Yisaaya 57
57
Ohwiinamiraanga ebiloongaloongwe hw'Abaisiraeli hukayirwa
1Omuundu muluungifu afwa,
nae abulao odeebayo daawe.
Abaandu b'esisa bamalwao,
nae abulao osimanyire.
Olwohuba omuundu muluungifu achia ohuwonisibwa mu masira kalikwaao.
2Abo abakeendera mu buluungifu nibahafwe,
baheengire mu muleembe;
mani bawuluuhire yibeyaliise.
3Musude aambi, mu heengerwe omusaano
eng'we abaana b'abalosi,
eng'we abebulanwa b'abacheke neende ab'abadaamba.
4Wiina mweene yi mubayiraho?
Wiina mweene yi muli ohwechisyuula
mani mwaamulomalomaho nimumuchalaasa?
Eng'we abonooni,
haandi abaana b'abebachirisi.
5Muli neende esiwonya sy'ohwiinamira ebiloongaloongwe ebiri sa aasi w'emisaala,
neende aasi wa buli musaala muhoongo.
Eng'we abeetera abaana beeng'we mu mahooho,
aasi w'enjafwa ch'olwaanda.
6Mutusa amakina makwalaafu mu lwaanda, amakina komu hooho mani mwaakenamiraanga
ako, mani ako niko omukabo kweeng'we;
ako niko kamuyaanira ebiyaanwa by'ohung'wa;
niko kamuleetera ebiyaanwa by'emwo.
Mubaasa muti nimuhola mutyo, esyo sisangaasa ese?
7Mwaala ebitaanda byeeng'we
hu ngulu ndeeyi,
mani eyo niyo yimuniina ohuchia ohuyaanira ebiyaanwa byeeng'we.
8Muta ebiloongaloongwe bimwiinamiraanga
emukoongo w'enjiki cheeng'we;
olwohuba, muundehere ao, mani mwaluula obuliri bweeng'we.
Mani nimuniina nae hu sitaanda syeeng'we sitakalafu,
yimwosanire nabo ebbeyi.
Mwekoomba ebitaanda byaabwe,
haandi mwakwiisira ohwo obuluwo bw'obwekoombi bweeng'we.
9Mwebaha amafuta k'esing'aari neende eby'esing'aari biingi,
mani nimuchia ohwiinamira Moleki nasaae.
Mutuma bawamwaanda beeng'we eyale muno,
mani nibeehirira ohwoola kata emakoombe.
10Mwejoongia abeene nimukoonya banasaae baandi,
nae haba simuwaamo omwooyo mani mwaboola muti, “Hunyaahanirasa buhaya”;
mani haba simwawaamo amaani daawe.
11Omwaami ateeba ati, “Banasaae siina beene bamutya mutyo,
mani mwaambacha,
haandi mwaanjibirira elalira
mani mwahaya ohumbaasaho kata nabudiidi?”
Mwaakama ohunjisamo oluyaali,
olwohuba ndabuweera-buwuleera ebiha byoosi?
12Munyala ohubaasa muti bi muhola biluungifu haandi bilai nibyo,
nae njia ohuta alafu esaambo cheeng'we,
mani ebiloongaloongwe bi muhola haba sibichia hubahoonya kata.
13Mani nimulira nimwekongooya ohunyoola obuhoonyi, lehe ebiloongaloongwe bi mwebuusaho bibahoonye!
Omwaami asuubisa ohuhoonya neende ohuwonia amachuuni
14Omwaami aboola ati,
“Muteeo engira, muteeo engira.
Mutuseo osyohwegumulaho mu ngira y'abaandu baange.”
15Olwohuba ow'Aakulu haandi Omwoolerefu mweene haandi Oyo
oliwo endaalo choosi, ow'eriita Lyoolerefu aboola ati;
“Ese menya abuundu w'aakulu haandi Awoolerefu.”
Haandi mba mu baandu baloonga haandi ab'emyooyo kyeefunaake,
mani mbakobosemo omwooyo neende esuubi,
haandi ohukobosamo omwooyo kwo wefunaake.
16Olwohuba haba siinjia huboolobya endaalo choosi,
oba ohunyoolera endaalo choosi.
Olwohuba omwooyo kuchia ohuundulamo,
mani ese omweene ndahababeere obulamu.
17Olwohuba baanyoolesa neende ebyonoono byaabwe, neende okuliira kwaabwe;
mani ese njia ohubasaandya olwohuba ndakisa obweeni bwaange haandi ndamala ohunyoolera.
Mani niboomya emitwa mu saambo ch'emyooyo kyaabwe kyeene.
18“Mbweene engeri chibeyiriramo, nae njia ohubawonia.
Njia ohubeemereramo, mani mbahoonye, nemye emyooyo abo abalira.”
19 #
Efes 2:17. Omwaami aboola ati, “Niise oberesa abaandu boosi omuleembe, ab'eyale neende aambi.
Mani ese njia ohubawonia.
20Nae abaandi babi, bali koti enyaanja yiiyire;
olwohuba haba siyinyala ohuyenjeera.
Efwiinda chaayo chisiingisa ebikoha neende obuduhulu.
21 #
Yis 48:22. Abahola-mbi haba sibaba neende omuleembe.” Nasaae waange nilwo lu aboola.
Currently Selected:
Yisaaya 57: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
