Yeremia 7
7
Yeremia ayaalira abaandu mu Nyuumba ya Nasaae
1Ao mani Omwaami n'aboolera Yeremia ati: 2“Siingira weeme mu siruwa sy'enyuumba y'Omwaami, mani oyaalire abaandu emboosi yino nobaboolera oti: Muwulire Emboosi y'Omwaami, eng'we mweesi abaandu bomu Buyudaaya, abeengirira mu siruwa sino ohwiinamira Omwaami. 3Omwaami w'Obunyala, Nasaae wa Yisiraeli aboola ati, mukolole esaambo cheeng'we neende ebiholwa byeeng'we, mani njia ohuleha mumenye mu bweyaango buno. 4Mulehe ohweesika emboosi chobubacha chiloondehana chino chiti: Yino nyuumba y'Omwaami, enyuumba y'Omwaami, enyuumba y'Omwaami.”
5“Kaluuhanie ebiima byeeng'we neende ebiholwa byeeng'we. Mube abadyeeri eyiri abasyeeng'we. 6Muleheenge ohufwiinyirira bawalukeenda, neende bamulehwa, neende abahasi bafwiirwe. Mwaakamire ao ohwiitaanga abaandu babula omusaango mu syaalo sino. Mwaakamire ao ohwiinamiraanga banasaae baandi, olwohuba, nimubeenamira abeene muba mwechuunia sa.” 7Ao mani njia ohubaleha mumenye mu syaalo sino si ndaberesa bakuuka yeeng'we ohuba esyaabwe endaalo choosi.
8Bone, muli ohweesika emboosi ch'obubacha, echitaalimo obuhoonyi. 9Mwiiba, mutemula, muhola obucheke, mweechuba ebyobubacha, munioohesera Bbaali obubbaani, haandi mwiinamira banasaae bamukoterwe. 10Mwemeede sa ohuholaanga ebiindu bi tadaha bino, mumala mwiicha ohweema mu moni waange, mu nyuumba yaange yeene yino, mani nimuboola muti, Huli bulai. 11#Mat 21:13; Mrk 11:17; Luk 19:46.Omwaami ateeba ati: “Mubaasa muti enyuumba yaange yino, bweeyikamo bw'abanyaka? Bone, Ese mweene malire ohubona ebiindu bi muhola. 12#Yos 18:1; Sab 78:60; Yer 26:6.Bulaanu muchieho Siilo, abuundu yi ndataangira ohudoola ohunyinamiraangamo, mani mubone bi ndasihola, ohweema hu bibi by'abaandu baange Abaisiraeli.” 13Mani bulaanu, olwohuba muholere ebiindu bino byoosi, kata ndahaba nindabalabula amahabi maangi muno, nae nimuhaya ohuwulira, haandi nindabalaanga, mwahaya ohukaluhamo. 14Mani sakira esiindu si ndahola Siilo, nisyo siinjia ohuhola Enyuumba yaange yino, yi mweesika, yi ndababeresa eng'we neende bakuuka yeeng'we. 15Mani njia ohubeerusa mutule mu moni waange, koti lu ndeerusa abeeho beeng'we boosi, abaandu b'enyuumba ya Efuraimu.
Obujeemu bw'Abaandu
16Omwaami yamboolera ati: “Nae ewe Yeremia, otasabira abaandu bano, oba wandirira oba waasaba hulwaabwe. Otandekweeda daawe, olwohuba haba siinjia ohuhuwulira. 17Ewe haba soobona ebiindu bi bali ohuhola mu biko bya Buyudaaya neende hu ngira chomu Yerusalemu? 18#Yer 44:17-19.Abaana bateenya eehwi, laata yaabwe nabo baadusa omuliro, nae abahasi bakaanda obusye, ohuubba emigaati eyiri nasaae muhasi w'ekulu; haandi baakaluuhanira banasaae baandi ebiyaanwa by'ohung'wa, ohusiingisa etima lyaange.” 19Omwaami aboola ati: “Haba sibali ohutaangana Ese, nae abeene nibo abetaangana, mani abeene nibeereetera ohudoondobana.” 20Mani sakira Omwaami Nasaae aboola ati: “Bone, njia ohwiisa etima lyaange neende obwaalaba bwaange abuundu ano, hu buli muundu neende hu buli solo, hu buli musaala kwomu siino neende hu buli syaamo syomu loba. Etima lyaange lichia ohwaaduha mani lihaye ohusima daawe.”
21Omwaami w'Obunyala, Nasaae wa Yisiraeli, aboola ati: Ebiyaanwa byeeng'we bisaambwa byosi mubimeeda hu biyaanwa byeeng'we biindi, mani mulye enyama yoosi. 22Olwohuba, hu ludaalo lu ndatusa bakuuka yeeng'we ohutula mu syaalo sya Misiri, haba sindababeresa ebilagiro bidiira hu biyaanwa bisaambwa neende ebiyaanwa biindi. 23Nae ndabalagira sino endi: Wulireenge ekono lyaange, mani njia ohuba Nasaae weeng'we, naang'we muchia ohuba abaandu baange. Muchianakaneenge neende ebyo byoosi bi mbalagira, mani buli siindu sichia ohubachiira bulai. 24Nae nibahaya ohuwulira oba ohutekeeresa, ohutusaho baloondakana neende amakesi kaabwe keene, neende ebiholwa by'emyooyo kyaabwe mibi. Mani mubweyaango bw'ohusuda mu moni, bakaluha sa enyuma. 25Ohutula mu ndaalo chi bakuuka yaabwe batulira mu syaalo sya Misiri ohwoola buti, ndemeeda-bwemeeda ohubatumira abahalaabani baange, abanabbi. 26Nae nibahaya ohuumbulira, oba ohutekeeresa bi mboola. Mani niboomya emitwe, nibahola ebiindu bibi ohuhiraho bakuuka yaabwe.
27Ewe Yeremia, wahabeekese emboosi chino choosi, nae haba sibachia ohuhuwulira. Wahabalaange, nae haba sibachia huhukobolamo. 28Wahababoolere oti, Esyaalo sino haba sisiwulira ekono ly'Omwaami Nasaae waabwe, haandi haba sisifukiirira hukololwa. Obwadyeeri bukotereo; haba kata si badaha hulomaloma obwadyeeri.
Ebyonoono byaholerwa mu hooho lya Hinoomu
29Eng'we abaandu bomu Yerusalemu, mweebekeho efwiiri mani mulisukune eyale.
Muchaake ohulira nimuli aakulu w'ebigulu,
olwohuba Omwaami anyoleere
mani yaahaya haandi yaasukuna abaandu bae.
30Omwaami aboola ati: “Abaandu bomu Buyudaaya bonoonere mu moni waange. Babukuule banasaae baabwe mani baabata mu Nyuumba yaange, baayinyaasa. 31#2 Abat 23:10; Yer 32:35; Lef 18:21.Boombaahe ebituundu bihunuufu Tofeeti, mu hooho ly'omwaana wa Hinoomu, ohusaamba abaana baabwe basyaani neende abaana baabwe bahaana mu muliro, esiindi sitabalagiraangaho ohuhola, oba sitabaasaangaho daawe.” 32Mani sakira bone, ebiha byahoole, sihaye ohulaangwa siti, Tofeti, oba ehooho ly'omwaana wa Hinoomu, nae sichia ohulaangwa siti, ehooho ly'Esisiinjiro, bahasiihemo abafu, olwohuba bwahabuleo obweyaango buundi obwohusiihamo abafu. 33Mani emilaambo ky'abaandu bano kyahabe ebyohulya by'amayoni kabburuha neende ebisolo byomu siino; mani abulao owahabiiruse. 34#Yer 16:9; 25:10; Hubwi 18:23.Njia ohwaakamya mu biko bya Buyudaaya neende mu ngira chomu Yerusalemu amakono k'ebidyaalo neende esangaalo, neende amakono k'abo abali mu bidyaalo by'ohudeehisania; olwohuba esyaalo syaheehole ekuunda.
Currently Selected:
Yeremia 7: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
