Yobbu 4
4
Enganiaaya yitaangira
4:1—14:22
Elifaasi
1Elifaasi Omutemanaati yakobolamo ati:
2“Onanyoolera omuundu nanalomalomeho naawe?
Nae wiina onawuulerere mani yaahaya ohulomaloma?
3Bona, wekeese abaandu abaangi muno,
haandi waagumya abakata.
4Wakerakiraanga omuundu osidoyeerwe,
mani omugumya yeema niyomiirire.
5Nae bulaanu mbao sihukwiireho, mani waabuleera buwuleera;
si hudiiraho, mani weyendeherera.
6Obulamu bwao bweema mu hutya Nasaae,
haandi obweesikwa bwao nibwo esuubi lyao.
7“Bulaanu baasaho, muundu siina otaali neende omusaango owali nasihiriiswe?
Oba wabonaho yeena omuundu muluungifu nasukuunwe?
8Nae koti lu mbweene, abo abahola ebyonoono
mani baaleeta ebidinyu, bosi banyoola ebidinyu.
9Nasaae abawuucha mani baasihirira,
haandi mu tima lyae baakotao.
10Ohubuluula hw'edalang'i, ekono ly'edalang'i enjalaba,
ameeno k'edalang'i njere kabbongoohe.
11Edalang'i y'amaani yifwa olwohuba yibula esolo y'ohulya yi yiita,
mani abaana bayo baasalaana.
12“Bulaanu emboosi yanjichira koti esyaama,
mani yamoonyeserwa mu hutwi.
13 #
Yob 33:15. Ndali nimbaasa hu biindu byamboneheere mu bilooto bya siro,
ebyoola hu muundu endoolo ch'amaani nichimuyirire,
14obuti bwandiira, neende oluteengo,
ebyakera amakuumba kaange koosi kaateengereha.
15Olumyesu lwaambita mu moni;
mani efwiiri lyaanyema hu mutwe.
16Ndabona esiindu nisyeemere,
nae sindanyala ohumanyirisa koti lu sifwaana.
Efwaani yasyo yali mu moni waange;
mani buli siindu syaabuleera chi, mani ndaawulira ekono liti:
17‘Omuundu woohufwa sa anyala ohuba omuluungifu mu moni wa Nasaae?
Aliwo omuundu onyala ohuba omwoolerefu mu moni ch'Omuloongi wae?
18Kata mu bahalaabani bae, balimo bateesika,
haandi yolobya malaika bae mu mbi chaabwe.
19Nae obaasa oti anyala ohweesika omuundu waloongwa mu loba,
otula mu lufu,
yi nyeende chilya sa.
20Omuundu anyala ohuba omulamu echuli, nae engoloobe yoola n'afwiire;
yaasihirira elalira mani wabulao omuundu omulomalomaho.
21Nae nibamala ohumuboya mu suuka,
saaba amalire ohufwa, haandi naabulaho amakesi koosi?’
©Bible Society of Kenya, 2019
©Bible Society of Uganda, 2019