Yisaaya 60
60
Oluyaali lwa Yerusalemu mu ndaalo chiicha
1Ewe Yerusalemu, siingira mani omesamesane koti elyuuba,
mani oluyaali lw'Omwaami lumesamesanire mweewe.
2Olwohuba bona, esiirima siribwiiha esyaalo,
esiirima sidiiraane syahabwiihe abaandu;
nae Omwaami yahahusiingirireho koti elyuuba,
haandi oluyaali lwae lwahabonehere mweewe.
3Mani ebyaalo byoosi byaheeche eyiri obulafu bwao.
4Siingisa emoni chao, otingaale buli abuundu, mani obone;
boosi bebuusire alala, ohwiicha yooli.
Abaana bao basyaani bahatule eyale mani beeche,
haandi abaana bao bahaana bahakiingirwe mu mahono koti abaana badoto. 5Wahabone esyo mani waasangaala,
wahateengerehe mani weehoya.
Olwohuba obuyiinda bw'ebyaalo byoosi bwaheeche yooli,
mani bwaahubbwomoohaho nibubitira mu nyaanja.
6Amaicho k'engamia kahahwiichuleho,
engamia ndoto cha Midia neende Efa.
Engamia choosi ohutula Seebba chaheeche.
Chaheeche nichileeta esaabbu neende obubbaani.
Abaandu boosi bahalaangirire efuma y'Omwaami.
7Ebyaayo bya Kedari byahebuusire yooli,
emiiku cha Nebbayooti chahahuleeterwe ohuhuhalaabanira.
Emiiku echo chahaleetwe hu alutaari mani nichifukiirirwa.
Ndahakinie enyuumba yaange y'oluyaali.
8Ni siina byeene bino ebidumuuha koti amaleesi,
haandi ebibburuha koti amaguugu nikakobola mu biswi byako?
9Echo nicho emeeri echitula mu byaalo by'eyale.
Echitangiiremo nicho emeeri cha Tarisiisi,
nichileeta abaandu bao nichibatusa eyale muno.
Baleetere efeesa chaabwe neende esaabbu chaabwe,
ohwiisa oluyaali mu Omwaami Nasaae weeng'we,
haandi Omwoolerefu wa Yisiraeli,
olwohuba yeesere oluyaali mu baandu bae.
10Omwaami aboolera Yerusalemu ati:
“Abateende bachia ohwoombaha buyaaha ebida byao,
mani abatuki baabwe balihuhalaabanira.”
Etima lyandiira mani nihusaandya,
bulaanu ndehubbire mu sirifu mani ndaahukwiira esisa.
11 #
Hubwi 21:25,26. Ebiruwa byao binabecheenga ebiikule buli siha;
esideete neende esiro haba sibinekalweengeo daawe;
mani abaandu bahuleetereenge obuyiinda bwomu byaalo byaabwe,
abatuki baabwe nibeemereeremo.
12Olwohuba esyaalo neende obwaami
ebyahahae ohuhuhalaabanira byahasihiriswe.
Ebyaalo ebyo byahasihirisirwe elalira.
13Oluyaali lwa Lebbanooni lw'emisaala
neende embaao chihiramo obulai
byahaleetwe ohuhwoombaha buyaaha, ewe Yerusalemu,
neende ohunyirisa enyuumba yaange,
mani ndahahole esiko syaange ohuba esy'oluyaali.
14 #
Hubwi 3:9. Abaana b'abaandu babafwiinyiriraanga
baheeche mani babeenamireenge;
haandi abo boosi ababalekeresaanga
bahasigameenge aasi mu makulu kaabwe.
Bahalaangeenge bati, “Esiko sy'Omwaami,
Siyooni, Esiko sy'Omwoolerefu wa Yisiraeli.”
15Kata awahaba niwasukunwa haandi waasyuulwa,
naabulao omuundu ohuhuhalakaniamo,
njia ohuhola obe ow'oluyaali haandi omulai muno,
abuundu w'esangaalo endaalo neende endaalo choosi pe.
16Ebyaalo neende obwaami byahahuliinde,
koti lu ng'ina mwaana aliinda omwaana wae.
Mani olimanya oti Ese, Omwaami niise Omuwonia wao
haandi Omuwabini wao, ow'Obunyala Mweene wa Yakobbo.
17“Mubweyaango bw'esikomo, ndahaleete esaabbu,
haandi mu bweyaango bw'esyuuma, ndahaleete efeesa,
mu bweyaango bw'olubbaao, ndahaleete esikomo,
mu bweyaango bw'amakina, ndahaleete esyuuma.”
Ndahahole abahutuka babe n'omuleembe
haandi abahutuka ndahabahole babe abaluungifu.
18Amakono k'obwaalaba haandi sikahawulirihane mu syaalo syao,
haandi esyaalo syao haba sisyahebwaabe kata sa syasihirisibwa.
Ebida byao byahalaangwe biti: “Obuwonia,
haandi ebiruwa byao biti: ‘Ohufumia.’”
19 #
Hubwi 21:23; 22:5. “Elyuuba haba sinilyo
elyahahwaaduhire esideete,
oba omwoosi kwaaba
obulafu bwao mu siro;
nae Omwaami niye ochia ohuba obulafu bwao endaalo choosi,
haandi Nasaae wao niye ochia ohuba oluyaali lwao.
20Elyuuba lyao haba siryahakwe haandi,
kata sa omwoosi kwao kwaatulao.
Olwohuba Omwaami niye ochia ohuba obulafu bwao butaakama,
mani endaalo chao ch'ohulira chiriba nichakaame.
21Abaandu bao boosi bahabe abaluungifu;
esyaalo syao syahabe esyaabwe endaalo choosi.
Bahabe esaga li mweene ndataaka, haandi omulimo ku Ese Mweene ndahola,
hu nyale ohubereswaanga oluyaali.
22Mani amadaala kahiramo obudiidi kaheehole enono,
haandi ako akabula obuchiiro, kaheehole esyaalo sy'amaani.
Niise Omwaami;
mani ebiha byasyo nibyahoole, ndahasyaanguye ohwoolerera.”
Currently Selected:
Yisaaya 60: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
