Yisaaya 20
20
Esilolero sy'omunabbi oli syeekenye
1Mu mwaaka ku omuhoongo w'eye kuyaseeteramo esiko sya Asudoodi, naatumirwe neende Sarigoni omutuki w'Asiiria, omuhoongo oyo yayiingira mani yawaamba esiko esyo. 2Mu siha nasilala esyo, Omwaami yali n'alomaloome neende Yisaaya omwaana w'Amosi, yaboola ati, “Chia, mani wefwaalulemo engubo y'egunia yiwefwaalire, haandi wefwaalule ebiraato mu makulu,” Yisaaya yahola atyo, yakeenda syeekenye n'atefwaalire ebiraato daawe. 3Omwaami haandi yaboola ati, “Koti omuhalaabani waange Yisaaya lwakeendere syeekenye n'atefwaalire ebiraato hulw'embaka y'emyaaka kidatu koti esilolero syeekesa ebyahakwe hu Misiri neende hu Etiopia. 4Mani engeri nasilala yityo niyo yi mutuki wa Asiria yahayire abawaambe ba Misiri neende aba Etiopia mu jeela, abayere neende abahuluundu, yahabayire syeekenye nibatefwaalire ebiraato, haandi amadaho kaabwe nikali alafu, mani esyo siyaambye Abamisiri esoni. 5Mani abo abali nibeesika Etiopia, neende abo abali nibehoyera mu Misiri, byahabaheehere mani badiirwa esoni. 6Ebiha ebyo nibyahoole, abaandu bamenya hu ndulo w'omwaalo bahaboole bati, ‘Bone, sino nisyo esikwiire hu baandu ba hwali nihweesika haandi ba hwali nihwiiruhiire yi bali batuhoonye ohutuwonia omutuki w'Asiiria! Mani efwe hwahakwe yeena?’ ”
©Bible Society of Kenya, 2019
©Bible Society of Uganda, 2019