Yobbu 3
3
Yobbu yeekanyiirisira Nasaae
1 #
Yer 20:14-18. Bino nibyawa, Yobbu yachaaka ohulomaloma mani n'abwaaba oludaalo lu yebulirwaho. 2Yobbu yaboola ati:
3“Leha oludaalo lundeebulirwaho lusihirire,
neende esiro si babooleramo bati,
‘Omwaana musyaani ayererwe mu nda.’
4Leha oludaalo olwo lube olw'esiirima!
Leha Nasaae oli aakulu atatwiichulisa,
oba obulafu bwalukwaaho.
5Leha lube olw'obumali neende esiirima sya titititi.
Leha enang'oong'o lilubeeho;
leha esiirima sy'esideete silutiise.
6Esiro esyo, leha esiirima sidiirane silubeeho!
leha oludaalo olwo luhaye ohubalirwa mu ndaalo ch'omwaaka,
leha luhaye ohuba lulala hu ndaalo ch'omwoosi.
7Eee, leha esiro esyo sibe esikuumba;
leha abaandu bahaye ohuhusisaangaaliramo.
8Leha abaandu babwaaba oludaalo olwo basibwaabe,
abo abamanyire ohusiingisa Okuyuha.
9Leha eng'ining'ini chomu mabwiibwi chihayeenge ohwaaduha hu ludaalo olwo;
leha obulafu bu lwekoomba, buhaye ohulwoolaho,
noomba lubonaho echuli.
10Olwohuba, oludaalo olwo haba silweekalira maama engira ch'ohwiibula,
oba lwaangayira ohubona ebidinyu.
11“Lwasiina sindafwiirao hu bahanjibula sa bati,
ndaatula mu nda mani ndaafwa?
12Lwasiina ndeehala hu makulu baandera?
Haandi embeere ch'ohunuuna chabaao mani ndaanuuna?
13Olwohuba, bino biba nibyabulao, mba ndafwa mani ndaawuleera;
mba ndeeyalisa; mani ndaawuluuhira,
14alala neende abatuki neende abeemirisi bohu syaalo
abeyoombahira buyaaha amadooho.
15Oba neende abaana b'abatuki abali neende esaabbu,
abeechusa enyuumba chaabwe efeesa.
16Oba lwasiina haba sibanjibula koti esituluucho,
koti abaana beebulwa nibafwiire mani bahaya ohubonaho elyuuba?
17Eyomu ng'ani, abonooni baakama ohwonoona,
haandi eyo, abajoong'u bawuluuhirayo.
18Eyo, ababoye bakwiisaho omwooyo;
mani baahaya ohuwulira ohuyibuuha hw'abanyaapara baabwe.
19Abayere neende abahuluundu bali eyo,
haandi abawaambe haba sibatukwa neende abaami baabwe.
20“Lwasiina abaandu bali mu bidinyu baba neende obulafu,
haandi neende abasaanda baaba abalamu,
21 #
Hubwi 9:6. abo abekoomba ohufwa, nae sihwoola,
mani bahukoonya ohuhiraho abakoonya amakina k'engaanga;
22abasangaala muno,
haandi beehoya, nibanyoola owohusiihwa?
23Lwasiina obulafu buhosa omuundu yakiswa,
oyo yi Nasaae yasitiraho olukaka?
24Olwohuba ohunyaahana hwaange hwiicha koti omugaati,
mani ohwekanyiirisa hwaange haba sihwaakama.
25Olwohuba esiindu si ndatya nisyo esiinjichireho,
haandi esyo si ndesiinduhiraanga muno nisyo esingwiireho.
26Ese haba simbuluuhaho, oba ndaabuleera;
haba si ndi neende omuleembe; ohutusaho ebidinyu bitawa byoong'ene nibyo ebiingwaaho.”
©Bible Society of Kenya, 2019
©Bible Society of Uganda, 2019