Yisaaya 58
58
Ohusiiba hwadyeeri
1Omwaami aboola ati: “Yayuhira mu kono ly'aakulu koti lu onyala.
Siingisa ekono lyao koti eturumbete;
oboolere abaandu baange ebyonoono byaabwe,
weekese ab'enyuumba ya Yakobbo ebyonoono byaabwe.”
2Nae bangoonya buli ludaalo,
haandi basangaalira mu humanya engeri chaange,
bali koti esyaalo sihola ebiluungifu.
Bali koti abadiira ebilagiro byaange.
Baasaba ohubaberesa amalako maluungifu,
haandi baboola bati, basangaala ohuba aambi neende Nasaae.
3Abaandu baange bateeba bati, “Lwasiina husiiba, nae Omwaami yaahaya ohusibona?
Lwasiina hwesaandya abeene, nae Omwaami yaahaya ohusimanyaho?”
Bone, hu ludaalo lumusiibiraho, mukoonya ebibasangaasa byoong'ene,
mani mwafwiinyirira abahalaabani beeng'we.
4Ohusiiba hweeng'we hubahola abaalaba, mani nimusoolana haandi nimulwaana
mani nimuhuyana ebikoonde.
Mubaasa muti munaasiibe mutyo hu ludaalo luno
mani mwaasiingisa ekono lyeeng'we ohuwulirihana muukulu.
5Mubaasa muti ohusiiba hu ndaha huli hutyo?
Oludaalo lu muundu ahoyere ohweloongoyasiraho luba lutyo?
Ohusiiba nihwo ohwiinamya omutwe koti olumuli,
neende ohweyala hu bigunia neende ohwefuufula mu kohe?
Ohwo nihwo hu mulaanga muti, ohusiiba,
haandi oludaalo lu Omwaami afukiirira?
6“Ohusiiba hu ndaha nihwo huno:
Ohumalao eminyororo chifwiinya abaandu ataali obwadyeeri,
ohuboolola amakoombo kali hu mabeka k'abaandu,
ohuleha abo abafwiinyirirwa bawaao,
neende ohumalao buli siindu sifwiinyirira abaandu.”
7 #
Mat 25:34. Ohusiiba hu ndaha nihwo huno, ohuberesa abalumwa enjala esyohulya,
ohwaanilisa abamanani bataali neende owohumenya mu madaala keeng'we.
Nimubona abo abataali neende esy'ohwefwaala, mubaberese esy'ohwebwiiha;
haandi mutahayaanga ohuhoonya abeeho beeng'we beene daawe.
8Ao mani mulimesamesa koti esulwe y'echuli,
haandi mwahawonisibwe bwaangu muno.
Obuluungifu bweeng'we bwahabemereremo,
haandi oluyaali lw'Omwaami lwahabaloondeho ohubaliinda.
9Mani mwahalaangeenge Omwaami, n'abakobolamo;
mwahekoongoyeenge, mani n'aboola ati, “Nduwo.”
Nimwahaakame ohufwiinyirira abaandu beeng'we,
mani mwaaleha ohubachalaasa, neende ohubalomalomaho obubi,
10nimwaheyaaneyo ohuberesa abalumwa enjala ebyohulya
mani mwasangaasa abali mu ngisa,
ao obulafu bweeng'we bwaaduhira mu siirima
haandi esiirima sibebodoohaanie syaheehole bwaaba obulafu bw'esideete.
11Mani ao Omwaami aba achia ohubaliindanga endaalo choosi,
haandi ababereseenge ebiindu bilai bimwekoomba.
Mani muchia ohuba ab'amaani.
Mwahabecheenge koti endalo yibachuhiriire amaachi,
koti esulo y'amaachi
katahama daawe.
12Mani ebiindu byeeng'we byakwa, byahombahwe buyaaha;
bahasiingise emisiingi ch'endaalo hale muno.
Mwahalaangwe abatereesi b'ebiindu byanyaasiha,
obakobosamo buyaaha abuundu w'ohumenyamo.
Engaanga y'ohuliinda Sabbaato
13Omwaami aboola ati: “Munaliindeenge Sabbaato,
mani mwahaya ohuholeraangaho ebiindu byeeng'we bi mudaha hu ludaalo lwaange lwoolerefu olwo,
mani mwalaanga Sabbaato oludaalo hulw'esangaalo
haandi oludaalo lw'Omwaami, olw'oluyaali;
mulwiisamo oluyaali, mani mwahaya ohukoonyaanga esangaalo lyeeng'we sa, mwaahaya ohululomalomeraho emboosi ch'ohukachula sa;
14ao mulinyoola esangaalo litula eyiri Omwaami.
Ndahakere abaandu bomu byaalo byoosi baabeesamo oluyaali.
Njia ohubaberesa esyaalo si ndaberesa Yakobbo kuuka yeeng'we, sibe esyeeng'we.
Omwaami niye olomaloome.”
Currently Selected:
Yisaaya 58: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
