Yeremia 23
23
Esuubi mu biha biichayo
1Omwaami aboola ati: Chibaakaanire, abeemirisi abo abasihirisa haandi abasalaania abaandu b'Omwaami. 2Mani sakira Omwaami, Nasaae wa Yisiraeli, aboola bino ebidiira hu beemirisi bachuunirwa abaandu baange ati: “Haba simwadeebaho hu baandu baange, mani nimubeerusa nibasalaana. Bone, bulaanu njia ohubasaandya ohweema hu sibi simwahola. 3Mani njia ohubuusa alala abaandu baange ohutula mu byaalo bi basalaaniramo, mbakobose mu syaalo syaabwe. Baheebule mani beengiiye muno. 4Njia ohudoola abeemirisi abanaabadeebeengeho, mani bahayeenge ohutya neende ohweyendehereraanga haandi, mani abuleo onyala ohukota daawe. Ese Omwaami, Niise oboola.”
5 #
Yer 33:14-16. Omwaami aboola ati: “Bone, esiha syahoole, mani ndoole omutuki muluungifu ohutula hu lwiibulo lwa Daudi. Omutuki oyo niye owahatuke neende amakesi haandi yahahole ebyadyeeri neende eby'obuluungifu mu syaalo. 6Mu biha byae, abaandu bomu Buyudaaya bahabe bulai, neende abomu Yisiraeli bahabe neende omuleembe.” Mani bahamulaangeenge bati: Omwaami niye obuluungifu bweefwe.
7Omwaami aboola ati: “Mani sakira, bone, endaalo chahoole, abaandu bahaye ohuboola bati, ‘Koti lu Omwaami ali omulamu, oyo owatusa Abaisiraeli mu syaalo sya Misiri.’ 8Nae bahaboole bati: ‘Koti lu Omwaami ali omulamu, oyo owatusa Abaisiraeli mu syaalo sy'emukulu neende mu byaalo byoosi bi bali nibasalaaniiremo.’ Mani bachia ohumenya mu syaalo syaabwe syeene.”
Emboosi ya Yeremia eyilomaloma hu Banabbi
9Ebidiira hu banabbi:
Omwooyo kwaange kufuniihe,
amakuumba kaange koosi kateengereha.
Ndi koti omuundu omeerere,
oyo yi malwa kahirire amaani,
hulw'Omwaami
neende hulw'emboosi chae njoolerefu.
10Olwohuba esyaalo siichulemo abaandu batomiirira hu Omwaami.
Abaandu balira olwohuba Omwaami yalaama esyaalo,
haandi olwaayiro lwoomereere.
Abaandu bano b'ebiima bibi,
haandi beehoonyera bubi obunyala bwaabwe.
11Abanabbi alala neende abalaamisi baholi b'ebibi;
ndabanyoola nibonoonera neende mu nyuumba yaange yeene.
Omwaami niye oboola.
12Mani sakira, engira yaabwe yahabe
koti emihoosi miterere haandi ekyomu siirima.
Balibasiindiha mani baakwa.
Olwohuba njia ohubakwiisaho esibi
mu biha byaabwe byohu saanda.
Omwaami niye oboola.
13Mbweene esyonoono
mu banabbi bomu Samaria.
Batusa obunabbi mu liita lya Bbaali
nibakosa abaandu baange bomu Yisiraeli.
14 #
Huc 18:20; Esek 16:49. Haandi mbweene esiindu sibi muno
mu banabbi bomu Yerusalemu.
Bahola obucheke haandi baabacha.
Bakwiira abahola-mbi,
mani abulao onyala ohukaluuhana yaaleha ebyonoono byae.
Boosi-boosi, mbona endi bali koti abaandu ba Sodomu
haandi abaandu bamwo bali koti aba Gomora.
15Mani sakira Omwaami w'Obunyala aboola ebidiira hu banabbi ati:
“Bone, njia ohubaliisa emisaala kihahaata;
haandi mbaberese amaachi kalimo obutwa, bang'we.
Olwohuba abanabbi bomu Yerusalemu
basalaanisire ebiholwa bibi mu syaalo syoosi.”
16Omwaami w'Obunyala aboola ati, “Mutawuliraanga emboosi ch'abanabbi balaangirira yi muli, nibabasuubisa ebiindu bi bachia ohubahoonya. Bababoolera ebiindu bi beene babaasa sa, ebitatula eyiri Omwaami. 17Abanabbi abo bemeedaanga sa ohuboolera abaandu balekeeresa Emboosi y'Omwaami bati, ‘Mutadeebayo, ebiindu bichia sa ohuba bulai.’ Mani buli muundu w'omwooyo mwoomeranu bamuboolera bati, Sibulao esibi sinaahukweeho,”
18Nae wiina hu banabbi abo owali naamanyire ebibaaso bw'Omwaami?
Abulao owali naawuliireho emboosi yae,
oba owali naawuliire mani yaataaho omwooyo kwae hu biindu bi Omwaami yali naaboolere.
19Bona, obwaalaba bw'Omwaami
buli koti omuyaka kw'amaani;
koti esiifuusye sy'amaani muno,
esiwuucha hu mitwe ky'abahola-mbi.
20Etima ly'Omwaami haba silyahakwe
ohwoola lu yahaholere haandi yooseresa
esyo syaaheengereo ohuhola.
Mu biha ebyo, abaandu baange bahamanye bulai esy'ohuhola.
21Omwaami yaboola ati, “Haba sindatuma abanabbi abo,
nae abeene beetuma sa.
Haba sindababeresa emboosi yoosi,
nae abeene beelomalomera sa mu liita lyaange.
22Nae baba nibamanya ebibaaso byaange,
bahayirire emboosi yaange eyiri abaandu baange,
mani bahakaluuhaane baatula hu biima byaabwe bibi,
neende hu biholwa byaabwe bibi.”
23Omwaami aboola ati: Ese ndi Nasaae oli buli abuundu nae otaali abuundu alala. 24Abulao omuundu onyala ohweekisa abuundu woosi mani ndaahaya ohumubona. Haba simumanyire muti ndi muukulu neende mu syaalo? 25Mbuliire koti lu banabbi abo balaangirira eby'obubacha. Balaangirira nibehoonyera eliita lyaange, nibaboola bati, ndootere, ndootere. 26Abanabbi abo bahoole yeena mu hukosya abaandu baange, nibababoolera eby'obubacha, haandi nibalaangirira eby'obubacha ebiri mu myooyo kyaabwe? 27Babaasa bati, ebilooto byaabwe nibyo ebilai, mani binaakere abaandu baange baanjibirira, baakobola eyiri Bbaali? 28Leha omunabbi olootere esilooto abooleenge ati, esyo silooto sa nisyo, nae oyo oli neende emboosi yaange, ayilaangirireenge mu bweesikwa. Omwaami ateeba ati, omuhuuchi kwahabaaho nasilala neende engaano? 29Omwaami aboola ati, emboosi yaange yiri koti omuliro, haandi koti enyuundo yaata olwaanda. 30Mani sakira, Omwaami aboola ati, bone, ndi ohulwaania abanabbi, abo ababukula emboosi ch'abasyaabwe. 31Omwaami aboola ati, haba siindaha abanabbi abo, abehoonyera emboosi chaabwe mani haandi baaboola bati, Omwaami aboola. 32Omwaami aboola ati, bone, nyiingania abanabbi abo abalaangirira ebilooto byaabwe by'ohubacha, nibakosya abaandu baange hulw'obubacha baabwe obwo, neende ohusangaalira ebitaalimo. Haba simbatumangaaho daawe, oba mbalagiraho daawe; mani babula obuhoonyi bwoosi eyiri abaandu baange.
Omugugu kw'Omwaami
33Omwaami yamboolera ati: Mulala hu baandu baange, oba omunabbi, oba omulaamisi n'ahuteeba ati: Omugugu kw'Omwaami kuli yeena? Ochia ohubakobolaangamo oti; Niing'we Omugugu, haandi njia ohubasukuna. 34Nae omunabbi oyo, oba omulaamisi oyo, oba omuundu mulala yeesi oboola ati, Omugugu kw'Omwaami, njia ohusaandya omuundu oyo neende abomu nyuumba yae. 35Ohutusaho, buli muundu ateebeenge owaasye, haandi buli muundu ateebeenge mwanaang'ina ati: “Omwaami akoboolemo atye” oba “Omwaami aboolere atye?” 36Nae batehoonyeraanga emboosi chino haandi mbwe: “Omugugu kw'Omwaami,” olwohuba oyo owahehoonyere emboosi echo, okwo nikwo okwahabe omugugu kwae; abaandu bakodya-kodya emboosi cha Nasaae mulamu, Omwaami w'Obunyala, Nasaae weefwe. 37Mani ewe Yeremia, teeba abanabbi oti, Omwaami akobolemo siina oba “Omwaami aboolere siina?” 38Nae nibehoonyera emboosi chino, “Omukuku kw'Omwaami,” nae Ese ni hutumire, nimboola endi, Bataboola bati, “Omugugu kw'Omwaami.” 39Mani sakira, bona, njia ohubakiinga mbasukune eyale, abo alala neende esiko si ndababeresa, alala neende bakuuka yaabwe. 40Mani njia ohubaleetaho esoni neende ohuwumumala hw'endaalo choosi, ohutahebirirwe daawe.
Currently Selected:
Yeremia 23: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
