Yeremia 1

Yeremia

1Chino nicho emboosi cha Yeremia, omwaana wa Hilikia, mulala hu balaamisi abali nibamenya mu Anatooti, mu syaalo sya Bbenjamini. 2#2 Abat 22:3—23:27; 2 Biha 34:8—35:19.Omwaami yalomaloma neende Yeremia, mu mwaaka kw'ehumi neende chidatu, Yosia omwaana w'Amooni naali omutuki wa Buyudaaya. 3#2 Abat 23:36—24:7; 2 Biha 36:5-8; 2 Abat 24:18—25:21; 2 Biha 36:11-21.Omwaami haandi yalomaloma neende Yeremia mu ndaalo ch'obutuki bwa Yehoyakimu, omwaana wa Yosia. Ebyo nibiweere, Omwaami yalomaloma neende Yeremia amahabi maangi muno, ohwoola mu mwaaka kw'ehumi neende mulala, okw'obutuki bwa Sedekia, omwaana wa Yosia, omutuki wa Buyudaaya. Mu mwoosi kwo hutaano, mu mwaaka okwo, abaandu bomu Yerusalemu bayirwa mu buwaambe.

Ohulaangwa hwa Yeremia

4Olwoola, Emboosi y'Omwaami yaanjichira niyiboola yiti:

5“Ndahumanya niisisiiri ohuhuloonga mu nda ya maakoo,

haandi ndahwaawula noosisiiri ohwiibulwa;

ndaahudoola obe omunabbi eyiri ebyaalo biindi.”

6Nae ese nimboola endi, “Aaa, Omwaami Nasaae! Bona, ese haba siimanyire ohulomaloma, olwohuba siisiiri omwaana muyere.” 7Nae Omwaami yangobolamo ati,

“Otaboola oti, ‘Ndi omwaana muyere’;

nae chia eyiri abaandu boosi ba hutumaho,

mani obaboolere buli siindu siihulagira.

8Otabatichaanga daawe,

olwohuba njia ohubechaanga naawe ohuhuwonianga.

Ese Omwaami, Niise olomaloome.”

9Omwaami yeemao yaakolola omuhono kwae, yaandiira hu munwa; mani yaamboolera ati:

“Bona, ndeere emboosi chaange mu munwa kwao.

10Bona, nyaanga yino hubereese obunyala hu byaalo neende hu bwaami,

ohwiiya neende ohufunaka,

ohusihirisa neende ohudiira,

ohwombaha neende ohutaaka.”

Ohuboneherwa hw'amahabi kabiri

11Emboosi y'Omwaami yanjichira, niyiteeba yiti, “Yeremia, obona siina syeene?” Ningobolamo endi, “Mbona esaga ly'omusaala kw'alimoondi.” 12Omwaami yamboolera ati: “Obweene bulai bweene, olwohuba ndi ohutingaala mbone endi emboosi chaange choolerera abweene.”

13Haandi Emboosi y'Omwaami yaanjichira ehabi lyoohubiri, niyiteeba yiti: “Yeremia, obona siina syeene?” Mani ningobolamo endi, “Mbona endamu yeesera, niyiri emukulu, niyinaame, niyitingaalire eno.” 14Omwaami yamboolera ati, “Amasira kahatulire emukulu, kaakwa hu baandu boosi abali mu syaalo sino. 15Olwohuba bona, ndi ohulaanga enono choosi echomu bwaami bw'emukulu chiiche. Abatuki baacho baheeche nibata ebisaala by'obutuki byaabwe mu milyaangiro ky'ebiruwa bya Yerusalemu, neende ohwebodoohania ebida byasyo, haandi neende ohwebodoohania ebiko bya Buyudaaya. 16Mani ndahaheengere abaandu baange omusaango ohubahira, ohweema hu byonoono byaabwe byoosi neende hulwohuundeha, nibanioohesera banasaae baandi obubbaani, haandi nibeenamira ebiloongaloongwe bi bahola abeene. 17Nae ewe, siingira weeboye oluhoba, obaboolere boosi buli siindu sihulagira. Leha bahaye ohuhutiisa, ataali ao, Ese njia ohuhutiisa mu moni waabwe. 18Ese, bona, enyaanga yino, Ese ndi ohuhola esiko syomiifu, esiiro y'esichuma, neende ebida by'esikomo, ohulwaania esyaalo sya Buyudaaya syoosi: abatuki basyo, abahoongo basyo, abalaamisi basyo, neende abaandu basyo boosi. 19Bahahulwaanie, nae haba sibahahuyiingire daawe, olwohuba ndi naawe ohuhuwonia, Ese Omwaami, niise olomaloome.”

Currently Selected:

Yeremia 1: SAMIA

Highlight

Copy

Compare