Yobbu 2
2
Sitaani haandi ateema Yobbu
1Haandi lwaliwo oludaalo luundi lu baana ba Nasaae beecha ohweyekesa mu moni w'Omwaami, mani Sitaani yesi niyeecheramo ohweyekesa eyiri Omwaami. 2Omwaami yateeba Sitaani ati, “Otula yeena?” Sitaani yakobola mu Omwaami ati, “Ndula ohung'alaala hu syaalo eyo neende era, nisyebodoohaniamo.” 3Omwaami yateeba Sitaani ati, “Ombweeneereho Yobbu omuhalaabani waange, abulao omuundu yeesi hu syaalo oli koti Yobbu, obulaho omusaango kwoosi haandi omuluungifu, owiisa oluyaali mu Nasaae haandi owebwaaba ohwonoona. Asiihayiire sa hu bweesikwa bwae, kata ayahaba mbwe ewe wasiindiha ndamusihirisa sa ataali esifune syoosi.” 4Nae Sitaani yakobola mu Mwaami ati, “Esihoba situungwa esihoba! Ebiindu byoosi bi muundu ali nabyo yahabyeetuseho nae adoong'e naali omulamu. 5Nae bulaanu kololaho omuhono kwao mani odiire hu makuumba kae neende hu mubiri kwae, mani achia ohuhwebwaaba n'obona.” 6Mani Omwaami yaboolera Sitaani ati, “Bona, nguyo ali mu bunyala bwao, ohutusaho, otamumalaho obulamu bwae.” 7Sitaani yatula mu moni w'Omwaami, yayaambya Yobbu amaboondo mabi muno, mani Yobbu niyeechula ebifwiimba hu mubiri ohutula hu mutwe ohwoolera elalira hu makulu. 8Yobbu yabukula olukyo ngaalweyakirasa, mani niyeehalaangaya mu kohe.
9Omuhasi wa Yobbu yamuteeba ati, “Ewe osihayiire sa hu bweesikwa bwao obwo? Webwaabe Nasaae, mani ofwe bihire.” 10Nae Yobbu yamuboolera ati, “Olomaloma koti mulala hu bahasi basiru yahalomeloome. Hwakaanireenge sa ebiindu bilai byoong'ene ohutula mu mahono ka Nasaae, nae bulaanu huhaya ohwakaanira ebiindu bibi?” Mu kano koosi, Yobbu haba siyalomalomaho bubi hu Nasaae.
Abeecha ba Yobbu beecha ohumusaasira
11Abeecha ba Yobbu bali, Elifaasi, ohutula mu siko sya Temani, Bbiridaadi, ohutula mu syaalo sya Suwa, neende Sofaari, ohutula mu syaalo sya Naama. Nibawulira ebidinyu byakwa hu Yobbu, abeecha badatu bano, buli mulala yaheengao ohutula mu syaalo syae ohwiicha ohumusaasira. Elifaasi Omutemaani, Bbiridaadi Omusuhiiti, neende Sofaari Omunamaati. Bafukiirisania ohwiicha ohusaasira Yobbu neende ohumugumya omwooyo. 12Nibamubona nibasisiiri eyale, haba sibamumanyirisa; mani baachaaka ohuubba wuuwi nibalira amasika. Bataandula amakaanju kaabwe mani baanya olufu aakulu nilubakwa hu mitwe. 13Mani nibeehala aasi hu loba alala nae ohumala endaalo chitaanu-na-chibiri neende ebiro bitaanu-na-bibiri, mani abulao omuundu walomalomaanga nae emboosi yoosi, olwohuba babona bati yali n'asaanda muno.
©Bible Society of Kenya, 2019
©Bible Society of Uganda, 2019