Yobbu 38
38
Omwaami akobola mu Yobbu
1Omwaami naali mu sifuusye yakobola mu Yobbu n'aboola ati:
2“Wuno niye wiina owikalira endekeha yaange ohumanyihana naalomaloma ebitaalimo amakesi?
3Mani weboye olusibiro weeme koti omusaacha,
mani wungobolemo esiteebo syaange.
4“Ewe wali yeena ese ninoonga esyaalo?
Mboolere, nooba noomanyire.
5Wiina mweene owaheengao ati sinaake sitye omanyire obwadyeeri?
Oba wiina owasipiima neende omukoye?
6Emisiingi chasyo, cheema hu siina,
oba wiina owafumita ekina lyomu soonda,
7esulwe nicheembera alala koti abaandu,
mani ebiloonge byomu kulu nibiyaasa hulw'esaangaalo?
8 #
Yer 5:22. “Oba wiina owataao emilyaango ohwiikalira enyaanja,
lu yaadiha koti eyitula mu nda w'esyaalo;
9nindahola ebireesi ohubwiiha enyaanja,
mani ndayiboya neende ebireesi bimali,
10haandi ndayiteerao olwaaho yi yaakama,
mani ndayitaaho ebidiiri neende enjiki.
11Mani ndaboola endi, ‘Yakamaanga ano, ataali ohwemeeda ohusudaho,
haandi ano niyo yi mafwiinda kao k'amaani kanaayenjeerereenge’?
12“Ohutula niwiibulwa, walagiraho obwiire oti buhye,
haandi wakeraho amabwiibwi kaamanya ebiha byako,
13hu bulafu bwako bunyale ohudiira esyaalo syoosi,
mani bwiiruse abonooni bahaye ohweekisa?
14Esideete sikera engulu neende ehooho byaaboneha,
mani esyaalo syaahanya syaaba koti engubo yeehunyire-hunyire.
15Abala mbi haba si badaha obulafu bw'esideete,
olwohuba bubakaira ohuhola ebiindu bileeta emitowaano.
16“Waali woolaho ebusiba yi nyaanja yisoohera,
oba waali wakeenderaho hu lwaalo ly'enyaanja?
17Aliwo owali niyahweekesaho enjiki ch'emakoombe,
oba waali niwabonaho enjiki chiingira mu siirima eyiri abafu?
18Omanyireho koti lu butakalafu bw'esyaalo bwaaka?
Ngobolemo, nooba noomanyire bino byoosi.
19“Engira yiicha yi bulafu bwamenya yiri yeena,
nae esiirima situla yeena,
20mani hu onyale ohusiyira abuundu wasyo
haandi onyale ohusiheengerao engira yi sibitiraho nisichia yi syamenya?
21Omanyire olwohuba wali niwamala ohwiibulwa ebiha ebyo,
haandi emyaaka kyao ky'obuhuluundu kyali emiingi!
22“Wali weengiraho mu nyuumba chi babiihamo omunyiti,
oba mu nyuumba chi babiihamo amakina k'efula,
23bitekehera ebiha bidinyu,
oludaalo lw'ohulwaana neende olw'amaye?
24Ngira siina eyoola abuundu yi bulafu bukabuhaniramo,
oba yi muyaka kutula ebukwe kusalaanira hu syaalo?
25“Wiina owatema muukulu emilongooti chi fula yibitamo niyikwa,
haandi yeekula engira yeehubba?
26Wiina okwiisaanga efula mu bituundu bi baandu batamenyamo,
efula yaakwa mu siparara, abuundu ataali neende omuundu kata mulala;
27ohuchuhiirisa esyaalo syooma haandi esyalehwa ao,
mani yasihola syameramo obunyaasi?
28“Obaasa oti efula yiri laata yao,
oba wiina oweebula amatoonde k'olume?
29Muhasi siina oweebula omunyiti,
haandi wiina oweebula amakina k'efula?
30Amaachi kooma kaaba koti ekina,
haandi aakulu w'enyaanja yaadiirana. 31#Yob 9:9; Amos 5:8.Onyala ohuboya eminyororo cha Pileyade,
oba ohuboolola emikoye kya Orioni?
32Onyala ohweekesa Masarooti ebiha byaachio,
oba onyala ohwaaya enani liri neende abaana?
33Omanyire amalako katuka aakulu mu miyaka?
Onyala ohukeehoonyera ohutuka esyaalo?
34“Onyala ohulagira ebireesi,
mani omuhula kw'amaachi kwahubwiiha?
35Onyala ohulagira olumesu, mani lwaamyeesuha,
mani lwaheecha yooli lwaaboola luti, ‘Mbano ndi ano’?
36Wiina owaberesa ebireesi amakesi,
haandi yaaberesa enang'oong'o ohumanya?
37Wiina onyala ohwehoonyera amakesi mani yaabala ebireesi?
Oba wiina onyala ohudengaania ebireesi by'efula mani byeedisa amaachi,
38olufu nilweehola edosi,
mani edosi lyooma lyaadiirana alala?
39“Onyala ohuyiimira edalang'i esolo y'ohulya,
oba yaaberesa edalang'i njere ebyohulya bichiikusa,
40nicheekisa mu ng'uungu chiachio,
oba nicheeyalisa mu sichaha nichiliinda ohukwa hu bisolo eby'ohulya?
41Wiina oberesaanga amayoni ebyohulya,
obumwiinyi bwako nibuchwiilira Nasaae,
mani bwakeendaana nibukoonya ebyohulya?
Currently Selected:
Yobbu 38: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
