Yeremia 48
48
Ohusihirira hwa Moabbu
1 #
Yis 15:1—16:14; 25:10-12; Esek 25:8-11; Amos 2:1-3; Sefa 2:8-11. Ebidiira hu Moabbu.
Omwaami w'Obunyala, Nasaae wa Yisiraeli aboola ati:
“Chibaakaanire aba Nebo, olwohuba esiko syeeng'we sisihiriire!
Kiriataimu siwaambirw olukoba lw'amaani lwasyo lunyaasirwe;
abaandu bamwo esoni chibadiirire.
2Oluyaali lwa Moabbu luweereo.”
Abasuku bawaambire Hesibboni, mu bahiihiraanga ohusilyamo olukwe nibaboola bati:
Yiche, lehe husihirise esyaalo sya Moabbu!
Ewe Madimeni, weesi ochia ohunyiswa chi;
amaye kachia ohuhuseeta.
3Tekeerese! Amaliro katula mu Horonaimu kati,
ohunyaka neende ohusihirisa hw'amaani!
4Moabbu sisihiriiswe;
embuungu chiwuliirihana ohwoolera elalira mu Soyaari.
5Olwohuba abaniina Luhiti
baachia nibalira amasika;
haandi abeeha ohutula Horonaimu
bawuliire embuungu y'ohusihirira.
6Baboola bati, Yiruhe! Muwonie obulamu bweeng'we!
Mwiiruhe bwaangu koti esuhiri ndeende mu siparara!
7Moabbu, ohutula hale weesikaanga amaani kao neende obuyiinda bwao.
Nae bulaanu ochia owohuyiingirwa.
Kemosi nasaae wao achia ohuwaambwa,
alala neende abalaamisi bae neende abahoongo bae.
8Omusihirisi achia ohwoola hu buli siko,
sibulao esiko syahawone.
Ehooho lyahasihirire,
neende esipaapi syahasihirire,
koti lu Omwaami aboolere.
9Moabbu siba nisiri neende embaya,
syahabburuuhe.
Ebiko byasyo byaheehole ekuunda,
abuleo omuundu omenyamo.
10Abwaabwe oyo yeesi okatayaalira omulimo kw'Omwaami! Haandi oyo yeesi obiiha olugaanga lwae lwaahaya ohwiidisa amabaanga abwaabwe.
Ebiko bya Moabbu bisihiriire
11Omwaami aboola ati, Abamoabbu babechaanga mu muleembe ohutula mubuyere bwaabwe.
Haba sibayirwaangaho mu jeela daawe.
Bali koti efiini yalehwa ohukwa obuduhulu, eyitahenenwa ohutula mu syoongo ndala ohuchuhwa mu yiindi,
echamu lyaako lisisiiri sa abweene,
neende esing'aari syako haba sisikaluuhanaanga.
12Sakira, bone, ebiha byoolere ndume abaandu bachia ohwiinamya bachuhe Moabbu aasi koti lu bahachuha efiini. Haandi baheenamye endamu ch'efiini chasyo mani baachiaata chaanyoonyoboha. 13Abamoabbu bahadiirwe esoni hulwa Kemosi, nasaae waabwe; koti lu Abaisiraeli badiirwa esoni hulwa Bbeteli, yibali nibeesika muno.
14Abasaacha ba Moabbu, lwasiina mwelaanga ab'amaani
haandi abamanyirifu mu hulwaana?
15Omusihirisi wa Moabbu neende ebiko byasyo mbao yoolere.
Abaraaga bamwo bahiramo obulai bosi beeterwe.
Niise Omutuki, Omwaami w'Obunyala, Niise oboolere.
16Amasira ka Moabbu kali aambi
haandi ohusihirira hwasyo huli aambi ohwoola.
17“Mulirire esyaalo esyo, eng'we abasyebodoohaanie.
Eng'we mweesi abamanyire efuma lyasyo, boole muti;
‘Omutuki bwasyo bw'amaani
haandi obw'oluyaali bufunaakwe.’
18“Eng'we abamenya mu Dibboni,
mutule mu bituundu byeeng'we by'oluyaali,
mwiihale aasi mu lufu.
Olwohuba osihirisa Moabbu nguno yoolere;
asihiriise ebiko by'amaani byamwo.
19Eng'we abamenya mu Aroeri,
mweeme hu ndulo w'engira mani muliinde,
muteebe ababitao neende embiro nibeeyiba muti;
‘Siina syeene esikwiireo?’
20Banaakobolemo bati, Esyaalo sya Moabbu sifunaakwe, mani esoni chisidiirire;
muhubbe embuungu haandi mulire.
Mulaangirire hu genya ly'omwaalo kwa Arunooni,
muti, Moabbu sisihiriiswe.”
21“Omusaango kumalirwe ohuheengerwa ebiko byomu sipaapi bino: Holoni, Yaasa, neende Mefati, 22Dibboni, Nebbo neende Bbeti-dibbulataimu, 23Kiriataimu, Bbetugamuli neende Bbetumeoni; 24Kerioti, Bbosura, neende ebiko byomu syaalo sya Moabbu byoosi, ebiri aambi neende ebiri eyale. 25Amaani ka Moabbu kafuniihe, obunyala bwasyo busihiriire. Ese Omwaami, Niise oboolere.”
Moabbu syahaloongoyaswe
26Omwaami aboola ati: “Mumeese Moabbu, olwohuba sindeniinisiryeho. Moabbu sichia ohwefuufula mu biindu bi sisalire, mani abaandu bahasichehe. 27Eng'we abomu Moabbu, lwasiina mwacheha Yisiraeli? Syaali mu mukaanda kw'abeebi, sakira buli lu mwasilomalomaangaho, mwayuyaanga sa emitwe kyeeng'we?
28“Eng'we Abamoabbu, mutule mu biko byeeng'we mani muchie mumenye mu njafwa ch'olwaanda.
Mube koti amaguugu koombaha ebiyu mu njafwa ch'amakina.
29Hwawulira ohweehuduumbasa hw'abaandu ba Moabbu.
Beehuduumbasa muno,
beeniinia, ohwehuduumba buhuduumbasa, b'esyeejo, b'esuunga nibo.
30Ese Omwaami manyire koti lu beeniinia;
Ohweehuduumbasa hwaabwe hwa bihaya,
ebiholwa byaabwe bibulamo obuhoonyi.
31Mani sakira njia ohulirira Moabbu;
ndirira buli mu Moabbu;
ndirira neende abaandu ba Kiuheresi.
32Eng'we aba Sibbima, mbalirira
ohuhiraho koti lu ndirira aba Yaseri!
Ewe esiko sya Sibbima, oli koti omusabbiibbu kw'amasaga kalaanda ohwoola hu Nyaanja y'Omuunyu,
haandi nikoolera elalira Yaseri.
Nae omusihirisi akwiire hu byaamo byao by'esiminyu neende hu misabbiibbu chabyo.
33Esangaalo neende omweehoyo bimalirwe
mu syaalo silai sya Moabbu.
Njakaamye efiini ohuhulukusira mu binyuhiro by'emisabbiibbu.
Abulao onyuha efiini naayokera hulw'esangaalo;
esiyoka esyo haba si sy'esangaalo daawe.
34“Aba Hesibboni neende Eleyale boobba embuungu; mani embuungu niyiwuliirihana ohwoolera elalira Yahasi, yiwulirwa ohutula Soyari ohwoola Horonaimu, neende mu Egilaati Selesiya. Kata emyaalo kya Nimurimu chosi chihamire. 35Haandi njia ohwaakamia aba Moabbu ohuyaanira ebiyaanwa abuundu waabwe wohwiinamiramo neende ohunioohesera banasaae basyo obubbaani. Omwaami niise oboolere. 36Mani sakira ndirira Moabbu koti omuundu yoobba erere, haandi ndirira abaandu ba Kiriheresi koti omuundu wuubba erere; olwohuba obuyiinda bu banyoola busihiriire.
37“Olwohuba boosi beebekereho efwiiri, haandi beebekereho ebirefu! Boosi beesandaake hu mahono, haandi buli muundu yefwaalire ebigunia. 38Hu buli sirama sy'enyuumba mu Moabbu neende hu buli ngira chamwo choosi, mulimo ohulira hwoong'ene; olwohuba njatire Moabbu koti esyoongo yitaali neende obuhoonyi. 39Moabbu sinyoonyoboolwe, abaandu bamwo bachereenjesa. Bulaanu Moabbu syeeholere ekuunda haandi esitiisa eyiri abaandu basyebodoohaanie. Ese Omwaami, Niise oboolere.”
Moabbu sibula obweeyibiro
40Omwaami aboola ati:
“Bone, esyaalo siseeta Moabbu koti eeswi yibburuha bwaangu,
niyibambuule embaya chayo;
41ebiko byasyo bichia ohuwaambwa
haandi ebyoombahe byasyo bisite bichia ohudiirwa.
Hu ludaalo olwo, abasikaari b'amaani ba Moabbu bahatye
koti omuhasi olumwa engasi.
42Moabbu sichia ohusihiriswa syaakame ohuba esyaalo,
olwohuba syeniinia esyeene mani syajeemera Omwaami.
43Ebitiisa, neende obuko, neende emiteego
biriindire abaandu bomu Moabbu.
Ese Omwaami, Niise oboolere.
44Buli oteemaho ohwiiruha ebitiisa
yahakwe mu buko,
neende oyo oteemaho ohuniina ohutula mu buko
yahadiirirwe mu muteego olwohuba ngwiisire hu Moabbu ebiindu bino
mu mwaaka kwohusihirisiramo Moabbu.
Ese Omwaami, Niise oboolere.
45“Abeeruha ohukoonya obweyikamo mu Hesibboni
baweeremo amaani;
olwohuba Moabbu syaaduha sa omuliro, edooho lya Hesibboni liyaambire omuliro,
neende edooho lya Sihooni lyaaduha sa omuliro.
Omuliro kusihiriise enjaho
neende aakulu w'engulu chomu Moabbu, aba abadaha ebiita.
46Chihwaakaanire ewe Moabbu!
Abaandu beenamira Kemosi basihiriire;
olwohuba abaana baabwe basyaani bayirwe mu jeela
neende abaana baabwe bahaana bayirirwe mu jeela.
47Nae mu ndaalo chiicha
njia ohukobosera Moabbu ehabi chasyo.”
Ebyo byoosi nibyo bi Omwaami alomaloome hu Moabbu.
Currently Selected:
Yeremia 48: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
