Yeremia 52

Ohukwa hwa Yerusalemu

(2 Abat 24:18—25:7)

1Sedekia yachaaka ohutuka Buyudaaya naali neende emyaaka amahumi kabiri neende mulala eky'obuhuluundu, mani naatukira mu Yerusalemu embaka y'emyaaka ehumi neende mulala. Eliita lya ng'ina lyali Hamutaali. Omuhaana wa Yeremia owa Libbina. 2Mani Sedekia niyonoona mu moni w'Omwaami, ohuchianakana neende ebyo byoosi bi Yehoyakimu yali naaholere. 3Omwaami yanyoolerera muno abaandu bomu Yerusalemu neende abomu Buyudaaya, mani n'abasukuna ohutula mu moni wae.

Mani Sedekia najeemera omutuki wa Bbabbilooni. 4#Esek 24:2.Ao mani mu mwaaka kwa chitaanu-na-chine, okw'obutuki bwa Sedekia, mu mwoosi kw'ehumi, hu ludaalo lw'ehumi lw'omwoosi, Nebukadineesa, omutuki wa Bbabbilooni mani niyeecha neende eye lyae lyoosi ohuseeta Yerusalemu. Mani nasyebodoohya syoosi, nasiyabaho obuko eyaande choosi ohusyebodoohania. 5Mani esiko nisidoong'a nisyebodoohaanie ohwoola hu mwaaka kw'ehumi neende mulala okw'obutuki bwa Sedekia 6Mani hu ludaalo lwa chitaanu-na-chine, olw'omwoosi kwohune, enjala y'amaani yakwa mu siko, mani abaandu nibahaywa esyohulya. 7#Esek 33:21.Mani abaandu nibadomola esituli mu sida sy'esiko. Kata Abakalidaaya bali nibebodoohaanie esiko syoosi, abasikaari boosi beeruha mani nibatula mu siko esiro, nibabitira hu ngira y'endalo y'omutuki, mani nibatulira hu siruuwa siri akatikaati w'ebida bibiri. Mani nibachiira olwaande lw'Ehooho lya Yorodaani. 8Nae eye ly'Abakalidaaya nilyoonga hu mutuki Sedekia, mani nilimwolaho naali mu sipaapi sya Yeriko; mani eye lyae lyoosi nilimutulaho, nilisalaana. 9Mani nibawaamba omutuki Sedekia, nibamuyira eyiri omutuki Nebukadineesa mu Ribbila mu situundu sya Hamati, mani Nebukadineesa n'amuheengera omusaango. 10Nebukadineesa niyeeta abaana ba sedeekiya babiri n'abona, haandi niyeetera Ribbila abachweenufu ba Buyudaaya boosi. 11#Esek 12:13.Mani n'achomola mu Sedekia emoni, n'amuboya eminyororo, mani omutuki wa Bbabbilooni naamuyira Bbabbilooni, n'amuta mu jeela ohwoola hu ludaalo lu yafwiiraho.

Ohusihirirwa Hwa Yerusalemu.

(2 Abat 25:8-17)

12Mu mwoosi kwohutaanu, hu ludaalo lw'ehumi lw'omwoosi okwo, okwo kwali omwaaka kw'ehumi-na-chitaanu-na-chine okw'obutuki bwa Nebukadineesa, omutuki wa Bbabbilooni, Nebbusaradaani, omuwi wae w'amakesi haandi omuhoongo w'abaliindi bae, mani niyeengira mu Yerusalemu. 13#1 Abat 9:8.N'asaamba enyuumba y'Omwaami, edooho ly'omutuki neende enyuumba choosi echomu Yerusalemu. Buli nyuumba hoongo yoosi yasaambwa omuliro. 14Mani eye ly'Abakalidaaya lyoosi elyali nae, nibafunaka ebida byali nibyebodoohaanie Yerusalemu. 15Mani Nebbusaradaani omuhoongo w'abaliindi n'ayira mu jeela balala hu baandu bahiramo obumanani neende abaandu baandi boosi abali nibadoong'ere mu siko, neende abo abali nibeweereyo eyiri omutuki wa Bbabbilooni, alala neende abachweenufu bali nibadoong'ereo. 16Nae Nebbusaradaani naaleha abamanani baandi bomu syaalo, ohuhehetaanga emisabbiibbu, neende ohuchirimaanga.

17 # 1 Abat 7:15-47. Abakalidaaya nibayaaya esiiro ch'ebihomo, echali mu nyuumba y'Omwaami, neende ebiteeni, neende etaangi ly'esikomo ebyali mu nyuumba y'Omwaami, nibayira ebikomo byoosi Bbabbilooni. 18Mani nibayira neende endamu, neende ebitiiyo, neende ebibiihiro by'ekohe, neende ekaraaya, neende enuungiro chibaniooheseraangamo obubbaani, neende ebiindu by'omugasa byoosi bi beehoonyeraanga mu nyuumba ya Nasaae. 19Bakiinga neende ebbakuli ndiidi, neende ebifulya bibakiingiraho omuliro, neende ekaraaya, neende endamu, neende ebiteeni by'amataara, neende enuungiro chibaniooheseraangamo obubbaani. Buli siindu sy'esaabbu, omudumi mani nasiyira ohuba esaabbu, haandi buli siindu sy'efeesa, mani nasiyira ohuba efeesa. 20Nae ebiindu by'ebikomo bi Omutuki Solomooni bi yali naaholeere enyuumba y'Omwaami: esiiro chibiri, ebigaari, etaangi hoongo, neende esurusi ch'omugasa ehumi neende chibiri echabisiira, omugasa kw'ebiindu bino kwali omusito muno okutanyala hupiimwa daawe. 21Nae esiiro choombi chali nichaakana-kana. Obuleeyi bw'esiro ndala bwali emiita kabiri-na-chitaanu-na-chidatu, emiita chitaanu neende otutoonyese tudadatu (5.3) ohuyebodoohania. Esiiro chalimo eliina, mani obuhoongo by'esyuuma bwali emiilimita amahumi kataanu-na-kabiri neende chitaanu. 22Hu buli siiro hwaliho omutwe, obuleeyi bw'omutwe k'ebikomo, kwali emiita chibiri neende otutoonyese tubiri (2.2) Buli mutwe kwaliho ebihomo kwasaatwa bulai muno. Haandi esiiro yohubiri yaliho ebiindu nasilala, neende ohusarwa nasilala. 23Nae muumbafu cha buli siiro hwali nihwasatwa amahabi amahumi kataanu-na-kane neende chisaasaba, ohwali nihubonehana ohutula aasi.

Abaandu bomu Buyudaaya bayirwa Bbabbilooni

(2 Abat 25:18-21,27-30)

24Mani Nebbusaradaani, omuhoongo w'abaliindi b'omutuki n'ayira Seraya omulaamisi muhuluundu, neende Sefaniya omulami oloondereramo mu buhuluundu, neende abaliindi bahunuufu baandi badatu. 25Mani naatusa mu siko omuhoongo yali niyeemerera abasikaari, neende abasaacha bataanu-na-babiri ababechaanga omutuki amakesi, abali nibasisiiri mu siko; neende oyo oloondereramo mu hweemerera amaye, eyandiikaanga abaandu mu maye, neende abachweenufu bomu syaalo baandi amahumi kasaasaba. 26Mani Nebbusaradaani omuhoongo w'abaliindi naabayira eyiri omutuki wa Bbabbilooni owali naali Ribbila. 27Mani omutuki wa Bbabbilooni n'abahuya, mani nabeetera Ribbila, mu situundu sya Hamati. Mani abaandu bomu Buyudaaya nibakiingwa ohutula mu syaalo syaabwe nibayirwa mu jeela.

28Buno nibwo obuungi bw'abaandu ba Nebukadineesa yayira mu jeela: mu mwaaka kwa hataanu-na-habiri okw'obutuki bwae, yayira Abayudaaya, elifu chidatu neende amahumi kabiri-na-badatu (3,023). 29Mu mwaaka kwa hataanu-na-hadatu okw'obutuki bwae, yayira Abayudaaya emia chitaanu-na-chitaanu-na-chidatu neende amahumi kadatu-na-babiri (832) ohutula mu Yerusalemu. 30Mu mwaaka kw'amahumi kabiri-na-chidatu, Nebukadineesa, neende Nebbusaradaani omuhoongo w'abaliindi b'omutuki, bayira mu jeela Abayudaaya emia chitaanu-na-chibiri neende amahumi kane neende bataanu (745). Abaandu boosi alala abayirwa mu jeela bali elifu chine neende emia chisaasaba (4,600).

31Mu mwaaka kw'amahumi kabiri-na-chidatu kw'obuboye bwa Yehoyakini omutuki wa Buyudaaya, mu mwoosi kw'ehumi-na-chibiri, hu ludaalo lw'amahumi kabiri-na-chitaanu olw'omwoosi okwo, Efilimerodaki yeehaswa ohuba omutuki wa Bbabbilooni, yakwiira esisa Yehoyakini omutuki wa Buyudaaya, mani yamulehuula ohutula mu jeela. 32Efilimerodaki mani n'alomaloma bulai hu Yehoyakimu, nabuberesa esisaala sy'oluyaali ohuhira abatuki baandi ba yali nabo mu Bbabbilooni. 33Ao mani Yehoyakini niyefwaalulamo engubo chae ch'obuboye. Buli ludaalo yalichaanga hu meesa y'omutuki endaalo ch'obulamu bwae choosi. 34Embaka y'obulamu bwae yoosi, Yehoyakini yanyoolaango omukabo kw'ebiindu bi adaha buli ludaalo.

Currently Selected:

Yeremia 52: SAMIA

Highlight

Copy

Compare