Yeremia 47
47
Emboosi y'Omwaami eyidiira hu Filistia
1 #
Yis 14:29-31; Esek 25:15-17; Yoel 3:4-8; Amos 1:6-8; Sefa 2:4-7; Sak 9:5-7. Omwaami yalomaloma naange ebidiira hu Filisiti, omutuki wa Misiri n'asisiiri ohuseeta Gasa.
2Omwaami aboola ati:
“Bona, amaachi kaniina nikatula emukulu,
haandi kachia ohuba koti omwaalo kwiichuule okuhulukusa neende amaani;
kwahabwiihe esyaalo syoosi neende buli siindu siriho syoosi,
ebiko neende abo boosi ababimenyamo.
Abaandu bahahuumule nibadaha obuhoonyi,
haandi buli muundu oli mu syaalo yahalire naali mubuchuuni.
3Bahawulire embiindo ch'ebirekeyi by'efaraasi,
neende ohuwuuma hw'ebigaari.
Balaataang'ene baana haba sibahahubbe amahemo enyuma,
bahateengerehe amahono nibaweeremo amaani.
4Olwohuba oludaalo lusudire aambi olw'ohusihirisa
Abafilisiti boosi,
ohumala hu Tiiro neende Sidoni
buli muhoonyi wadoong'ao.
Olwohuba Omwaami ali ohusihirisa Abafilisiti,
abadoong'ereo hu sisiinga sya Kaputoori.
5Efwiiri liweere hu baandu ba Gasa,
haandi abaandu ba Asekelooni basihiriire.
Eng'we ab'Anakimu abadoong'ao
mwahaake yeena ohuchereenjesa?”
6Mulira muti;
“Olugaanga lw'Omwaami!
Mwahabuleere liina?
Mulukobose abeene mu sikiingiro syaalwo,
muwuluuhe mani muwuleere!
7Nae lunawuluuhe lutye,
nikali mbwe Omwaami mweene niye olagiire esy'ohuhola?
Ndaalagiire
ohuseeta Asikelooni neende egenya ly'enyaanja.”
Currently Selected:
Yeremia 47: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
