Yeremia EMANYISA
EMANYISA
Omunabbi Yeremia yaliwo mu situundu simaliirihayo muhumaliiriha hw'emyaaka emia chitaanu-na-chibiri neende mu ohuchaaka hw'emyaaka emia chisaasaba Kristo n'ateebulwa (600 KN). Mu mulimo kwae kw'obunabbi, kuyahalaabanira ebiha bileeyi muno, Yeremia yalabulaanga abaandu ba Nasaae ebidiira hu masira kali kachia ohukwa hu syaalo syaabwe, ohweema hu syonoono syaabwe sy'ohwiinamira banasaae baandi. Amasira ako ka yalaanga, koolerera Yeremia n'asisiiri omulamu, Nebukadineesa, omutuki wa Bbabbilooni lu yawaamba esiko sya Yerusalemu mani yaasisihirisa alala neende Enyuumba ya Nasaae, haandi yaayira omutuki wa Buyudaaya alala neende abaandu baandi mu buwaambe mu Bbabbilooni. Yeremia haandi yalaangirira ati, ebiha byahoole abaandu bakoboleyo mu syaalo syaabwe nibatula mu buwaambe, haandi esyaalo sikoboleyo buyaaha.
Esitabo sya Yeremia sinyala ohukabulwamo ebituundu bino: 1. Ohulaangwa hwa Yeremia. 2. Omulaanga kwa Nasaae kuchiira esyaalo sya Buyudaaya mu ndaalo ch'abatuki bano: Yosia, Yehoyakimu, Yehoyakini, neende Sedekia. 3. Emboosi chituswa mu biindu bi Bbaruku, omwandiiki wa Yeremia, chi yandiika, omuli ebiindu bihunuufu ebyakwaao, neende ebiindu bidiira hu bulamu bwa Yeremia. 4. Omulaanga kw'Omwaami okudiira hu byaalo biteende biindi. 5. Engano chemeedaho echidiira hu butoli-toli bw'ohuwaambwa hwa Yerusalemu, neende ohuyirwa mu buwaambe mu Bbabbilooni.
Yeremia yali omuundu ochuunirwa muno abaandu bae, haandi owabaheerera elalira. Mani sakira haba siyadahaho kata nabudiidi ohubaheengera omusaango, neende ohulaangirira koti lu bachia ohusaandisibwa. Ebituundu biingi mu sitabo sino, Yeremia yeekesa koti lu yachuunwa omwooyo muno, hulw'omulimo kw'obunabbi ku Nasaae yamutuma ohuhola. Emboosi y'Omwaami yali koti omuliro mu mwooyo kwae haba siyanyala ohuyesimiirisira daawe.
Bilala hu mboosi hunuufu mu sitabo sino, byeekesa koti esiha sya Yeremia syalimo amasira syakaame, mani yiruwo Endagaano Njaaha, Endagaano yi baandu ba Nasaae banaaliindeenge, ataali omuundu yeesi ohubeechulisa, hulwohuba Endagaano eyo yahandiikwe hu myooyo kyaabwe (31:31-34).
Ebiri mu sitabo sino mu bwiimbikiti
Ohulaangwa hwa Yeremia 1:1-19
Obunabbi mu ndaalo cha Yosia, Yehoyakimu, Yehoyakini, neende Sedekia 2:1—25:38
Ebiindu biindi bidiira hu bulamu bwa Yeremia 26:1—45:5
Obunabbi buyiingania ebyaalo biindi 46:1—51:38
Ohuwaambwa hwa Yerusalemu 52:1-34
Currently Selected:
Yeremia EMANYISA: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019