Yisaaya 36
36
Abasiria batiisa-tiisa Yerusalemu
(2 Abat 18:13-27; 2 Biha 32:1-19)
1Olwoola, mu mwaaka kw'ehumi neende kine Hesekia naali omutuki wa Buyudaaya, Senakeribbu omutuki wa Asiria yaseeta ebiko byoosi ebya Buyudaaya ebyali nibyasitwa olukaka lw'amaani mani yaabiingira. 2Mani omutuki wa Asiria yatuma Rabbusake omubalabanu muhuluundu w'eye lyae, atule Lakisi achia Yerusalemu eyiri omutuki Hesekia, neende eye hoongo. Mani Rabbusake niyolayo, yeema hu ndulo w'omutaro kw'ediba ly'amaachi ly'emukulu, eliri hu ngira hoongo eyichia mu Mukuunda kw'Omuholi w'Engubo. 3Mani abachweenufu Bayudea badatu beecha ohumwaakaanira: Eliakimu omwaana wa Hilikia, owali n'ahulira edooho, neende Sebbina, omwandiika mu dooho, neende Yowa omwaana wa Asafu, owali omubiihi w'ebyandiiko.
4Mani Rabbusake yababoolera ati, “Boolere Hesekia muti, ‘Omutuki muhuluundu, omutuki wa Asiria ahuteeba ati: Obugumu bwao obwo bweemere hu siina syeene?’” 5Ewe obaasa oti ohulomaloma emboosi choong'ene nihwo ohunaakobole mu bweyaango bw'amakesi neende amaani k'ohulwaana ebiita? Wiina mweene yi weesika okera woola ohunjeemera? 6#Esek 29:6,7.Bona, oli ohweesika Misiri, omudiiro kw'ekada lyafuniha elyo, elichia ohufumita omuhono kwa buli muundu yeesi olyesiraho; omutuki wa Misiri ali atyo eyiri buli muundu yeesi omwesika. 7Nae niwumboolera oti, “Hweesika Omwaami Nasaae weefwe,” oyo haba siniye yi Hesekia yatusaho obweyaango buhoongo bu beenamiraangamo, neende alutaari chae, Hesekia oyo yaboolera abaandu bomu Buyudaaya neende abomu Yerusalemu ati, “Munenamiraanga mu moni wa alutaari yino yoong'ene”? 8Mani bulaanu haambawosereyo mu liita ly'Omwaami waange, omutuki wa Asiria; njia ohuhuberesa efaraasi elifu chibiri, ewe n'onyala ohunyoola abeerusi b'efaraasi echo. 9Ewe otanyala ohulwaania kata mulala hu bachweenufu b'omwaami waange omaliirihayo obukata, mani niweesika Misiri olwohuba ebigaari neende olwohuba abeerusi b'efaraasi? 10Mani obaasa oti Omwaami siniye owuhoonyera ohuseeta esyaalo sino mani sisihirise? Omwaami yamboolera ati, Chia oseete esyaalo sino, mani osisihirise.
11Mani Eliakimu, Sebbina, neende Yowa nibaboolera Rabbusake bati, “Huhwekweeda, olomalome naafwe mu, olwohuba hulumanyire; nae otalomalomaho naafwe mu Luibburania abaandu bali hu sida nibawulira.” 12Nae Rabbusake n'akobolamo ati, “Mubaasa muti omwaami waange niye owaandumire ohuboolera omwaami weeng'we neende eng'we mweng'ene emboosi chino? Yaandumire ohuboolera neende abasaacha behaale hu sida, abanoole ohulya obunyaka bwaabwe bweene haandi neende ohung'wa amaanyi kaabwe keene koti lu eng'we muchia ohuhola.”
13Mani Rabbusake n'asiingira niyeema mani nahuumulira mu kono ly'aakulu mu lulimi Luyiibburania ati: “Wulire omutuki muhuluundu, omutuki wa Asiria by'aboola! 14Omutuki oyo abalabula ati: Hesekia alehe ohubabachirisa, olwohuba haba saanyala ohubawonia.” 15Haandi Hesekia ahaye ohubaseendaseenda ohweesika Omwaami n'aboola ati, “Omwaami achia ohubawonia haandi esiko sino haba sisinaakwe mu mahono k'omutuki wa Asiria.” 16Mutatekeeresa ebya Hesekia, olwohuba omutuki wa Asiria aboola ati: “Mube silala naange mani mutule erwaanyi w'esiko mwiiche yi ndi; buli muundu hweeng'we achia ohulya ebyaamo by'omutuli kwae, neende ebyaamo by'emisabbiibbu kyae, haandi buli muundu achia ohung'wa amaachi komu sulo chae cheene; 17ohwoola lu ndaheechere mani ndabayira mu syaalo sifwaanana neende esyaalo syeeng'we, esyaalo sirimo engaano neende efiini, emigaati neende endalo ch'emisabbiibbu.” 18Mweliinde, ataali ao, Hesekia achia ohubakosya-kosya n'aboola ati, “Omwaami achia ohutwonia.” Yiruwo hu banasaae bomu byaalo owali nawonisyeho esyaalo syae ohutula mu mahono k'omutuki wa Asiria? 19Bali yeena bweena banasaae ba Hamati neende Aripaadi? Bali yeena banasaae ba Sefarifaimu? Abo banasaae ba Samaria, bawoniaho esyaalo syaabwe mani basiindusa mu mahono kaange? 20Wiina mweene hu banasaae bomu byaalo ebyo owali nawoneeseho esyaalo syae ohusitusa mu mahono kaange, hu Omwaami anyale ohuwonia Yerusalemu ohusitusa mu mahono kaange?
21Mani nibawuleera nibatakobolamo kata emboosi ndala, olwohuba omutuki yali n'abalagiire ati, “Mutamukobolamo kata nabudiidi.” 22Mani Eliakimu, omwaana wa Hilikia, owali omuhuluundu w'edooho, neende Sebbina, omwandiiki, neende Yowa omwaana wa Asafu, owali omubiihi w'ebyandiiko, nibeecha eyiri Hesekia nibatanduule engubo chaabwe, mani nibamuboolera emboosi chi Rabbusake yalomaloma.
©Bible Society of Kenya, 2019
©Bible Society of Uganda, 2019