Yeremia 51

Bbabbilooni siheengerwa emisaango kiindi

1Omwaami aboola ati:

“Bone, njia ohusiingisa omuyaka kusihirisa

mu Bbabbilooni

neende hu baandu basyo.

2Njia ohusiindiha abateende Bbabbilooni basisihirise

koti lu muyaka kudumuula ebikoha.

Oludaalo lw'amasira olwo nilwahoole,

bahaseete esyaalo esyo hu buli mbeka mani nibasireha nisitaalimo esiindu syoosi.

3Mutaleha abasikaari basyo ohulasa obusaale,

mutaleha befwaala ehuumba chohu birifu.

Mutawonia abaraaga bamwo;

musihirisire elalira eye lyasyo.

4Bachia ohufumitwa bafwiire mu syaalo sy'Abakalidaaya,

banyaalihiire mu ngira chasyo.

5Olwohuba Ese Omwaami, Nasaae w'Amaye

haba sindebwaaba abaandu ba Yisiraeli neende aba Buyudaaya;

nae esyaalo sy'Abakalidaaya syonoona

eyiri Omwoolerefu wa Yisiraeli.

6“Mwiiruhe mutule mu Bbabbilooni,

leha buli muundu awonie obulamu bwae.

Muteetwa hulw'esyonoono sya Bbabbilooni,

olwohuba bino nibyo ebiha by'Omwaami ohwetuunga,

haandi achia ohusaandya esiko koti lu sihoyerwa.

7 # Hubwi 17:2-4; 18:3. Bbabbilooni syali koti esikoombe sy'esaabbu mu mahono k'Omwaami,

esyamesaanga esyaalo syoosi.

Ebyaalo byang'wechaanga amalwa kasyo

sakira byalaluhaanga.

8Bbabbilooni sikwiire bwaangu muno mani sisihiriire.

Musirire!

Musinyoolere amalesi olw'obuchuuni bwasyo;

awuundi siinyala ohuwona.

9 # Hubwi 18:5. Abateende bamenyamo baboola bati, ‘Hwahawoniisye Bbabbilooni,

nae haba si siwonere.

Leha husitulemo, mani buli muundu akobole

mu syaalo syaabwe;

olwohuba Nasaae asaandiisie Bbabbilooni muno

mani asisihirisire elalira.’ ”

10Omwaami aboola ati: “Abaandu baange bahuumula nibaboola bati, ‘Omwaami yekeese koti lu huli abadyeeri;

lehe huchie huboolere abomu Siyooni

ebiindu bi Omwaami Nasaae weefwe bi aholere.’ ”

11Yakale osaali!

bukule engabo!

Omwaami abwaanire omuliro mu batuki ba Media, hulw'esichiririrwa syae esy'ohusihirisa Bbabbilooni. Eyo niyo engeri yi Omwaami achia ohwetuunga esyaalo esyo olw'ohusihirisa Enyuumba yae yohwiinamiramo.

Abeemeresi b'eye liseeta balagira bati:

12Yanihe ebbeendera hu bida bya Bbabbilooni;

Mwomiise abaliindi;

muteeo abahemeresi;

mani mutekehe abanaasikweeho.

Olw'ohuba Omwaami yosereese

bi yaboola ohuhola hu baandu bomu Bbabbilooni.

13 # Hubwi 17:1. Ewe esyaalo siri neende emyaalo miingi,

neende eby'obuyiinda biingi,

enjakamo yao yoolere,

olusya lw'obulamu bwao luhaliihe.

14Omwaami w'Obunyala omweene niye owechubire ati:

Mubwadyeeri bweene, ndahaleete abasaacha baangi koti esike ohuseeta Bbabbilooni,

mani bahahubbe olwaayu nibayingiire.

Olweembo lw'ohukinia Omwaami

15Omwaami niye owaloonga esyaalo neende obunyala bwae,

niye owataao esyaalo neende amakesi kae,

haandi neende ohumanya hwae

yabaamba ekulu.

16Naatusa omunwa, ni amaachi kali aakulu muukulu kawoola.

Abuusa alala ebireesi ohutula hu nyaande choosi echohu syaalo.

Akera olumyesu lwaaduha efula niyikwa.

Haandi yatuma omuyaka ohutula mu sibiihiro syae.

17Abaandu boosi basiru haandi sibulao sibamanyire.

Abetaanyi b'ebiloongaloongwe bibeenamira esoni chibadiira,

olwohuba ebiloongaloongwe bi bahola by'obubacha,

haandi bibulamo obulamu.

18Bibula neende obuhoonyi, by'obubacha buhaya.

Ebiha byabyo byohu saanda nibyahoole, birisihiriswa.

19Nasaae wa Yakobbo saali koti ebyo,

olwohuba Niye owaloonga buli siindu.

Niye owaloonga Abaisiraeli ohuba abaandu bae.

Omwaami w'Obunyala, nilyo eliita lyae.

Enyuundo y'Omwaami

20Omwaami aboola ati: “Bbabbilooni, oli enyuundo yaange, haandi niiwe ebilwaaniso byaange:

niiwe yi njia ohwehoonyera ohufunaka ebyaalo mu bituundu-tuundu;

niiwe yi njia ohwehoonyera ohusihirisa obwaami.

21Niiwe yi njia ohwehoonyera ohufunaka-funaka efaraasi neende abeerusi baacho.

Niiwe yi njia ohwehoonyera ohufunaka-funaka ebigaari neende abeerusi babyo.

22Niiwe yi njia ohwehoonyera ohwiita abasaacha neende abahasi;

niiwe yi njia ohwehoonyera ohwiita abakofu neende abaraaga;

niiwe yi njia ohwehoonyera ohwiita abasyaani neende abahaana.

23Niiwe yi njia ohwehoonyera ohwiita abaayi neende ebyaayo byaabwe;

niiwe yi njia ohwehoonyera ohwiita abalimi neende eng'oombe chaabwe chirima;

niiwe yi njia ohwehoonyera ohufunakan-funaka bagafana neende abeemeresi baabwe.”

Esinyaaso sya Bbabbilooni

24Omwaami aboola ati: “Mulibona koti lu njia ohwetuunga hu Bbabbilooni neende Abakalidaaya boosi olw'ebibi byoosi bi bahola mu Siyooni.

25“Bbabbilooni, oli koti olugulu lusihirisa,

olugulu lusihirisa esyaalo syoosi.

Nae Ese Omwaami njia ohuhulwaania,

njia ohuhufuufula hu loba,

mani huhole obe ekohe sa.

26Haba sibahahutuse ekina ly'esoonda

haandi libulao ekina ly'omusiingi libahahutuseho.

Nae ochie ohuba ekuunda endaalo choosi.

Omwaami niye oboola.

27“Yanihe ebbeendera hu syaalo,

hubbe eturumbete mu byaalo,

tekehe ebyaalo ohulwaania Bbabbilooni.

Laange obwaami bwa Araraati, Mini neende Asikenaasi,

ohuseeta Bbabbilooni.

Doole omuhoongo oneemirire ohusiseeta.

Leete efaraasi nyiingi koti ebidiiyiha by'esike.

28Tekehe ebyaalo ohulwaania Bbabbilooni.

Laange abatuki ba Media, neende bagafana baabwe neende abo ababaloondereraho,

neende buli syaalo siri mu butuki bwaabwe. 29Esyaalo sitengereha nisichuule obuchuuni,

olwohuba Omwaami achia ohwooseresa esichiiririrwa syae hu Bbabbilooni,

achia ohuhola Bbabbilooni sibe ekuunda,

omubula omuundu kata mulala.

30Abalwaani ba Bbabbilooni b'amaani baakaame ohulwaana,

badoong'ere mu madaala kaabwe masite.

Amaani kabaweeremo,

bali koti abahasi.

Ebiruwa by'esiko bifunaakwe,

enyuumba chasyo chaadusweho omuliro.

31Omwiiruhi mulala yeeruha ohuchia ohubukaanana neende owuundi,

haandi wamwaanda mulala ohubukaanana neende owuundi,

ohuchia ohuboolera omutuki wa Bbabbilooni

koti lu siko syae sifunaakwe hu buli lwaande.

32Abasuku baambire edaracha choosi,

haandi ebiko bisite babibwaanireho omuliro,

mani abasikaari bakwiiremo oluteengo.

33Olwohuba Omwaami w'Obunyala, Nasaae wa Yisiraeli aboola ati:

Abaandu bomu Bbabbilooni bali koti engaano mu sihubbakiro

mu biha by'ohuubbaka;

nae mu biha bidiidi

nae ebiha by'ekesa nibyoola.”

34Nebukadineesa omutuki wa Bbabbilooni yaheenga-heenga Yerusalemu,

mani nasinyonyoobola.

Syoomya esiko syaaba koti esyoongo.

Syehola koti esinamiindi mani n'asimira.

Syayira buli siindu silai si syadoolamo,

ebyo ebyadoong'ao bi sitadaha syabisukuna eyale.

35Lehe abomu mu Siyooni baboole bati:

“Obwaalaba bwatuholwaho bukobolere Bbabbilooni!”

Lehe abomu Yerusalemu baboole bati:

“Amabaanga k'abaandu beefwe akeediha kakobolere Abakalidaaya.”

Nasaae yahahoonye Yisiraeli

36Mani sakira Omwaami aboola ati:

“Bone, njia ohubalwaanira haandi ndetuunge hulweeng'we.

Ndahahamye enyaanja y'abasuku beeng'we

haandi ndahahamye esulo chaabwe ch'amaachi.

37Mani Bbabbilooni syaheehole esituuli sy'ebikoha,

abuundu yi mabbwe kamenyamo,

esitiisa neende esiwukisa,

abuundu ataaliwo abaandu.

38“Abakalidaaya bahawoole koti edalang'i;

haandi bahawuume koti edalang'i njere.

39Koti lu bali neende okuliira, njia ohubatekehera esidyaalo,

mani njia ohubang'weesa bameere ohwoola lu bahasangaale.

Baheeyalise mani bahaye ohusimuha daawe.

40Njia ohubayira beetwe koti amakoondi madoto,

koti emiiku neende ehole.

Ese Omwaami, Niise oboolere.”

Ebyahakwe hu Bbabbilooni

41Omwaami alomaloma ebidiira hu Bbabbilooni ati:

“Esiko syafumwa hu syaalo syoosi, siwaambirwe.

Bbabbilooni syeeholere ekuunda

esitiisa mu moni w'ebyaalo biindi.

42Enyaanja yihulukuuse hu Bbabbilooni;

yichuuleho amafwiinda.

43Ebiko byasyo byeeholere esitiisa,

esyaalo sy'esminyu neende esiparara omutaali amaachi,

esyaalo si baandu batamenyamo,

haandi si muundu atanyala ohubitamo.

44Njia ohusaandya Beeli, nasaae wa Bbabbilooni,

mani mukoboseyo yi yali hale.

Ebyaalo haba sibyaheechie yaali ohumwiinamira.

Ebida bya Bbabbilooni bikwiire.

45“Abaandu ba Yisiraeli, yiiruhe mutuleo.

Lehe buli muundu awonie obulamu bwae

ohutula eyiri etima ly'Omwaami lyaalaba.

46Mutawaamo omwooyo daawe, haandi mutatya

hulw'emboosi chi muwulira mu syaalo,

olwohuba buli mwaaka

mwahanyoole emboosi chitaali nasilala,

ech'obwaalaba mu syaalo

neende ech'omutuki olwaania omutuki wuundi.

47“Mani sakira bone, ebiha byahoole

mani saandye ebiloongaloongwe byomu Bbabbilooni bibeenamira;

esyaalo syoosi syahadiirwe esoni,

mani abaandu bamwo boosi baheetwe.

48 # Hubwi 18:20. Mani ekulu neende esyaalo

neende ebiindu byoosi ebibirimo

byaheembe olw'esangaalo Bbabbilooni nisisihiriiswe;

olwohuba abaandu bahasisihirise bahatule emukulu.

Ese Omwaami, Niise oboolere.

49 # Hubwi 18:24. Bbabbilooni syeeta abaandu bomu syaalo syoosi.

Mani bulaanu syohusihiriswa hulw'ohwiita Abaisiraeli baangi.”

Omulaanga kwa Nasaae eyiri Abaisiraeli abali mu Bbabbilooni

50Omwaami aboolera abaandu bae abali mu Bbabbilooni ati: “Muwonere ohwiitwa,

bulaanu muchie, mutaliinda daawe!

Kata amwahaba eyale neende engo weeng'we, nae muunjichuliseenge, Ese Omwaami,

mani lehe mubaase hu Yerusalemu.

51Muboole muti: ‘Hwachaalaasania mani nihudiirwa esoni,

hwamalwamo oluyaali,

olwohuba abaandu bateende beecha

mani beengira Abuundu Awoolerefu awomu nyuumba y'Omwaami.’

52“Mani sakira, bone, ebiha byahoole,

bi njia ohuheengera ebiloongaloongwe byomu Bbabbilooni omusaango,

neende mu syaalo esyo syoosi

esiriho ebikoonjo syahalire.

53Kata Bbabbilooni asyaheniinia ohwoola hu kulu,

haandi kata asyahoombaha sitye ebida by'amaani,

nae njia ohusisiindihaho abasihirisi.

Ese Omwaami, Niise oboolere.”

Ebiindi bidiira hu husihiriswa hwa Bbabbilooni

54Omwaami aboola ati: “Tekeerese! Amaliro ohutula mu Bbabbilooni!

Embuungu ch'ohusihirira hw'amaani ohuli mu syaalo sy'Abakalidaaya!

55Olwohuba Omwaami ali ohusihirisira elalira Bbabbilooni,

neende ohusinyisira elalira.

Amaye kasyo kawoola koti efwiinda ch'amaachi maangi,

haandi kasiseeta nikayokera.

56Olwohuba omusuku yeechere

ohusihirisa Bbabbilooni.

Abasikaari byasyo b'amaani bawaambire,

obuyiingo bwaabwe bufunaakwemo ebituundu-tuundu.

Olwohuba Ese ndi Nasaae owetuunga esibi,

mani njia ohwetuunga hu Bbabbilooni koti lu sihoyerwa.

57Njia ohung'weesa abachweenufu bamwo abasaacha neende abahasi mani bameere,

bagafana basyo, abeemeresi basyo, neende abasikaari b'amaani basyo.

Baheeyalise endoolo ch'amaani mani bahaye ohusimuha.

Ese Omutuki, Omwaami w'Obunyala, Niise oboolere.”

58Omwaami w'Obunyala aboola ati:

“Ebida bya Bbabbilooni by'amaani

byahakwiiswe aasi hu loba

neende ebiruwa byasyo bileeyi

byahasaambwe omuliro.

Abaandu badidiihanira buhaya,

haandi ebiindu bi byaalo bihola byahasaambwe omuliro.”

Emboosi ya Yeremia yitumwa mu Bbabbilooni

59Omuhalaabani owabechaanga aambi muno neende omutuki Sedekia, yali Seraya, omwaana wa Neria, haandi omwiichuhulu wa Mahiseya. Mu mwaaka kwohune okw'obutuki bwa Sedekia omutuki wa Buyudaaya, Seraya niyali naachia Bbabbilooni alala neende Sedekia, mani nimbaaho neende ebiindu bi mulagira. 60Ao niyaandiika mu sitabo ebiindu byoosi ebichia ohukwa hu Bbabbilooni, neende ebiindu biindi byoosi ebidiira hu Bbabbilooni. 61Mani nimboolera Seraya endi: “Niwoola Bbabbilooni, bona oti osoma emboosi chino choosi, 62mani oboole oti, ‘Ewe Omwaami, wamboolera ebidiira hu situundu sino oti wahabasihirise, mani bahaye ohudoong'aho mu situundu sino, abaandu noomba ebisolo, bube ekuunda endaalo choosi pe.’ 63#Hubwi 18:21.Mani niwahabe noomalire ohusoma esitabo sino, siboyeho ekina osisukune akatikaati w'Omwaalo kwa Eufuraate, 64mani oboole oti: ‘Luno nilwo lu Bbabbilooni syahebire, haandi sisyahatuumbuhe ehabi liindi, olw'ohusihirira hu Omwaami yahasikwiiseho.’ ”

Emboosi cha Yeremia ano niyo yichakaame.

Currently Selected:

Yeremia 51: SAMIA

Highlight

Copy

Compare