandi amoomu koti ekina.
16Kali alala muno;
mani kata emboo haba siyinyala ohukabitamo.
17Kaambaana mani kaadiirana alala;
koomiiranaho mani haba sikanyala ohukabuhanisibwamo.
18Nisyaasamula n'enjeserye ch'omuliro chaaduhira sa muhanwa wasyo,
haandi emoni chasyo chaahanya chiri sa koti elyuuba.
19Enjeserye chaaduha sa nichitula muhanwa wasyo;
chiduumamo koti enjeserye ch'omuliro.
20Omwoosi kudumuuha nikutula mu moolu kasyo,
koti okutula mu ndamu yitokota oba koti ebikoha byaaduha.
21Omuuya ku yiyeera kuyaambya amaanda,
haandi enimi ch'omuliro chitula muhanwa wasyo.
22Ekosi lyasyo ly'amaani muno,
mani buli muundu obukaanana nasyo atya butya.
23Efunyiro ch'enyama chasyo chediira alala,
mani chooma koti esichuma.
24Omwooyo kwasyo mwoomu koti ekina,
mwoomu muno koti olukina.
25Nisisiingira sa siti, kata omuundu w'amaani maangi yesi atya;
besiinduha mani baabula esy'ohuhola abeene.
26Kata olugaanga lwahasifumita, haba silwahasinyayaala;
kata efumo neende olusaale haba sibinyala ohuhusinyayaala.
27Esyuuma haba siyisibona ohuba esiindu,
haandi omugasa hu nisyo, kuli sa koti olusaala lwabola.
28Olusaale haba silunyala lwaakera syeeruha;
amakina k'epaanda kali sa koti yi ebikoha biri.
29Endaausi chosi chiri sa koti ebikoha yi siri;
haandi yirekeeresa sa kata amafumo ka baandu bayibbaayaho.
30Amakaamba kasyo kali koti enjio ch'endamu enjoki;
silambaalaanga esyeene siba koti olwaanyi lu baanihaangaho obule.
31Nisiingira mu nyaanja, yidubuula amaachi kaaba koti endamu yitokota;
mani sikera enyaanja yeesera koti endamu y'amafuta.
32Mu maachi kayibitamo, yireha enyuma omuhoosi kuli koti efwiinda ching'enaang'ena,
onyala ohubaasa oti firo lya rachaari nilyo.
33Abulao esiindu sifwanaana nasyo hu syaalo,
esiloonge esitaali n'obuti.
34Sirekeeresa buli sisolo syeniinia;
nisyo esituki sy'ebisolo biteende.”
Currently Selected:
Yobbu 41: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
