Yeremia 50
50
Ohuwaambwa hwa Bbabbilooni
1 #
Yis 13:1—14:23; 47:1-15. Yino niyo emboosi yi Omwaami yaamberesa eyidiira hu Bbabbilooni, neende hu baandu basyo:
2Yaalira ebyaalo emboosi haandi obalaangirire.
Taao ebipaande mani olaangiirire,
otabakisaho esiindu syoosi daawe, mani obaboolere oti:
“Bbabbilooni siwaambirwe,
owali nasaae wasyo esoni chimudiirire.
Merodaki nasaae wasyo akuchumbuuhe.
Ebifwaanani byasyo
neende ebiloongaloongwe biindi ebiinamirwa binyonyoboolwe.
3“Olwohuba esyaalo situlire emukulu ohuseeta Bbabbilooni. Esyaalo esyo sichia ohuhola Bbabbilooni sibe ekuunda, mani abaandu neende ebisolo biiruuhemo, abuleo omuundu kata mulala owusimenyamo.”
Ohukobola hwa Yisiraeli
4Omwaami aboola ati: “Ebiha ebyo nibyahoole, abaandu bomu Yisiraeli neende abaandu bomu Buyudaaya baheeche nibalira amasika, nibakoonya Omwaami Nasaae waabwe. 5Bahateebe yi ngira yichia Siyooni yiri, mani badiire engira eyo nibaboola bati, ‘Mwiiche, lehe hwomiirire hu Omwaami, huhole nae Endagaano y'endaalo choosi eyitaheebirirwe daawe.’
6“Abaandu baange bali koti amakoondi ka baayi baako bakoseere mu ngulu. Badikaana nibatula hu lugulu lulala ohwoola hu luundi, mani nibeebirira engo waabwe yi biri. 7Abo boosi ababanyoola babaseeta, haandi abasuku baabwe baboola bati, ‘Sibulao esibi si huholere, olwohuba nibo abahola-mbi mu moni w'Omwaami, yi bakuuka yaabwe beesikaanga, haandi yi beene bahomiirireho.’
8 #
Hubwi 18:4. “Eng'we Abaisiraeli, mwiiruhe mutule mu Bbabbilooni. Mutule mu syaalo sy'Abakalidaaya. Mube abaamberi ohusitulamo. 9Olwohuba, bone, njia ohusiingisa mani ndeete omukaanda kw'ebyaalo by'amaani ohutula mu syaalo sy'emukulu biiche bilwaanie Bbabbilooni. Baheyaanje ohulwaania esyaalo esyo mani basiwaambe. B'esabba muno mu hulasa obusaale. 10Esyaalo sy'Abakalidaaya syahanyakwe. Mani abahasinyake bayaaye buli siindu si badaha syoosi. Ese Omwaami, Niise oboolere.”
Ohukwa hwa Bbabbilooni
11Omwaami aboola ati: “Eng'we abanyaka esyaalo syaange,
musangaala haandi mweehoya,
nimusinyuhuula koti eng'oombe chiwuula emere,
haandi mwaasihwehweesa koti efaraasi ch'amaani.
12Nae esiko syeeng'we sihuluundu syahaloongoyaswe,
mani esyo esyabeebula syahadiirwe esoni.
Bone, esyaalo syeeng'we nisyo esyahamaliiriheyo mu byaalo byoosi.
Syaheehole esyomu haandi esiparara sibulamo amaachi.
13Ohweema hu tima lyaange, esyaalo syeeng'we sisyahabeemo omuundu kata mulala,
nae syahabecheenge ao koti ekuunda.
Buli muundu wahabiteengee mu Bbabbilooni yahawukeengeho sa,
mani yesiinduha ohubona ebisikwiireho.
14Eng'we mweesi abalasa obusaale,
mweyaanje enyiriri mani mulwaanie Bbabbilooni;
musilase obusaale bweeng'we bwoosi,
olwohuba syonoona mu moni w'Omwaami.
15Musihuumulireho hu buli lwaande,
Bbabbilooni simalire ohusiingisa amahono.
Ebiko byasyo bimalire ohukwa,
ebida byasyo bilikuulwe.
Olwohuba ndi ohwetuunga hu Bbabbilooni.
Musyetuunge,
Mubahole esyo si baholera abaandu baandi.
16Mumale mu Bbabbilooni buli muundu otaaka emwo,
neende buli muundu odiira engeso mu biha by'ekesa.
Olwohuba buli muundu alitya olugaanga lw'oyo oseetere,
ao mani buli muundu alikobola eyiri abaandu bae,
haandi buli muundu aliiruha naakobolayo ewaabwe.”
Ohukobola hw'Abaisiraeli
17Omwaami aboola ati: Abaisiraeli bali koti amakoondi ka edalang'i yiiruuse, mani nikasalaana. Omutuki wa Asiria niye owachaaka ohubaluma, nae bulaanu Nebukadineesa, omutuki wa Bbabbilooni ali ohumenena amakuumba kaabwe. 18Mani sakira Omwaami w'Obunyala, Nasaae wa Yisiraeli aboola ati: “Njia ohusaandya Nebukadineesa, omutuki wa Bbabbilooni neende esyaalo syae, koti lu ndasaandya omutuki wa Asiria. 19Njia ohukobosayo Abaisiraeli mu syaalo syaabwe. Balirya ebyohulya ebyalimwa hu lugulu lwa Karimeeli neende mu bituundu bya Bbasani. Haandi bahalya nibekuta ebyohulya byalimwa hu ngulu cha Efuraimu neende mu bituundu bya Gileadi. 20Ebiha ebyo nibyahoole, bahakoonye abahola-mbi mu Buyudaaya, mani bahaye ohubanyoolamo, esyonoono haba sisyahabe mu Buyudaaya. Olwohuba njia ohuleheramo abo ba ndahawonieo baaba abalamu. Ese Omwaami, Niise oboolere.”
Nasaae aheengera Bbabbilooni omusaango
21Omwaami aboola ati: “Museete esyaalo sya Merataimu
haandi museete abaandu ba Pekodi.
Mubeete, haandi mubasihirisire elalira.
Mubahole buli siindu si mbalagira.
Omwaami niye oboola.
22Ohuhuumula hw'ebiita huwuliirihana mu syaalo syoosi,
neende ohusihirira hw'amaani.
23Bbabbilooni, nyuundo yahomololaanga esyaalo syoosi,
bulaanu syosi sihomoloolwe.
Ebyaalo byoosi byesinduuhe
hulw'ebyo ebikwiire hu Bbabbilooni.
24Ewe Bbabbilooni, odiirirwe mu muteego ku ndahuteka,
nae haba s'obeere noosimanyireho daawe.
Wichuhaane sa nodiirirwe,
olwohuba obeere n'alwaania Omwaami.
25Njikuuleo esibiihiro sy'ebilwaaniso byaange,
haandi mbitusireo ninjalaabe,
olwohuba Ese Omwaami Nasaae w'Obunyala ndi neende omulimo ku njia ohuhola
mu syaalo sy'Abakalidaaya.
26Musiseete nimutulira hu nyaande choosi;
mwiikuleo ebyaaki byasyo byoosi.
Mubuungihe alala engaano yi munyakire, mani musihirisire elalira esyaalo esyo.
Sibuleo esiindu syoosi si mulehahoomo.
27Yite abasikaari basyo boosi,
lehe batemaateemwe.
Chibaakaanire, olwohuba oludaalo lwoolere,
ebiha byohu saanda hwaabwe.”
28Bone! beeruha mani nibeeyiba ohutula mu syaalo sya Bbabbilooni, nibachia mu Siyooni ohuboola koti Omwaami Nasaae weefwe yetuungira hulw'ebyo, ebyaholehana hu Nyuumba yae yohwiinamiramo.
29 #
Hubwi 18:6. Mubuuse alala abamanyirifu mu hulasa obusaale boosi, mani baseete Bbabbilooni. Lehe basyebodoohanie, mani abuleo omuundu kata mulala owiiruha ohweewonia. Musyetuunge ohuchianakana neende ebiholwa byasyo, musihole ohuchianakana neende bi syahola. Olwohuba syehuduumbasiire hu Omwaami, Omwoolerefu wa Yisiraeli. 30Mani sakira abasaacha baraaga basyo baheeterwe mu ngira chasyo, haandi abasikaari basyo boosi bahasihirisirwe hu ludaalo olwo. Ese Omwaami, Niise oboolere.
31Bbabbilooni, wehuduumbasaanga.
Bona, koti Ese Omwaami w'Obunyala hulwaania.
Olwohuba oludaalo lwoolere,
ebiha by'ohuhusaandya.
32Ewe owehuduumbasaanga, waheegumule okwe aasi,
mani abuleo ohusiingisa.
Njia ohuyaambya omuliro hu biko byao,
mani kusaambe ebiindu bihwebodohaanie boosi.
33Omwaami w'Obunyala aboola ati: “Abaandu bomu Yisiraeli neende abaandu bomu Buyudaaya abali nabo, bafwiinyirirwa. Abo boosi ababawaamba babahayiraho, haba si badaha ohubalehuula baweeo. 34Nae oyo owahabanunule w'amaani niye. Eliita lyae nilyo Omwaami w'Obunyala. Oyo omweene niye owahabalwaanire, mani aleete omuleembe hu syaalo, nae yahakere abaandu bomu Bbabbilooni beeyendeherera.”
35Omwaami aboola ati:
Abakalidaaya lehe bafwe,
neende abo abamenya mu Bbabbilooni,
neende abamanyirifu baabwe alala neende abakesikesi bamwo.
36Abanabbi bamwo bobubacha
leha beehole abasiru, bafwe.
Leha abasikaari bamwo b'amaani bafwe,
mani basihirire.
37Musihirise efaraasi chamwo neende ebigaari byamwo.
Mani abasikaari bamwo bapaangise,
lehe batye koti abahasi, mani beetwe.
Musihirise obuyiinda bwasyo bwoosi
mani muyaaye emyaandu kyamwo.
38Leha esiminyu sibeeo
mani emyaalo kyamwo kihamemo amaachi.
Olwohuba abaandu bamwo beenamira ebiloongaloongwe,
haandi ebiloongaloongwe byabalalusa.
39 #
Hubwi 18:2. Mani sakira mu Bbabbilooni, ebisolo biteende byahamenyemo alala neende eng'u, neende ewudo. Mani abaandu haandi sibahamenyemo endaalo choosi. 40#Huc 19:24,25.Koti lu Nasaae yasihirisa Sodomu neende Gomora neende ebiko byabyebodoohania byoosi, mani abulao omuundu wahamenye mu Bbabbilooni. Omwaani niye oboola.
41“Bone, abaandu bali ohutula emukulu;
esyaalo sy'amaami neende abatuki baangi
bahatule mu byaalo by'eyale muno.
42Badiirire obuyiingo neende obusaale;
baalaba nibo, haandi babula esisa daawe.
Embiindo chaabwe chiwoola koti enyaanja yiiyire.
Beeruhira hu faraasi
haandi beyaanjire koti abasaacha beetekeehe
ohuhulwaania, Ewe abaandu bomu Bbabbilooni.
43“Omutuki wa Bbabbilooni, emboosi chimwoolereho,
mani amahono kae nikaleeguluha.
Obuchuuni bumudiirire,
koti obw'omusahi olumwa engasi.
44“Bone, koti lu dalang'i yahufuumbuha niyitula mu sichaha syadidya syoohu mwaalo kwa Yorodaani mani niyiseeta obwaayiro bulai, nilwo lu Ese Omwaami njia ohukera Abakalidaaya beeruhe bwaangu nibatula mu biko byaabwe. Mani omutuki yi njia ohudoola niye owahatuke esyaalo esyo. Wiina mweene onyala ohundeekeraaniaho? Wiina mweene onyala ohunyiingania? Wiina mweene onyala ohundeeniinisiriaho? 45Mani sakira wulire si Mwaani atekeha ohuhola hu Bbabbilooni, neende syaachiririra ohuhola hu syaalo sy'Abakalidaaya. Mubwadyeeri bweene, abaana baabwe bayere bahahwehweeswe baayirwa, mani buli muundu yahawukeengeho sa esibakwiireho. 46Bbabbilooni nisyahakwa, esyaalo syoosi syahateengerehe hulw'ohwebbwomoola hwasyo. Mani embuungu chahawuliirihane mu syaalo syoosi.”
Currently Selected:
Yeremia 50: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
