Yobbu 36
36
1Haandi Elihu yachiiririra ohulomaloma n'aboola ati,
2Hola niwuundesimiirisaho budiidi, njia ohuhweekesa,
olwohuba siriwo esiindu si ndaha ohuhuboolera hulwa Nasaae,
3Olwohuba mubwadyeeri bweene emboosi chaange haba sichobubacha,
haandi njia ohubeekesa endi Omuloongi waange muluungifu niye.
4Mubyadyeeri bweene haba siimbacha;
olwohuba omukesi mweene ali naawe.
5Bone, Nasaae ali neende amaani, haandi saalekeeresa omuundu yeesi;
haandi sibulao esiindi syataamanyire.
6Haba s'alehaanga ababi bayiindira,
haandi aberesaanga abafwiinyirirwa ebiindu bi bahoyera.
7Ahiingakiriraanga abaluungifu,
haandi abahola batuka koti abatuki
mani abaleha banyoola oluyaali endaalo choosi.
8Nae abaandu nibaba nibaboyerwe mu minyorooro,
nibasaanda hulw'ebiindu bi bahola,
9Nasaae amalaanga abeekesa ebyonoono byaabwe bi bahola,
neende esuunga yaabwe.
10Yeekulaanga amatwi kaabwe bawulira koti aboolobya,
neende ohubalagira ati batule mu bibi byaabwe.
11Nae nibawulira mani bamuhalaabanira,
bachia ohumalaanga obulamu bwaabwe nibali neende edeembe,
haandi emyaaka kyaabwe nibali neende ehabi nyiingi muno.
12Nae nibatawulira, bachia ohusihiiriswaanga neende olugaanga,
mani bafwa nibataali neende amakesi.
13“Abo abatatya Nasaae babiraanga etima mu myooyo kyaabwe;
kata bahasaanda batye haba sibasabaanga obuhoonyi.
14Bafwa nibasisiiri abaraaga,
haandi obulamu bwaabwe bumaliirihiraanga mu soni.
15Nae Nasaae yeekesa abaandu naabitira mu husaanda hwaabwe,
haandi yehoonyesera ebidinyu ohwiikula amatwi kaabwe.
16Nasaae yahutusa mu bidinyu
mani yaahuhola wanyoola esangaalo,
haandi yaata hu meesa yao ebyohulya binyunyuula.
17Nae bulaanu bahuheengeere omusaango mu bwiichufu nasilala koti abonooni;
ohuheenga omusaango alala neende obwadyeeri bihukwiireho.
18Weliinde mani ohaye ohubachwa neende obuyiinda;
haandi otakanya obuyiinda bwahunyaasa.
19Obaasa oti ohulira hwao hunahutusa mu husaanda,
oba amaani kao koosi ohuhuwonia ohusaanda?
20Otekoomba esiro ohwoola,
ebiha bi baandu basihirisirwamo ohutula mu bwiihalo bwaabwe.
21Wehaliirise, mani ohaye ohwonoona,
olwohuba sino nisyo sy'odoolere mu bweyaango bw'ohusaanda.
22Bona, koti lu Nasaae ali neende amaani maangi;
wiina owahamwoolaho mu hweekesa?
23Wiina omuboolera esy'ohuhola,
oba wiina onyala ohumuboolera ati, ‘Oholere esyonoono’?
24“Yichulisa ohumufumiaanga hulw'ebiindu bi yahola,
bi baandu beemba nibakinia.
25Abaandu boosi basibona;
abaandu babibonera eyale.
26Bona, Nasaae koti lu ali ow'amaani, nae haba sihumumanyire;
obuungi bw'emyaaka kyae haba sibumanyihana.
27Olwohuba adaya amatoonde k'amaachi,
mani akahola kaba ohutoonya hw'efula
28ka ebireesi bikwiisa aasi efula,
mani yaakwiira abaandu mu buungi.
29Aliwo omuundu yeesi omanyire koti ebireesi bisalaanaanga muukulu,
oba ohwaaduluhana hw'ekulu lyae?
30Bona, asalaaniaanga ohumesamesa hw'ekulu ohumweebodoohania,
mani afuuniha ebusiba w'enyaanja neende esiirima.
31Olwohuba aheengeraanga abaandu omusaango ohweema hu bino;
mani naliisa abaandu ebyohulya mu buungi.
32Adiiraanga olumesu mu mahono kae,
mani alulagira ohuubba abuundu bweene.
33Ohwaaduluhana hw'ekulu hweekesaanga huti omuyaka kuli ohwiicha,
mani eng'oombe chosi chimanya chiti omuyaka kuli ohwiicha,
Currently Selected:
Yobbu 36: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
