Yobbu 37
37
1“Sino syosi sikera omwooyo kwaange kwateengereha,
mani kwatula mu bwiihalo bwakwo.
2Muwulire ohwaaduluha hw'ekono lya Nasaae,
neende ohubuluula hutula mu munwa kwae.
3Nasaae asiindihaanga olumesu luhalania ekulu lyoosi,
haandi ohumesamesa hwalwo hwoola hu enyaande choosi ech'esyaalo.
4Olumesu niluwa, n'ohuwoola hw'ekono lyae huwuliirihana;
Nasaae yaaduluhana neende ekono lyae litiisa
mani olumesu lwemeeda alala neende ohwaaduluhana hw'ekono lyae.
5Ohwaaduluhana hw'ekono lya Nasaae huwukisa;
ahola ebiindu by'amaani bi hutanyala ohumanya.
6Olwohuba aboolera efula y'amakina ati, ‘Kwa hu syaalo’;
neende ebireesi by'efula ati, ‘Kwa neende amaani.’
7Mani Nasaae yaakamya emirimo kya buli muundu,
hu baandu boosi bamanya ebiindu bi anyala ohuhola.
8Mani ebisolo byoosi nibichia yi byeekisaanga,
nibihaira mu meena kabyo.
9Esifuusye situla emwaalo,
haandi obunyifu butula emukulu.
10Nasaae afuuta omuuya mani kwaanyisa amaachi,
mani amaachi keehola amakina bwaangu muno.
11Nasaae yeechusa ebireesi neende omunyisi;
ebireesi bisalaania ohumesamesa hwae.
12Ebireesi byebodoohania Nasaae n'abilagiire,
biholera huhulagira hwae,
buli abuundu yi bichiira.
13Ebiha biindi Nasaae akwiisa efula ohusaandya abaandu, oba ohuchuhiirisa esyaalo,
oba ohweekesa abaandu ati yabaheera.
14“Ewe Yobbu, bulira sino;
buleera mani obaase hu biindu by'amaani bi Nasaae ahola.
15Omanyire koti lu Nasaae abitaaho elako lyae,
mani yaakera olumesu lw'ebireesi lwae lwaaduha?
16Omanyire koti ebireesi byereeraanga mu bbaanga,
ohweekesa koti lu mulimo kwa Nasaae kw'amaani haandi koti lwaali ow'amakesi k'aakulu muno?
17Ewe otubuhira oluuya muungubo chao
esyaalo nisichuule obubafu olwohuba omuyaka kuwuucha nikutulira emwaalo.
18Ewe onyala ohuhoonyaho Nasaae ohulandaasa ekulu,
lyooma lyaaba koti esichuma sing'enaang'ena?
19Tweekese bi hunaboolere Nasaae;
abulao esiindu sihumanyire, huli koti abaandu bali mu siirima.
20Banaamuboolere bati ndaha ohulomalomaho nae?
Aliwo omuundu owekoomba ati asihiriswe?
21“Nae bulaanu abaandu haba si badaha ohutingaala hu bulafu
ekulu niling'enaang'ena,
omuyaka nikumalire ohuwuucha ebireesi mani ekulu nililabire.
22Emukulu niyo yi humilaa-milana huli koti esaabbu hutula;
mani oluyaali lwa Nasaae lwaatwiichusa obuti.
23Omunyala w'ebiindu byoosi, haba sihunyala ohusuda aambi nae;
muhunuufu mu maani neende mubwadyeeri,
haandi saacha ohudoondobania obuluungifu buungi.
24Sakira abaandu bamutya;
s'adeeba hu abo ababaasa abeene bati bakesi nibo.”
Currently Selected:
Yobbu 37: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
