Yeremia 5
5
Esibi sya Yerusalemu
1Abaandu bomu Yerusalemu, mwiiruhe nimweebodoohania engira chomu siko syeeng'we.
Tingaale mwehaliirise.
Koonye mu bituundu byasyo mani mubone
nimwahanyoola hoomo omuundu kata mulala,
ohola ebiluungifu
haandi okoonya obwadyeeri.
Nimunyoolamo, Omwaami achia ohuleheramo Yerusalemu.
2Kata bahaboola bati, “Koti lu Omwaami ali omulamu,”
nae beechuba eby'obubacha sa.
3Ewe Omwaami, abo haba sibabona obwadyeeri?
Obasaandiisye,
nae nibahaya ohweeka.
Obasihiriise,
nae nibahaya ohukololwa.
Bomiirire muno ohuhiraho olwaanda;
mani nibahaya ohweyolobya.
4Naange nimboola endi, “Bano bamanani nibo,
boong'ene nibo abasiru;
olwohuba haba sibamanyire bi Omwaami adaha,
neende bi Nasaae waabwe alagira.
5Njia ohuchia eyiri abahunuufu baabwe
nomanome nabo;
olwohuba bamanyire bi Omwaami adaha
neende bi Nasaae waabwe alagira.”
Nae boosi-boosi nasilala bajeemeere Omwaami,
baahaya ohuwulira ebilagiro byae.
6Mani sakira edalang'i echitula mu bichaha chahatuleyo chibeete,
amabbwe komu siparara kaheeche kabasihirise.
Eengwe chahakeendereenge aambi neende ebiko byaabwe,
mani chahabosyoole-bosyooleenge buli muundu olibitulaangamo;
olwohuba ebyonoono byaabwe biingi nibyo,
haandi batulire muno hu Nasaae.
7Omwaami ateeba ati, “Nyala endye ohubaleheramo?
Abaana beeng'we baandulireho,
haandi beechubiire abo abataali Nasaae.
Ndababeresa buli siindu si badaha,
nae bahaya ohuba abeesikwa
mani nibebuusira mu nyuumba ch'abacheke.
8Bali koti efaraasi saacha echaaywa bulai neende obwekoombi
buli yitulayo yilaluhanira ehasi ye yiindi.
9Ndahahaye endye ohubasaandya hulw'ebiindu bino?
Omwaami niye oboola;
mani ndaahaya ohwetuunga omweene
hu syaalo siri koti sino?
10“Mubite mu ndalo chaabwe ch'emisabbiibbu mani muchisihirise
nae mutachimalirayo elalira.
Mwaakuleho amasaga kachio,
olwohuba haba si kaange niko.
11Olwohuba abaandu bomu Yisiraeli neende abomu Buyudaaya
haba sibabeere abeesikwa yi ndi kata nabudiidi,
Omwaami niye oboola.
Omwaami ajwaang'a Yisiraeli
12Balomaloome eby'obubacha hu Omwaami,
nibaboola bati: ‘Sibulao sya anaahole;
Sibulao esibi sinaatukweeho.
Ebiita oba enjala haba sibichia ohutwoolaho.
13Abanabbi bahabe koti omuyaka sa
yibulao emboosi yitula eyiri Omwaami yibali nayo.
Mani sino syahabakweeho.’ ”
14Mani sakira Omwaami Nasaae w'amaye aboola ati:
“Olwohuba balomaloome batyo,
bona, njia ohuhola emboosi chaange chibe omuliro mu minwa kyaabwe.
Abaandu bano bahabe koti eehwi, mani omuliro okwo kwahabasihirise.
15Bone, eng'we Abaisiraeli,
njia ohuleeta esyaalo sy'eyale sibasihirise,
Omwaami niye oboola.
Abo nibo ab'esyaalo sy'amaani,
haandi esihale,
Esyaalo sy'olulimi lu mutaamanyire,
haandi haba simumanyireho bi balomaloma.
16Boosi basaacha b'amaani,
ebikiingiro by'obusaale byaabwe biri koti eng'ani cheekuha.
17Bahalye emere yeeng'we neende ebyohulya byeeng'we;
baheete abaana beeng'we basyaani neende abaana beeng'we bahaana.
Baheete ebyaayo byeeng'we neende eng'oombe cheeng'we.
Bahanyaase emisabbiibbu kyeeng'we neende emituli kyeeng'we.
Bahasihirise neende engaanga
ebiko byeeng'we bisite bi mweesika.”
18Omwaami aboola ati: “Nae mu ndaalo echo, haba siinjia hubasihirisa mbamalireo elalira.
19Mani abaandu nibaheteebe bati, ‘Lwasiina Omwaami Nasaae weefwe yatuhola ebyo byoosi?’ Mubakobolaangamo muti, ‘Koti lu eng'we mwaandulaho mani nimuhalaabanira banasaae bateende mu syaalo syeeng'we, nilwo lu munahalaabanireenge abaandu bateende mu syaalo sitaali esyeeng'we.’ ”
Nasaae alabula abaandu bae
20Omwaami aboola ati: Sino musiboolere ab'olwiibulo lwa Yakobbo,
musilaangirire eyiri Abayudaaya muti:
21 #
Yis 6:9,10; Esek 12:2; Mrk 8:18. “Wulire sino, eng'we abaandu basiru haandi abatamanya,
abali neende emoni, nae haba sichibona,
abali neende amatwi, nae haba sikawulira.”
22 #
Yob 38:8-11. Haba simutyaaho, Ese Omwaami?
Ndataao omusenye ohuba olwaaho lw'enyaanja,
lu nyaanja yitanyala ohuduuma;
kata efwiinda chahahubba chitye, haba sichinyala ohuunyiingira.
Kata efwiinda chahawoola chitye, haba sichinyala ohukubitaho daawe.
23Nae baandu eng'we, muli ab'emitwe myoomu haandi abajeemu.
Muundulireho, mwaawaao.
24Simwabaasaho mu myooyo kyeeng'we muti,
Lehe hutye Omwaami Nasaae weefwe,
okwiisa efula mu biha byao,
efula y'etoocho neende efula y'esiruumbi,
mani n'ataao ebiha by'ohukesa buli mwaaka.
25Nae ebyonoono byeeng'we nibyo ebitusireo ebiindu bino,
nibyo ebibakayiire ohunyoola ebiindu bilai bino.
26Mu baandu baange mulimo abahola-mbi.
Beetekeha koti abateki b'amayoni.
Bateka omuteego;
ohudiira abaandu.
27Koti olutaanda lw'omuyiimi lwaheechula amayoni,
nilwo lu beechusa enyuumba chaabwe neende ebiindu bi banyakire.
Sakira beehola abaandu bahunuufu haandi abayiinda,
28sakira bahomeere mani baanyirira.
Ebiholwa byaabwe bibi bibula enjakamo;
baheenga omusaango ataali obwadyeeri
haba sibadeeba hu bamulehwa
haandi sibakayirira abo abafwiinyirirwa.
29Omwaami ateeba ati: “Mubaasa muti ndahahaye ohubasaandya hulw'ebiindu bino?
Haandi mubaasa muti haba siinjia ohwetuunga omweene
hu syaalo siri koti sino?”
30Esiindu si tiisa haandi esisiindusa
syeholeehe mu syaalo muno:
31abanabbi balaanga eby'obubacha,
haandi abalaamisi batuka koti abanabbi lu babalagira;
mani abaandu baange baahaya ohusiyiingania daawe.
Nae siina syeene si mwahahole enjakamo niyoolere?
Currently Selected:
Yeremia 5: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
