Yisaaya 34
34
Nasaae yahasaandye abasuku bae
1Sude aambi, eng'we abaandu bomu syaalo syoosi,
eng'we abaandu, tekeerese!
Lehe esyaalo neende buli baandu basimenyeremo, batekeerese;
esyaalo, neende abo boosi abasitulamo.
2Olwohuba Omwaami anyoolereere ebyaalo byoosi,
haandi adiriire ab'amaye babyo boosi etima,
mani alehere sa beetwe, basihirisirwe elalira.
3Abaandu bachia ohwiitwa bahasukunwe sa erwaanyi,
mani emilambo kyaabwe kyahafuunde kyaawunya esifuundu;
mani engulu chosi chahahulukuse amabaanga kaabwe.
4 #
Mat 24:29; Mrk 13:25; Luk 21:26; Hubwi 6:13,14. Mani elyuuba neende omwoosi neende eng'ining'ini byahanyoonyobohe byehola olufu,
haandi ekulu lyaheefuumbe-fuumbe koti olupapula lusiriingise.
Mani eng'ining'ini chahahuhumuhe chaakwa aasi,
koti lu masaafu kahuhuumuha nikakwa ohutula hu misabbiibbu,
oba ohutula hu mutuli.
5 #
Yis 63:1-6; Yer 49:7-22; Esek 25:12-14; 35:1-15; Amos 1:11,12; Oba 1:1-14; Mal 1:2-5. Olwohuba Omwaami oli muukulu atekeehe olugaanga lwae;
bone, luli ohwiiha hu Edomu ohuheenga omusaango,
lusihirise abo boosi abahengeerwe omusaango ohubahira.
6Olugaanga lw'Omwaami lwaheebaheho amabaanga;
neende amasinya k'abaandu,
koti lwaheebahaho amabaanga k'amakoondi madoto neende ak'embusi,
neende amasinya kohuufuko k'ekoondi miiku.
Olwohuba Omwaami achia ohuyaana esiyaanwa sino mu siko sya Bbosura,
neende ohwiita abaandu baangi muno abomu syaalo sy'Edomu.
7Abaandu baheetwe neende eng'oombe ndaawu njalaba,
neende emoosi alala neende endaawu ch'amaani.
Esyaalo syaabwe syahaahanye neende amabaanga,
mani eloba lyaabwe lyaleenya amasinya.
8Olwohuba luliwo oludaalo lu Omwaami achia ohwetungiraho,
omwaaka kuyahetungireho bi basuku bae bahola hu Siyooni.
9Mani emyaalo ky'Edomu kyaheehole ewula,
haandi eloba lyasyo lyahabale koti eliriho obunyotera;
esyaalo syoosi syahaaduhe koti ewula.
10 #
Hubwi 14:11; 19:3. Esiro neende esideete, omuliro haba sikwahasime;
syahanioheenge omwoosi endaalo choosi.
Endaalo choosi, esyaalo esyo syahasihe;
haandi abulao omuundu yeesi owahasibiteho naasihalakaniamo.
11Engosya neende amahoofwa nibyo ebyahabe ebyeene syaalo esyo,
amahirihiihi neende awudu nibyo ebyahamenyeengemo.
Omwaami yahasiteemo ohudoondobana,
mani syaheehola esitaalimo obuhoonyi bwoosi.
12Esyaalo esyo haba sisyahabeemo obutuki bwoosi,
haandi abeemeresi basyo bosi haba sibahabeeo daawe.
13Enyuumba chamwo chahameremo amawa;
oluhoni lwahamere mu madooho neende mu biko byasyo.
Mani amabbwe neende apodo
nibyo ebyahamenyeengemo.
14Esolo ndeende nichio echahabukaananeenge neende eng'u byoong'ene,
haandi ebihyeeno byahalaanganireengemo;
eee, kata ebisyuuhira-banaabi byahakonyeenge owohubuluhira.
15Eyo niyo yi mahirihiihi kahoombaheenge ebiyu byako nikateera amaki
nikaalula obumwiinyu bwaako, mani kaliindaanga obumwiinyu obwo ohwoola lu buhuha.
Eee, eeswi chahebuusireyo,
buli yitula neende eyaasye.
16Koonye mu sitabo sy'Omwaami mani musomemo mubone muti:
Siyahabeeo esiloonge kata silala syoosi esyahawumeo;
haandi sisyahabeeo esisaacha sibula esyaasye sihasi. Olwohuba Omwaami niye olagiire bibecheenge bityo,
mani Mwooyo wae niye owahabibuuse alala.
17Omwaami niye ochia ohukabulamo esyaalo esyo,
omweene niye obereese buli muundu omukabo kwae;
mani esyaalo esyo syahabe esyaabwe endaalo choosi,
bahasimenyeengemo endaalo choosi.
©Bible Society of Kenya, 2019
©Bible Society of Uganda, 2019