Yeremia 46
46
Ohuyiingirwa hwa Misiri mu Karikemisi
1Omwaami yamboolera ebidiira hu byaalo.
2 #
Yis 19:1-25; Esek 29:1—32:32. Ebidiira hu Misiri. Bino nibyo bi yaboola ebidiira hu eye lya Neko omutuki wa Misiri, li Nebukadineesa omutuki wa Bbabbilooni yayiingirira mu Karikemisi, aambi neende omwaalo kwa Ewufuraate, mu mwaaka kwohune okw'obutuki bwa Yehoyakimu omwaana wa Yosia, omutuki wa Buyudaaya:
3Abahoongo b'eye lya Misiri bahuuma bati,
Tekehe engabo cheeng'we,
mani muhuumbe muchie mulwaane!
4Tekehe efaraasi;
Eng'we abeerusi b'efaraasi, muchiniineho!
Mweeme mu bituundu byeeng'we nimwefwaalire ekofia cheeng'we.
Yakale amafumo keeng'we,
mwefwaale amakooti keeng'we k'ebyuuma.
5Nae bulaanu mbona siina?
Batiire
mani bakaluuhaane nibakobola enyuma.
Abalwaani baabwe b'amaani basukuunwe aasi,
mani beeruuhe bwaangu;
nibatahubba amahemo enyuma
Ebitiisa biri hu buli mbeka!
Omwaami niye oboola.
6Abahiramo embiro, bibahayire ohwiiruha,
noomba abalwaani b'amaani ohweeyiba.
Emukulu w'omwaalo kwa Ewufuraate,
niyo yi beegumuule mani baakwa.
7Wuno niye wiina, oniina aakulu koti omwaalo kwa Naili,
koti emyaalo ky'amaachi kachio kachiimirire?
8Misiri siniinire aakulu koti omwaalo kwa Naili,
koti omyaalo kuwaanyire amaachi kakwo.
Misiri sy'aboola siti, Njia ohuniina, njia ohumira esyaalo,
njia ohusihirisa ebiko neende abaandu babirimo.
9Eng'we efaraasi, museete,
Eng'we ebigaari, mani mutwoome!
Lehe abalwaani b'amaani batuleyo:
abasaacha ba Etiopia neende aba Libbya, abadiira engabo,
abasaacha ba Ludi, abamanyihaane mu hudiira obuyiingo.
10Oludaalo olwo nilwo oludaalo lw'Omwaami Nasaae w'Obunyala,
oludaalo lw'ohwetuunga,
omweene ohwetuunga hu basuku bae.
Olugaanga luchia ohubalya mani lwiikute,
mani lung'we amabaanga kaabwe lwiikute.
Olwohuba Omwaami Nasaae w'amaye adiirire esiyaanwa
emukulu w'esyaalo, aambi neende omwaalo kwa Ewufuraate.
11Eng'we abaandu ba Misiri,
muchieho Gileadi mani munyoole amalesi.
Amalesi maangi ka mwehoonyera kabula obuhoonyi;
haba sikachia ohubawonia daawe.
12Ebyaalo biwuliire koti lu mudiirirwe esoni,
buli muundu awuliire amaliro keeng'we.
Olwohuba omusikaari w'amaani yegumuule hu waasye;
mani boombi bakwiire aasi.
Ohwiicha hwa Nebukadineesa
13 #
Yer 43:10-13. Nebukadineesa omutuki wa Bbabbilooni niyali niyeecha ohuseeta esyaalo sya Misiri, Omwaami yamboolera ati:
14“Boolera mu Misiri, haandi olaangirire mu Migidooli;
laangirira mu Mefisi neende mu Tapaneesi:
Boola oti, ‘Mweetekehe ohweewonia abeene,
olwohuba olugaanga luchia ohubalya lubebodoohaanie.’
15Lwasiina Apisi, nasaae weeng'we akwiire?
Lwasiina esurusi yeeng'we haba siyeemere?
Olwohuba Omwaami niye omukokere aasi.
16Abasikaari beeng'we beegumuule mani baakwa aasi,
mani buli muundu naaboolera owaasye ati,
Siingira, mani leha hukobole eyiri abaandu beefwe beene
neende mu syaalo sihweebulirwamo,
huwone olugaanga lw'abasuku beefwe.
17Kulihe omutuki wa Misiri muti,
Owesiyoka, oyo owaleha ehabi yae yaabita.”
18“Ese Omwaami w'Obunyala, ndi Omutuki,
Niise Nasaae Mulamu.
Koti olugulu lwa Tabbori luleeyi ohuhira engulu chiindi,
haandi koti olugulu lwa Karimeeli luli hu genya ly'enyaanja, nilwo lu maani k'oyo oli ohwiichia ohuseeta.
19Eng'we abaandu ba Misiri,
tekehe emigugu kyeeng'we ohuchia mu jeela!
Olwohuba Mefisi syaheehole ekuunda,
esinyasiihe, esibulamo abaandu.
20“Misiri siri koti emoosi ndai muno,
nae seetwa neende amabuko ohutula emukulu.
21Kata abasikaari b'aasi bapaangise
boosi bali koti emoosi nginu;
eee, haba sibeemereo daawe;
boosi bafudaate mani beeruha.
Olwohuba oludaalo lw'amasira kaabwe lubakwiireho,
ebiha byohu saanda hwaabwe.
22“Misiri siiruha nisisaalira koti enjuha,
olwohuba eye ly'abasuku basyo lihuumba nilisuda aambi,
haandi lisiseeta neende embaachi,
koti abo abatema emisaala.
23Bahateme esichaha sya Misiri,
Omwaami niye oboola,
kata syahaba nisyadidya muno,
olwohuba abasikaari bae baangi muno ohuhiraho esike;
haba sibanyala ohubalwa daawe.
24Abaandu ba Misiri badiirirwe,
bayingiirwe neende abaandu ohutula emukulu.”
25Omwaami w'Obunyala, Nasaae wa Yisiraeli, aboola ati: “Bone, njia ohusaandya Amoni, nasaae wa Tebbesi, neende omutuki wa Misiri, neende Misiri neende banasaae basyo, neende abatuki basyo. Njia ohusaandya omutuki wa Misiri neende abo abamweesika. 26Njia ohubadiisa mu mahono k'abo abakiiya ohumwiita, mu mahono ka Nebukadineesa omutuki wa Bbabbilooni neende eye lyae. Nae ebyo nibiweere, Misiri syahakobolemo ohubaamo abaandu, koti lu babechaangamo hale. Ese Omwaami, Niise oboolere.”
Omwaami achia ohuwonia abaandu bae
27 #
Yer 30:10,11. “Nae, Ewe Yakobbo omuhalaabani waange, otatya daawe,
noomba Ewe Yisiraeli, oteyendeherera daawe;
olwohuba bona, njia ohubawonesera eyale,
neende abeechuhulu beeng'we mu syaalo sy'obuboye bwaabwe.
Yakobbo yahakobole mani yaaba mu muleembe natadeebayo daawe,
haandi abulao owahamutiise daawe.
28Ewe Yakobbo omuhalaabani waange, otatya daawe,
Omwaami niye oboola,
olwohuba ndi naawe.
Njia ohusihirisira elalira ebyaalo byoosi
bi ndabasalaaniamo.
Nae ewe, haba siinjia huhusihirisa daawe.
Njia ohuhusaandya, nae budiidi muno,
nae haba siinjia ohubaleha ataali ohusaanda daawe.”
Currently Selected:
Yeremia 46: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
