Yisaaya 38
38
Ohulwaala hw'omutuki Hesekia neende ohuwona hwae
(2 Abat 20:1-11; 2 Biha 32:24-26)
1Olwoola, mu ndaalo echo, Hesekia yalwaala muno, niyoola aambi neende ohufwa. Mani omunabbi Yisaaya omwaana wa Amosi, niyeecha ohumubonaho, naamuboolera ati, “Omwaami aboola ati, ‘Tereesa ebyomuungo wao; olwohuba ochia ohufwa, haba soochia ohuwona daawe.’ ” 2Mani Hesekia yakaluuhana, yatingaalo ena sida, mani yasaba Omwaami, 3n'aboola ati, “Ewe Omwaami, hwekweeda, yichulisaho bulaanu, obone koti lu ndi omweesikwa mu moni wao, koti lu huhuloongoyalira neende omwooyo kwaange kwoosi, haandi koti lu ndeemaangaho ohuhola ebihusangaasa mu moni wao.” Hesekia n'alira muno. 4Omwaami yaboolera Yisaaya ati: 5Chia mani oboolere Hesekia oti, Omwaami, Nasaae wa Daudi kuukaao, aboola ati, “Mbuliire ohusaba hwao, haandi mbweene amasika kao. Mani bona, njia ohumeeda hu bulamu bwao obwo emyaaka ehumi neende kitaanu. 6Njia ohuhuwonia alala neende esiko sya Yerusalemu, mani hutuse mu mahono k'omutuki wa Asiria, njia ohukayirira esiko sino.” 7“Hano niho ahanaabe ahalolero hao ohutula eyiri Omwaami, ahachia ohuhweekesa hati Omwaami achia ohuhola esiindu sy'ahusuubiise: 8Bona, njia ohuhola esiiniha siri hu Ahabbu, esy'elyuuba lichia ohukwa, Omwaami achia ohusikobosa enyuma, obuleeyi bw'amakulu ehumi.” Mani elyuuba nilikobola enyuma obuleeyi bw'amakulu ehumi, ak'ebiha bi yali n'amalire ohwihirira.
Olweembo lwa Hesekia lw'ohweebasa
9Luno nilwo olweembo lu Hesekia omutuki wa Buyudaaya yandiika n'amalirire ohuwona obulwaae bwae:
10Ndali mboola endi mu mwaaka kwa akatikaati w'obulamu bwaange
nikwo kuhoyere ohutuliraho mu syaalo muno;
njie hu biruwa by'Emakoombe
mbeeyo emyaaka kyaange kidoong'ereyo.
11Ndali nimboola endi, haba siinjia ohubona Omwaami
mu syaalo sy'abalamu daawe;
haandi siinjia ohubonaho omuundu yeesi
mwaabo abamenya hu syaalo huno.
12Obulamu butulireo mani bwanduswaho
koti esikaali sy'omwaayi;
obulamu bwaange buweereo koti engubo hu sicharaani sy'omunabi;
buhalaakwe koti oluwuusi sa;
ohutula echuli ohwoola esiro, mbwereeremo elalira amaani.
13Esiro syoosi ndekanyiirisa olw'obuchuuni,
mbulira koti edalang'i yimenena amakuumba kaange koosi;
ohutula esideete ohwoola esiro, Nasaae ali koti omalawo obulamu bwaange.
14Ndabechaanga ao nimiinduha koti eyoni,
Ndalira koti eguugu.
Emoni chaange chooboha olwohutiingaala aakulu.
Ewe Omwaami, ndi mu masira. Ewe yiicha wumonie!
15Nae ese ndaboole siina syeene? Olwohuba Omwaami amalire ohulomaloma naange,
haandi omweene niye osiholere.
Endoolo choosi chiimbweeremo
olwohuba engisa yiri hu mwooyo kwaange.
16Ewe Omwaami, mu biindu bino byoosi nimwo mu baandu banyoola obulamu,
haandi mu ebyo byoosi nimwo mu syesi nyoola obulamu.
Ewe Omwaami, monie mani mbe omulamu!
17Eee, syahoonya muno ohuba neende engisa
mbwe ndaaba neende engisa enyiingi;
nae ewe Omwaami waawonia obulamu bwaange
ohutula mu liina lyohusihirira,
olwohuba wundeheremo
ebyonoono byaange byoosi.
18Olwohuba Emakoombe abulao onyala ohuhweebasa,
mu syaalo sy'abafu, abulao onyala ohuhufumia daawe;
kata sa abachia aasi mu ng'ani haba sibanyala ohusuubira
obweesikwa bwao.
19Nae abalamu, abalamu nibo abahweebasa,
koti lu ndi ohuhola enyaanga yino
Balaataang'ene baana nibo abeekesa abaana
obweesikwa bwao.
20Omwaami achia ohuumonia,
mani obulamu bweefwe bwoosi
huchia ohuhweemberaanga nihuhubba obuhana,
mu nyuumba y'Omwaami.
21Bulaanu Yisaaya yali n'aboolere ati, “Lehe babukule ebyaamo by'omusabbiibbu, mani babisehule, babite hu sikoonjo, mani Hesekia awone.” 22Hesekia yesi yali nateebere ati, “Halolero siina ahaneekese hati njia ohuniina njie mu nyuumba y'Omwaami?”
©Bible Society of Kenya, 2019
©Bible Society of Uganda, 2019