Yisaaya 35
35
Engira y'obwoolerefu
1Esiparara neende esyaalo syoomu byahasangaale,
sichiimi syahasangaale mani syaamuliha ebimuli;
koti mu sichaha.
2Esiparara syahamulihe ebimuli biingi muno,
sirisangaala nisyehoya haandi nisyeemba.
Syahanyoole oluyaali lwa Lebbanooni.
Esiparara syahabe esilai koti endalo cha Karimeeli neende Saroni.
Abaandu boosi bahabone oluyaali lw'Omwaami,
bahabone amaani neende obunyala bwa Nasaae weefwe.
3 #
Abaib 12:12. Dinyie amahono kataali neende amaani,
haandi yomiise amahuumbo kateengereha.
4Boolere abo abaweeremo omwooyo muti,
“Gume, mutatya daawe!
Bone, Nasaae weeng'we
achia ohwiicha ohubawabina,
neende ohusaandya abasuku beeng'we.
Achia ohwiicha mani abaonie.”
5 #
Mat 11:5; Luk 7:22. Emoni ch'abawofu chahaliimbule,
neende amatwi k'abadiimbe kaheekuhe.
6Omulema yahadumakale koti emboongo,
haandi omuundu owayaanda olulimi yaheembe hulw'esangaalo.
Olwohuba emyaalo ky'amaachi kyahasoohe mu siparara.
7Omusenye kusaamba mu siparara kwaheehole ediba ly'amaachi,
haandi eloba lyoomu lyaheehole esulo ch'amaachi.
Abuundu yi mabbwe kali nikamenyamo syahehole esa
haandi obunyaasi bwaheehole amakada neende amadutu.
8Engira emaambali yahalimweyo,
eyahalaangwe yiti, “Engira Njolerefu.”
Abulao omuhola-mbi yeesi owahabite hu ngira eyo,
haandi abasiru haba sibahayiloondeho.
9Edalang'i haba sichahabeeyo daawe,
kata esolo njalaba haba sichahabiteengeho hu ngira eyo;
haba sichahanyoolweyo, nae abo ba Omwaami anunuule, nibo abahayikeendereengeho.
10Mani abaandu ba Omwaami yahanunule nibo abahakobole,
mani beecha mu Siyooni nibeemba.
Bahabe neende esangaalo endaalo choosi pe.
Bahasangaale haandi beehoya,
mani engisa yaabwe neende ohweyendehera hwaabwe hwoosi hwahaweereo elalira.
©Bible Society of Kenya, 2019
©Bible Society of Uganda, 2019