Yeremia 6
6
Yerusalemu syebodohaanie neende abasuku
1Eng'we abeechuhulu ba Bbenjamini, mwiiruhe mweewonie.
Mutule mu Yerusalemu.
Muubbire eturumbete mu Tekoa.
Musiingise ahalolero hu Bbetihakereemu;
olwohuba esyonoono
neende ohusihirira hw'amaani biicha nibitulira emukulu.
2Esiko sya Siyooni silai nisyo
nae njia ohusisihirisa.
3Abaayi neende ebyaayo byaabwe baheeche basiseete;
bahoombahe amayeema kaabwe ohusyebodoohania,
mani bahaaye ebyaayo byaabwe, buli muundu abuundu wae.
4Bahaboole bati: “Mweetekehe ohuseeta Yerusalemu;
siingre husiseete mu sideete”
Nae mani bahaboole bati: “Ebiha bibitire, olwohuba obwiire bwiirire,
esiirima sichaakire ohudiira emoni.”
5“Siingire, husiseete mu siro,
mani husihirise amadooho kasyo!”
6Olwohuba Omwaami w'Obunyala aboola ati:
“Muteme emisala kyasyo;
mani muyabe ameena ohwebodoohania Yerusalemu.
Esiko sino sihoyera ohusaandisibwa;
olwohuba sichuule eby'obwaalaba.
7Koti esulo yiliinda amaachi kao malai,
nilwo lu siko esyo siliinda ebyonoono byasyo neende ohusihirira nibyo bi mbulira mu siko esyo.
Obulwaae neende ebikoonjo nibyo biimbona buli ludaalo.
8Ewe Yerusalemu, labuha,
ataali ao njia ohukabuhana naawe;
ataali ao njia ohuhuhola ekuunda,
abuundu yi baandu babula.”
Abaisiraeli Bajeemu
9Omwaami w'Obunyala aboola ati:
“Abadoong'ereo mu Yisiraeli,
bahamalwireo elalira
koti endalo y'emisabbiibbu yi banokeremo ebyaamo;
omunoki haandi akobolamo ohukoonya hu masaga kwakwo.”
10Ndateeba endi: “Wiina mweene onaatekeerese,
niinomanoma ohumulabula?”
Bone, amatwi kaabwe kekaale,
haba sibanyala hutekeeresa;
bone, bacheha-bucheha Emboosi y'Omwaami,
haba sibayisangaalira kata nabudiidi.
11Sakira njichuulemo etima ly'Omwaami;
njoong'ere ohulyesimiirisa.
Omwaami yamboolera ati: “Etima elyo, lichuhe hu baana bali hu ngira,
neende hu basaacha baraaga bebuusire alala boosi.
Abasaacha neende abahasi baabwe bahayirwe,
kata abahuluundu neende abakofu muno haba sibahalehwe daawe.
12Enyuumba chaabwe chaheehole ech'abaandi alala,
neende endalo chaabwe neende abahasi baabwe.
Olw'ohuba ndahakolole omuhono kwaange
ohusaandya abaandu bomu syaalo sino.”
Omwaami niye oboola.
13“Olwohuba ohutulira elalira hu mudiidi mweene ohwoola hu muhunuufu ohiramo,
buli muundu ang'aang'abanira ohunyoola engaanga mu ngira mbi.
Kata abanabbi neende abalaamisi,
bosi baliichaki nibo.
14 #
Esek 13:10. Ebikoonjo by'abaandu baange, babiwonia humukulu hwoong'ene,
mani nibaboola bati, ‘Byoosi biri bulai,’
nae mubwadyeeri bweene, yibulao esilai.
15 #
Yer 8:10-12. Mani esoni chabadiiraho nibaholere eby'omusiro?
Haba daawe, haba sibadiirwa esoni kata nabudiidi.
Haba sibamanyire kata esilaangwa siti ohuwumumala.
Mani sakira bahakwe nasilala neende abo abakwa.
Mu biha bi ndahabasaandisiryemo, eyo niyo eyahabe enjakamo yaabwe,”
Omwaami niye oboola.
Abaisiraeli beekaana engira ya Nasaae
16Omwaami aboola ati:
“Mweeme hu ndulo w'engira neende mu masang'aangira, mani mutingaale.
Muteebe yi ngira hale chali,
neende yi ngira ndai yiri; mani muyikeendereho,
mani munyale ohunyoola omuleembe mu myooyo kyeeng'we.
Nabo nibaboola bati, ‘Haba sihuchia huyikeenderaho.’
17Ao mani Omwaami nabataaho omuliindi, n'aboola ati,
‘Muwulire ekono ly'eturumbete!’
Nabo nibaboola bati, ‘Haba sihuchia huwulira.’
18Eng'we ebyaalo, wulire,
haandi eng'we omukaanda, manye, ebichia ohukwa hu baandu baange.
19Ewe esyaalo wulira; bona, ndi ohuleeta esibi hu baandu bano,
ohweema hu biindu bi babaasa,
olwohuba haba sibatekeeresa emboosi chaange;
haandi bekaanire amalako kaange.
20Obubbaani bu bandeetera ohutula Seebba, buhoonya siina syeene,
oba emikachi kinyunyuula ohutula mu byaalo by'eyale?
Ebiyaanwa byaabwe bisaambwa bi baamberesa, haba siinjia hubifukiirira,
kata sa ohusangaalira ebiyaanwa byaabwe.
21Mani sakira Omwaami aboola ati:
‘Bone, njia ohuba esichihi mu moni w'abaandu bano,
sibachia ohwegumulaangaho mani bakwe aasi.
Abeebusi neende abaana baabwe nasilala,
abeecha neende abasyaabwe bachia ohusihirira.’ ”
Ohuseetwa hutula emukulu
22Omwaami aboola ati:
“Bona, yiriwo abaandu bali ohwiichia nibatula mu syaalo sy'emukulu,
esyaalo sihoongo esitula eyale.
23Bali neende obuyiingo neende amafumo,
Baalaba haandi babula esisa.
Bawoola koti enyaanja yiiyire;
haandi beerusa efaraasi.
Beetekeheere ebiita,
ohulwaania eng'we abaandu bomu Yerusalemu.”
24Abaandu bomu Yerusalemu mani nibaboola bati: “Huwuliire ebidiira hu baandu abo,
mani amahono keefwe nikafwa enakaasi.
Amatiichasi katudiirire,
mani hwaaba mubuchuuni koti omuhasi odaha ohwiibula.”
25Haba sihunyala ohuguma ohutula mu siko hwaachia mu ngoongo,
kata sa hwakeenda hu ngira.
Olwohuba abasuku beefwe badiirire olugaanga,
haandi amasira katwebodohaanie.
26Mani Omwaami n'aboolera abaandu bae ati: “Mwefwaala ebigunia,
mani mwefuufule mu kohe.
Mulirire elalira
koti lu mwahalira omwaana weeng'we mudeerwa,
olwohuba oyo oli ohwiichia ohubasihirisa
yahabakweeho-bukwaaho nimutamanyire.” 27Ese huteereo mu baandu baange obateemeho obone koti lu bali.
28Boosi b'esimyeeni haandi bajeemu nibo,
boomeranu koti esihomo haandi koti echuma.
Bakeende nibaayirisa emboosi,
haandi boosi bahola ebiindu bihyaamu.
29Omuliro kwaaduha muno mu siko,
mani echuma niyisaanguluha.
Yibula obuhoonyi ohulabya abaandu,
olwohuba ababi haba sibamalwamo daawe.
30Balaangwa bati, banaandawulira,
olwohuba Ese Omwaami, mbebwaabire.
Currently Selected:
Yeremia 6: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
