Yisaaya 59
59
Omunabbi yoolobya ebyonoono by'abaandu
1Bone, muhaye ohubaasa muti Omwaami mukata muno, mani bimuhaire ohubawonia,
oba muti, yadiimba amatwi, mani s'anyala hubawulira.
2Nae ebyonoono byeeng'we nibyo ebyabakabuhaniamo
akatikaati weeng'we neende Nasaae weeng'we.
Mani ebyonoono byeeng'we nibyo ebikera Nasaae yabeekisa
mani yaahaya ohubawulira.
3Mulomaloma eby'obubacha,
haandi ebiholwa byeeng'we
by'obwaalaba neende obutemo.
Mwebbwangula neende emboosi embi.
4Abulao owaba oba owosa ebyadyeeri,
abulao ochia mu siina neende obwadyeeri.
Nae mweesika ebidoondobanu haandi mwalomaloma eby'obubacha byoong'ene.
Mutekeha eby'etima mani nibitulamo ebibi.
5Eehobo ch'omuhola mbi muno koti amaki k'enjuha ch'obusiba.
Olya amaki ako afwa sa.
Haandi niwaalusa eki elyo, nilyalula enjuha sa cheene.
Nae eehobo chi muhola chibulamo obuhoonyi, chiri koti luwahasona engubo ohutula mu lukubookubo lw'olububi.
6Obuwuusi bw'embubi haba sibutulamo engubo;
abaandu haba sibanyala ohwefwaala engubo chibasoneremo.
Ebiindu bi bahola bibulamo obuhoonyi,
mani ebiholwa by'obutemo byamenya mu mahono kaabwe.
7 #
Rom 3:15-17. Baanguya ohuhola ebibi,
haandi sibahiinda hwiidisa amabaanga kabulaho omusaango.
Ebibaaso byaabwe, bibaaso by'obutemo byoong'ene,
Buli yimubitira mulehayo nimunyaasireyo haandi nimusihiriiseyo.
8Haba sibamanyire esilaangwa siti, omuleembe,
haandi bi bahola, mubulamo esyadyeeri.
Balima engira ch'amakoona,
mani buli ochibitaho haba sanyoola omuleembe daawe.
Abaandu beeyama ebyonoono byaabwe.
9Mani abaandu nibaboola bati: “Ngandi bulaanu eefwe humanyire esifune sikera obwadyeeri nibuba eyale naafwe,
haandi nihutaba neende obuluungifu.”
Hukoonya obulafu, nae bone, hunyoola esiirima,
haandi huliinda obulafu, nae hukeendera mu siirima sy'amaani.
10Hwabaabira hu bida koti abawofu,
hwaabaabira koti abo ababula emoni.
Hweegumula esideete syeene, koti abali musiro,
huli koti abo abali emakoombe.
11Fweesi hubuluula koti elyaaka,
huhuumula koti amaguugu.
Hwekoomba obwadyeeri, nae haba sihubunyoola;
hwekoomba obuwonia, nae buli eyale naafwe.
12“Olwohuba ebyonoono byeefwe byemeedere ohuba ebiingi mu moni wao,
haandi ebyonoono byeefwe nibyo ebituwabira omusaango;
olwohuba ebyonoono byeefwe biri naafwe,
haandi efwe abeene humanyire ebyonoono byeefwe byoosi.
13Hujeemera, haandi hwekaana Omwaami,
mani hwaakaluuhana, hwaahaya ohuloonda Nasaae weefwe.
Hwafwiinyirira abaandi haandi hwahujeemera.
Ebibaaso byeefwe bihyaamu nibyo, haandi hulomaloma eby'obubacha byoong'ene.
14Hwamalao obwadyeeri,
mani nihusuda eyale neende obuluungifu.
Olwohuba obwadyeeri bubula hu ngira,
haandi obuluungifu haba sibunyoolehana daawe.
15Obwadyeeri buweere mu baandu,
haandi oyo owaakama ohuhola ebibi niye, anyoola sa ebidinyu.”
Omwaami yeetekeha ohununula Abaandu Bae
Omwaami yabona esyo, mani n'anyoolera
olwohuba obwadyeeri bubulao.
16 #
Yis 63:5. Yabona ati abulao omuundu kata mulala owaabina abafwiinyirirwa,
mani n'awukaho sa.
Mani sakira omweene achia ohwehoonyera obunyala bwae ohuyiingira,
neende obuluungifu bwae ohubanunula.
17 #
Efes 6:14,17; 1 Tes 5:8. Yefwaala obuluungifu koti esyefwaalo sy'ebichuma si befwaala hu sirifu,
haandi yefwaalire ekofia y'obuwonia hu mutwe kwae;
achia ohwefwaala ohudaha huungi ohutereesa ebiindu byoosi,
mani asaandye haandi yetuunge ebiindu bibi byoosi ebyakwa hu baandu bae.
18Yahetuunge, ohuchianakana neende ebiholwa byaabwe,
yahadiirire abamuyiingania egiili, haandi yasaandya abasuku bae;
naayiriramo neende abo abali eyale.
19Ohutula ebukwe ohwoola emuumbo, bahatye eliita ly'Omwaami,
haandi bahatye oluyaali lwae naatulira yi lyuuba lituliraanga.
Olwohuba yaheeche koti omwaalo kuhulukusa neende amaani,
okwiruswa neende omuyaka ku Omwaami mweene asiindiha.
20 #
Rom 11:26. Omwaami aboolera abaandu bae ati: “Njia ohwiicha eyiri Yerusalemu koti Omwaabini,
eyiri abeechuhulu ba Yakobbo abakaluhaane ohutula hu bibi byaabwe.”
21“Mani hulwaange, yino niyo endagaano yaange nabo: Mbabereese obunyala bwaange, neende emboosi chaange bibe ebyeeng'we endaalo choosi. Mani ohutula buti, munekeseenge abaana beeng'we neende abeechuhulu beeng'we ohuumbuliraanga endaalo choosi.”
Currently Selected:
Yisaaya 59: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
