Yisaaya 37
37
Omutuki Hesekia yeteeba hu Yisaaya
(2 Abat 19:1-17)
1Omutuki Hesekia niyawulira emboosi echo sa ati, yataandula engubo chae hulw'engisa, yefwaala ebigunia, mani yeengira mu nyuumba y'Omwaami. 2Yatuma Eliakimu, owali naahulira edooho, neende Sebbina, omwaandiiki, neende abalaamisi bahunuufu, bosi befwaalire ebigunia, mani baachia eyiri omunabbi Yisaaya omwaana wa Amosi. 3Bamuboolera bati, “Hesekia aboola ati, ‘Oludaalo luno, ludaalo lw'ohusaanda, husaandiisibwa haandi hwamalwamo oluyaali. Huli koti omuhasi woolere ohwiibula, nae abula amaani k'ohusiindiha omwaana. 4Omutuki wa Asiria atumire Rabbusake, omubalabalanu w'amaye kae, ohufwoola Nasaae mulamu. Leha Omwaami Nasaae wao awulire ohufwoola huno mani yesi asaandye abo abahuholere; mani osabireenge abaandu beefwe basiidoong'ereo.’ ”
5Ao mani abahalaabani b'omutuki Hesekia boosa obutumwa bwae eyiri Yisaaya. 6Yisaaya yababoolera ati, “Boolere omwaami weeng'we muti, ‘Omwaami aboola ati: Otatya olwohuba emboosi ch'owuliire, chi bahalaabani b'omutuki wa Asiria yafwoleere echo. 7Bona, njia ohumutaamo omwooyo, mani achia ohuwulira olubweeru, mani akoboleyo mu syaalo syae; njia ohukera olugaanga lumwiitire mu syaalo syae syeene.’ ”
Abasiria haandi batiisa-tiisa Yerusalemu
(2 Abat 19:8-19)
8Ao mani Rabbusake yakobola, mani yaabukaana omutuki wa Asiria n'alwaania Libbina; olwohuba yali nawuliire ati omutuka yali naatulire Lakisi. 9Bulaanu omutuki niyawulira ebidiira hu Tiraka, omutuki wa Etiopia yaboola ati, “Ngula atumire eye ohumulwaania.” Mani haandi naatumira Hesekia bawamwaanda n'aboola ati, 10“Boolere Hesekia omutuki wa Buyudaaya muti, ‘Leha Nasaae wao yi weesika atahubachirisa n'asuubisa ati Yerusalemu haba sisyahakwe mu mahono k'omutuki wa Asiria. 11Bona, mbaasa wamala ohuwuliraho ebiindu bi batuki ba Asiria bahola hu byaalo byoosi, bi baheengao ohusihirisira elalira. Nae niiwe onaawone? 12Bakuuka yaange basihirisa ebiko bya Gosani, Harani, Resefu, neende abaandu ba Edeni abali Talasaari. Waliwo hooho banasaae baabwe abanyala ohubawonia? 13Abatuki bomu biko bya Hamati, neende Aripaadi, neende Sefarifaimu, neende Hena, kata sa omutuki wa Yifa, bali yeena?’ ”
14Ao mani Hesekia yabukula ebbarwa ohutula mu mahono ka bawamwaanda, mani naayisoma. Yachia mu nyuumba y'Omwaami, mani yaamanyisa Omwaami. 15Hesekia yasaba Omwaami n'aboola ati, 16#Hut 25:22. “Ewe Omwaami w'Obunyala, Nasaae wa Yisiraeli, owihaale aakulu wa Kerubbimu, niiwe weeng'ene, Nasaae w'obwaami bwoosi obwohu syaalo; niiwe owaloonga ekulu neende esyaalo. 17Ewe Omwaami, teka ohutwi hwao, mani owulire. Ewe Omwaami, tingaala mani obone. Wulira emboosi choosi chi Senakeribbu atumire echihufwoola, ewe Nasaae mulamu. 18Ewe Omwaami, esyo syaadyeeri, abatuki ba Asiria basihirisa ebyaalo biingi, mani bahola ebyaalo byaabwe byaaba amakuunda. 19Basaamba banasaae babyo, abataali banasaae badyeeri, nae ebiloongaloongwe by'emihono ky'abaandu sa, ebiloongaloongwe by'embaao neende amakina; mani sakira byasihiriswa. 20Mani bulaanu, Ewe Omwaami, Nasaae weefwe, tuwonie, otutuse mu mahono k'omutuki wa Asiria, hu bwaami bwohu syaalo bwoosi bumanye buti ewe weeng'ene niiwe Omwaami.”
Emboosi chi Yisaaya yayirira Omutuki
(2 Abat 19:20-37)
21Ao mani Yisaaya omwaana wa Amosi yayiriira Hesekia emboosi n'aboola ati, Omwaami Nasaae wa Yisiraeli aboola ati, Olwohuba wundekongooyere hu bidiira hu Senakeribbu omutuki wa Asiria, 22sino nisyo si ese Omwaami mboola esimudiiraho endi:
Esiko sya Yerusalemu sihulekereese, ewe Senakeribbu, haandi sihuchehereere
omuhaana wa Siyooni otaamanyire eby'abasaacha;
ahuloondaho nayuuya sa omutwe
omuhaana wa Yerusalemu.
23“Obaasa oti wiina yooli ohufwoolaanga, haandi yobisamo emoni?
Wiina mweene yohabuhiire
haandi wahoomolera emoni?”
Niye ese Omwoolerefu wa Yisiraeli!
24Otumire bawamwaanda bao ohufwoola ese Omwaami,
mani niweefumia noboola oti, “ndehoonyera ebigaari byaange
mani ndaniina aakulu hu ngulu,
ndayingira engulu ndeeyi cha Lebbanooni.
Wefumiisye koti lu watemayo emituumba chihiramo obuleeyi,
neende emisaala kiindi kihiramo obulai,
mani niwolera elalira hu lugulu luhiramo obuleeyi,
mu sichaha sihiramo ohudidya.”
25Wefumiisye koti lu wayaba esulo,
mani noong'wa amaachi kaamwo,
haandi koti amakulu k'abasikaari bao kahamya omwaalo kwa Naili.
26“Haba siwawuliraho
oti niise owatekeha esyo ohutula hale?
Ndatekeha esyo hale muno
mani bulaanu syolereere buti.”
Ndahuberesa obunyala bwohusihirisa ebiko biriho olukaka lw'amaani,
byehole ebituuli by'ebikoha.
27Abaandu baamwo sakira bawaamo amaani,
baatya haandi baateng'eng'ala,
baaba koti obunyaasi bwomu siino
haandi koti omuboka kusebuha,
haandi koti obunyaasi bumera hu sirama buhooha omubasu nikubuhubba,
nibusisiiri ohuhula.
28Ese manyire buli siindu si hudiiraho,
neende buli siindu sy'ohola neende syoochia ohuhola,
haandi manyire koti lu wundaluhireho.
29Olwohuba manyire koti lu wundaluhireho
haandi mbuliire esiyiingwa syohwehuduumbasa hwao,
mani njia ohuta elobo lyaange mu moolu kao
neende oluhoba muuhanwa mwao,
njia ohuhukoboserayo hu ngira
yi wabitiraho niwiicha.
30Yisaaya yaboolera Hesekia ati, “Hano niho ahalolero hachia ohuhweekesa hati bi mboolere bichia ohwoolerera; mu mwaaka kuno neende mu mwaaka kwiicha, muchia ohulya eyamera eyeene; nae mu mwaaka kuloondaho, muchia ohutaaka abeene emere yeeng'we mani muyikese. Mwahataake endalo ch'emisabbiibbu, mani mulye ebyaamo byacho. 31Abo abahaoneo mu Buyudaaya, bahayiindire baaba koti emisaala kiisa emisi aasi mu loba, haandi chaamaho ebyaamo aakulu. 32Yiriwo abaandu bachia ohuwonao mu Yerusalemu, neende hu Lugulu lwa Siyooni. Olwohuba Omwaami w'Obunyala amaliriire ohusihola.
33“Mani sakira sino nisyo si Omwaami aboola ebidiira hu mutuki wa Asiria: Haba saachia ohwiingira mu siko sino, kata sa ohunyala ohulasayo ahasaale kata halala, kata sa ohusiseeta neende engabo, kata sa ohuyaba obuko busyebodohanie. 34Engira yi yabitaho niyeecha, niyo eyeene eyo yiyahabiteho n'akobolayo, mani haba siyaheengire mu siko sino daawe. Omwaami niye oboola. 35Njia ohukayirira esiko sino mani siwonie, hulw'oluyaali lwaange sa, neende olwohuba Daudi omuhalaabani waange.”
36Ao mani niwo yi malaika w'Omwaami achia ohuchiira mu kaambi y'Abasiria yeete abasikaari elifu emia ndala neende amahumi kataanu-na-kadatu neende bataanu (185,000); mani obwiire nibwahahye, bone, ekyo nikyo ekyahabe emilaambo kyaabwe. 37Mani Senakeribbu, omutuki wa Asiria n'ahamyuuhao, n'akabolayo engo n'amenya mu siko sya Ninefe. 38Olwoola, Senakeribbu niyali niyeenamira Nasaae mu nyuumba ya nasaae yae abuundu alaangwa ati Nisirooki, abaana bae Adirameleki neende Sareseeri, bamutemula neende olugaanga, mani beeruhira mu syaalo sya Araraati. Esarahadooni, omwaana wae niye owatukira mu sisaala syae.
©Bible Society of Kenya, 2019
©Bible Society of Uganda, 2019