Yisaaya 30
30
Ohweesika Misiri haba sihuhoonya
1Omwaami aboola ati, “Chibaakaanire abaana bajeemu,”
“abaloondakana neende endekeha, nae haba siyaange;
haandi abahola endagaano, nae ese haba sifukiirisania nayo,
nibameeda esyonoono hu sibi.
2Abo abachia Misiri ohusaba obuhoonyi,
nibatandeteebereho.
Beesikire amaani ka Misiri,
bachiire eyiri omutuki wa Misiri ohusaba abaliinde.
3Sakira obuliindi bw'omutuki wa Misiri yi muli bwahabadiise esoni,
haandi ohweesika ohuliindwa neende Misiri, hwahabaleetere amasira.
4Kata ayahaba mbwe bawamwaanda baabwe bali Sowaani
haandi amaye kaabwe koolere Hanesi,
5buli muundu womu Buyudaaya yahadiirwe esoni
olwohweesika abaandu babulamo obuhoonyi,
abatanyala ohubaleetera obuhoonyi oba engaanga,
nae ababaleetera esoni neende ohuchalaala.”
6Yino niyo emboosi ya Nasaae eyidiira hu solo cha Negebbu.
Bawamwaanda babita mu syaalo sy'ebidinyu neende amasira,
esirimo edalang'i saacha neende ehasi,
neende endemo ch'obusiba neende ebinamiindi bibburuha.
Badwiiha eby'obuyiinda byaabwe hu suhiri,
neende ebiindu byaabwe by'engaanga y'aakulu hu matuumba k'engamia,
babiyirire abaandu abatachia hubahoonya.
7Olwohuba obuhoonyi bubanaanyoole ohutula Misiri bwa bihaya haandi bubulamo esiindu sibuhoonya.
Mani sakira naanga Misiri endi,
“Esisyuuhira Banaabi, Rahabbu esitaluma.”
Abaandu abajeemu
8Mani bulaanu chia osyandiike hu sipaande nibabona,
haandi osyandiike mu sitabo mwoosi,
sibe obuloli bw'endaalo choosi
ohwomiisa obujeemu bw'abaandu bano.
9Olwohuba abaandu bano bajeemu nibo,
buli siha babacha,
haandi haba sibawulira
engeraka y'Omwaami.
10Baboolera abaandu baboneherwa bati, “Mwaakamire ao ohuboneherwa”;
nae abanabbi bababoolera bati, “Mutatuboolera ebyadyeeri,
ohutusaho mutuboolere ebiindu bitusangaasa byoong'ene.
Mulaangirire eby'obubacha.
11Tuweere-eyi, mutwehiingire mu moni,
Mulehere ao ohutuboolera ebidiira hu Omwoolerefu wa Yisiraeli.”
12Mani sakira Omwoolerefu wa Yisiraeli aboola ati,
“Olwohuba mulekereese emboosi yino,
mani mwasiima ohujooga neende ohuhola ebidoondobanu,
mani mwesika ebyeene ebyo.
13Mani sakira munieere omusaango
okubaholere mwaaba koti esida syadiihe, esirimo olwaafwa, haandi esiri aambi ohulikuha.
Muchia ohubbwomooha mukwe aasi bwaangu muno.
14Mwahaadihe koti endamu y'eloba
eyinyonyoboolwe bubi muno
mani kata esikoongolyo syao syahaya ohudoong'ao
esy'ohukiingiraho omuliro ohutula mu mayika,
oba ohudaya amaachi mu sisima.”
15Olwohuba Omwaami Nasaae, Omwoolerefu wa Yisiraeli aboola ati,
“Mukobole yiindi, muwuluuhe mani ese njia ohubawonia.
Mwomiire mani mundeesike hu munyale ohuba ab'amaani.”
Nae eng'we muhayire!
16Nae eng'we muboola muti,
“Haba! Huchia ohwiirusa efaraasi bwaangu muno,”
mbwe mani sakira huchia ohwiiruha bwaangu abasuku beefwe huwone;
mani, “Muchia ohwiirusa efaraasi chi mubaasa muti chiiruha muno,”
mani sakira ech'abasuku babaloondaho chichia ohuba neende embiro ohuhiraho echeeng'we.
17Mulala niyahabaloondeho, eng'we mwaheruhe elifu.
Bataanu nibahabaloondeho, olwo eng'we mweesi-mweesi mwaheruhe
ohwoola lu mweesi mwahadoong'e
koti omusaala kubaanihaho ebbeendera okuli aakulu w'olugulu,
koti esilolero hu sigulu.
18Omwaami abaliindire naadaha ohubakwiira esisa.
Omwaami mweene yetekeehe ohubakwiira esisa.
Olwohuba Omwaami niye Nasaae ohola eby'obwadyeeri buli siha;
mani abo boosi abamweesika b'ehabi nibo.
Nasaae yahaberese abaandu bae ehabi
19Eee, eng'we abaandu ba Siyooni abamenya mu Yerusalemu; haba simuchia hukobolamo ohulira amasika. Omwaami achia ohubakwiira esisa. Niyahawulire amaliro keeng'we sa ati, yahabakobolemo. 20Kata Omwaami yahabaleha mwasaanda haandi mwaabona engisa, nae omweene niye owahabeekese. Haandi niye Omweekesa weeng'we. 21Mani muchia ohuwuliraanga ekono lyae nilibaloondaho niliboola liti, “Yino niyo engira yi muhoyere ohukeenderaho,” nimuba nimuhyamiire hu muhono muluungi oba omukaada. 22Mani olwo mwahasihirise ebiloongaloongwe ebyabwiihwaho efeesa neende ebiloongaloongwe ebyabwiihwaho esaabbu. Muchia ohubyetusaho mani mubisukune koti ebiindu bitali ebyoolerefu, nimuboola muti, “Tuweere-eyi!”
23Mani buli lu munatakeenge emwo yeeng'we, Omwaami anaakwiseenge efula, mani yimera, yihula. Munyoole ekesa elai haandi eliingi. Ebyaayo byeeng'we binayireenge mu lwayiro luhoongo. 24Haandi endaawu neende esuhiri chi munaalimiseenge mu ndalo, chinaliicheenge obunyaasi buhiramo obulai, obulimo omuunyu. 25Mani hu ludaalo lu biko by'abasuku byahawaambirweho haandi abaandu babyo beeterwaho, emyaalo ky'amaachi kyahahulukuse nikitula hu buli lugulu neende hu buli sigulu. 26Hu ludaalo lu Omwaami yahaboyereho ebinyubulule by'abaandu bae, mani yawonia ebikoonjo byaabwe, omwoosi kwahaaduhe koti elyuuba, haandi obulafu bw'elyuuba bwahabe obuungi, koti obulafu bw'endaalo chitaanu-na-chibiri mu ludaalo lulala.
Nasaae achia ohusaandya Asiria
27Bone, obunyala neende eliita ly'Omwaami mbira biri eyale,
omuliro neende okwoosi kusito byeekesa obwaalaba bwae.
Emboosi ch'alomaloma chiri koti omuliro kusaamba,
haandi olulimi lwae luli omuliro kusihirisa.
28Omuuya kwae ku ayeera kuli koti omwaalo kuhulukusa
okwoola mu kosi;
ohuchuunga ebyaalo neende esichuungo sy'ohunyirisa
neende ohwaakamia endekeha chaabwe mbi echidoondobania abaandu.
29Mani eng'we, abaandu ba Nasaae, mwaheembe olweembo, koti lu mweembaanga mu siro sy'esidyaalo syoolerefu; haandi mwahasangaale mwaaba koti abo abakeendera hu lweembo lw'erere nimuchia hu Lugulu lw'Omwaami, eyiri Olwaanda lwa Yisiraeli. 30Mani Omwaami yahakere abaandu boosi bawulire ekono lyae ly'oluyaali; haandi yaheekese obwaalaba bwae. Wahabeeo enimi ch'omuliro kusihirisa buli siindu, neende ebimyeesuha bya buli ngeri, neende ohwaduluhana neende omuyaka kw'amaani neende efula y'amakina. 31Abasiria bahatye nibawulira ekono ly'Omwaami, haandi bahabone koti lu yahabasaandie neende amaani k'obwaalaba bwae. 32Mani buli endawusi yohusaandya yi Omwaami yahabahuye, abaandu ba Nasaae nabo bahabe nibaliindiriire neende enyembo ch'eng'oma neende obuhana. Omwaami mweene niye owahalwaanise abasuku Abasiria abo, niyehoonyera ebilwaaniso bitiisa. 33Ohutula hale bweene, abuundu watekehebwa yi muliro muungi muno kwahasaambire obwaami bw'Asiiria. Abuundu ao woolerefu haandi sitakalafu, esirimo omuliro muungi neende eehwi nyiingi. Omwaami yahafuute omuuya kuli koti obulimi bw'esibbiriiti, mani kwaadusa omuliro.
©Bible Society of Kenya, 2019
©Bible Society of Uganda, 2019