Yisaaya 21
21
Ohuboneherwa hw'ohuwaambwa hwa Bbabbilooni
1Yino niyo emboosi yidiira hu siparara sisibiraane neende enyaanja.
Koti esiifuusye situlira mu siparara
mani syeeya mu Negebbu,
olwo nilwo lu masira kahatulire mu syaalo sy'amatichasi esiindi.
2Mbweene mu ohuboneherwa ebidinyu ebyahakweeo;
omuliichaki n'alichaka
haandi omusihirisi n'asihirisa.
Ewe eye lya Elamu, siingira oseete,
neende ewe eye lya Media, weesite webodoohanie;
ebidinyu byoosi bi Bbabbilooni syaleeta
Nasaae achia ohubyaakamya.
3Obuchuuni buunjita;
obuchuuni bumaambire,
buli koti engasi ch'omuhasi odaha ohwiibula;
nguunaame aasi endi haye ohubuwulira,
nae mbungaalire kata emoni chaange haba sichibona daawe.
4Olumbuuchu ludiirire, oluteengo lungwiiremo;
esiirima si mbeere nindekoomba
siinduliiremo amatiichasi.
5Bali ohutekeha esidyaalo,
baalire aasi emikeeka,
beehaale baalya, haandi baang'wa.
Eng'we abahuluundu b'amaye, musiingire,
mubahe engabo cheeng'we amafuta!
6Olwohuba Omwaami yamboolere ati:
“Chia, oteeo omuliindi,
alaangirire ebiindu byaabona.
7Naabona ebidiiyiha by'abaandu babiri-babiri abeerusa efaraasi,
abeerusa esuhiri, neende abeerusa engamia,
leha yehaliirise bulai,
yehaliirise bulai bweene.”
8Mani oyo owabona yahuumulira mu kono ly'aakulu ati:
“Ewe Omwaami, ese niinda ano
esideete syoosi,
haandi njihaale hu mulimo kwaange,
esiro syoosi.
9 #
Hubwi 14:8; 18:2. Nae bonaho, mbao beecha
abeerusi b'efaraasi babiri-babiri!”
Nae omuliindi yakobolamo ati,
“Bbabbilooni sikwiire, sikwiire;
haandi ebiloongaloongwe bya banasaae basyo
bidonyoohe-donyoohe, bikwiire aasi hu loba.”
10Eng'we abaandu baange Abaisiraeli, babeere babahunyeenya koti engaano yiri mu lwaanyi.
Nae bulaanu mbao mbaleetera emboosi ndai ohutula eyiri Omwaami w'Obunyala,
Nasaae wa Yisiraeli, ebyo bi mbuliire nibyo bi mbaboolera.
Emboosi yidiira hu Edomu
11Yino niyo emboosi yidiira hu Duma.
Yiriwo oli ohunaanga naali Seyiri,
“Omuliindi, esiro sibeere sitye?
Omuliindi esiro sibeere sitye?”
12Nae omuliindi n'akobolamo n'aboola ati:
“Obwiire buhya, haandi bweera;
nikali mbwe odaha ohundeeba haandi, teeba sa; kobola sa haandi.”
Emboosi yidiira hu Buwaraabbu
13Yino niyo emboosi yidiira hu Buwaraabbu.
Eng'we ebidiiyiha bya bawalukeenda by'Abadedani, abali mu biparara bya Araabbia.
14Eng'we abamenya mu Tema,
abo abeeruhira yi muli obuluwo nibubaluma, mubabereseenge esyohung'wa,
haandi abalumwa enjala mubabecheenge esyohulya.
15Olwohuba baba nibeeruuhe engaanga,
beeruuhe engaanga chimalire ohusowolwayo,
beeruhe obuyiingo bumalire ohubachoomiaho,
haandi beeruha ebiita biri aambi ohukwaao.
16Omwaami yeemao yamboolera ati, “Mu mwaaka mulala kwoong'ene, obuhunuufu bw'enono cha Abakedaari lwahasihiriswe. 17Abalasi b'obusaale bahiramo amaani haandi abachweenufu Bakedari nibo, mani abahaoneo bahabe abadiidi muno. Ese Omwaami, Nasaae wa Yisiraeli, nilwo lu mboolere.”
©Bible Society of Kenya, 2019
©Bible Society of Uganda, 2019