Yisaaya 31
31
Nasaae yahalwaanilire Yerusalemu
1Chibaakaanire abo abachia Misiri ohukoonya obuhoonyi
nibeesika efaraasi chayo!
Abeesika ebigaari byayo olwohuba mbwe biingi nibyo
haandi abeesika abeerusi b'efaraasi echio olwohuba mbwe b'amaani muno,
nae haba sibesika Omwoolerefu wa Yisiraeli
kata sa ohweteeba hu Omwaami!
2Nae omweene amanyire ati mukesi niye haandi niye oleeta amasira,
haandi sachusa-chusa emboosi chaaba n'aboolere;
nae achia ohusaandya abonooni,
neende abo abahoonya abonooni abo.
3Abamisiri baandu sa, haba si Nasaae nibo daawe;
haandi efaraasi chaabwe chifwa sa, haba simyooyo kitafwa.
Omwaami niyahakolole omuhono kwae,
ebyaalo by'amaani bihoonya byaheegumule, mani ababahoonya abo baakwa,
mani boombi baasihirisirwa alala.
4Olwohuba Omwaami yamboolera ati,
“Koti edalang'i oba edalang'i njere lu yiwuluhuma niyiitire esolo yayo,
mani nibalaanga abaayi ohuyiseeta,
edalang'i eyo haba siyitya nibayiyokerera
kata sa neende nibayayulira mu amakono kaabwe kahiramo obuhoongo,
mani nilwo lu Omwaami w'Obunyala achia ohwiiha
ohulwaanira hu Lugulu lwa Siyooni neende hu sigulu syalwo.
5Koti luu yoni libeengera hu siyu syalyo ohuwonia obumwiinyu bwaalyo, nilwo lu Omwaami w'Obunyala
achia ohuliinda Yerusalemu;
achia ohusiliinda haandi asiwonie,
achia ohusiyabina asiwonie.
6“Eng'we Abaisiraeli, niise yimwajeemera haandi yimuyiinganianga. Nae bulaanu mukaluuhane mukobole yiindi. 7Olwohuba oludaalo lwahoole lu buli muundu yahasukune eyale ebiloongaloongwe byae by'efeesa neende ebiloongaloongwe byae by'esaabbu, bi mahono kae kaholeraanga mu bwonooni bwae.
8“Abasiria baheeterwe olugaanga, nae haba sibaheetwe neende obunyala bw'abaandu;
ohutusaho olugaanga lweene sa, ataali abaandu nilwo olwahabeete;
mani Abasiria baheeruhe ebiita;
haandi abaana baabwe baraaga bahawaambwe.
9Mani omutuki waabwe yibeesika yaheeruhe n'atiire,
haandi abachweenufu bae bahatye muno mani baaleha ao ebbeendera yaabwe.”
Omwaami yibeenamira mu Siyooni,
haandi yibasaambira ebiyaanwa mu Yerusalemu, nilwo lu aboola.
©Bible Society of Kenya, 2019
©Bible Society of Uganda, 2019