Yisaaya 29
29
Amasira kahanyoole Yerusalemu
1Chihwakaanire ewe Arieli, Arieli,
esiko si Daudi yoombahamo eyeema lyae!
Meeda emyaaka hu myaaka;
haandi lehe ebidyaalo biloondehane sa.
2Nae Nasaae achia ohuleeta amasira hu Arieli,
yichia ohubaao ohulira neende engisa,
esiko esyo syoosi sichia ohuba koti amahuluundu ka Arieli lu keekesa, alutaari yaange yeene.
3Njia ohuba omusuku weeng'we, mani mbeebodoohanie,
njia ohubaseeta neende eminaara ky'ohuliindiraho
haandi njia ohuyabaho ameena k'ohwekisamo.
4Yerusalemu, wahabe koti esihyeeno
esiteemaho ohulomaloma
nisiri aasi mu loba;
ekono lyasyo ly'aasi muno,
ohutula eyomu lufu.
5Nae esidiiyiha sihoongo esy'abasuku bao syahadumuulwe syawaao koti olufu,
haandi ebidiiyiha byaabwe byaalaba byahadumuuhe koti omuhuuchi.
Haandi bino byahabeeo mu siha sidiidi muno.
6Nae Omwaami w'Obunyala
yahahuwaabine niyehoonyera ohwaduluhana neende ohudengaana hw'esyaalo, neende ekono ly'aakulu
neende esiifuusye neende enimi ch'omuliro kusihirisa.
7Mani amaye k'ebyaalo biingi ebilwaania Arieli,
abo boosi abasilwaania neende abalwaania ebiko byasyo basidiisa engisa,
bahaweo koti esilooto, oba koti esiboneherwa sy'esiro.
8Koti lu muundu olumwa enjala anyoola ebilooto naali ohulya,
mani nasimuha neende enjala yae natekuute,
oba koti omuundu olumwa obuluwo anyoola ebilooto naali ohung'wa
mani nasimuha mu ndoolo, obuluwo nibumuli bubi, omumiro nikwoomereere,
mani amaye k'ebyaalo biseeta ohulwaania Olugulu lwa Siyooni
kosi kahabe katyo.
Ohulabula hutadeebwaho
9Mube ao mani musiruwale,
mwemeede mu moni mani mweewofuse!
Mwemeese, nimusisiiri ohung'waho amalwa;
daandaamire, nimusisiiri ohuhoombaho ebimeesa!
10 #
Rom 11:8. Olwohuba Omwaami abateeremo
omwooyo kuleeta endoolo nyiingi,
haandi ababwiihire mu moni, eng'we abanabbi
haandi ababwiihire emitwe, eng'we abalakusi.
11Mani amahuluundu koosi ak'embonehera yino, eng'we kabeeholeere koti emboosi ch'esitabo sibaboyereho esifuundiho. Mani nibasiberesa omuundu omanyire ohusoma, nibaboola bati, “Soma sino,” akobolemo ati, “Haba siinyala, olwohuba siboyerweho esifuundiho.” 12Nae nibaberesa esitabo esyo omuundu otaamanyire ohusoma, nibaboola bati, “Soma sino,” akobolamo ati, “Haba siimanyire ohusoma daawe.” 13#Mat 15:8,9; Mrk 7:6,7.Mani Omwaami yaboola ati,
“Olwohuba abaandu bano basuda aambi naange neende eminwa kyoong'ene
haandi baanjisamo oluyaali neende emboosi choong'ene,
nae emyooyo kyaabwe kiri eyale naange,
kata ohunyinamira hwaabwe, baloondehana sa neende emiduunga ki baandu babalagira.
14 #
1 Kor 1:19. Mani sakira, bone, njia haandi
ohuhola mu baandu ebiindu by'amaya,
ebiindu by'amaani haandi ebiwuukisa.
Mani amakesi k'abaandu bakesi baabwe, kakoteo,
haandi ohuheengao hw'abachweenufu baabwe hukiswe.”
Ohusuubira ebilai biri mu moni
15Chibaakaanire, abo abebachirisa bati bakisire Omwaami endekeha chaabwe,
abo abaholera ebiindu mu siirima,
haandi abateeba bati, “Wiina otubona? Wiina otumanyire?”
16 #
Yis 45:9; Rom 9:20. Mukaluuhanisira elalira ebiindu!
Omuloongi w'endamu anyala ohukeranisibwa neende eloba li aloongera?
Esiindu siloongerwe si nyala syaboolera omuloongi wasyo siti,
“Haba siwanoonga”;
oba esiindu syaholwa syaboolera omuholi wasyo siti,
“Abulamo amakesi”?
17Koti lu nomanoma lu yiri eyiboola yiti, yidoong'ereo esiha sidiidi sa,
ohwoola lu Lebbanooni syahehole omukuunda mulai,
haandi omukuunda mulai kwaheehole esichaha.
18Ebiha ebyo nibyahoole, omudiimbe yahawulire
emboosi chi musomerwa ohutula mu sitabo,
haandi emoni ch'omuwofu oba mu siirima
chahaliimbuhe mani chichaake ohubona.
19Abaandu baloonga bahemeede ohusaangaalira mu Omwaami,
haandi abamanani baheehoyere mu Mwoolerefu wa Yisiraeli.
20Olwohuba omusuku otiisa yahamalweo haandi omulekeeresi yaakamisibwa;
haandi oyo oliinda sa ohwonoona yahasihiriswe.
21Nasaae yahasihirise abo ababachira abasyaabwe,
abo abakayira abaholi b'emisaango ohusaandisibwa,
neende abo ababoola eby'obubacha mani abaluungifu bahaya ohuheengerwa emisaango mubwadyeeri.
22Sakira Omwaami owanunula Abburahamu aboola ebidiira hu nyuumba ya Yakobbo ati:
“Ab'enyuumba ya Yakobbo haandi simwahadiiswe esoni,
haandi mu moni weeng'we simwahasamuuhe oluundi.” 23Olwohuba niyahaboneho abaana bae,
obunyala bwaabwe obuli nae,
bachia ohumanya eliita lyaange;
bachia ohumanya Omwoolerefu Mweene wa Yakobbo,
mani bachia ohwiisa oluyaali mu Nasaae wa Yisiraeli.
24Abo abasirusiru bahakobolemo amakesi,
haandi abo abekanyiirisa bahafukiirire babeekese.
©Bible Society of Kenya, 2019
©Bible Society of Uganda, 2019