Yisaaya 22
22
Emboosi chidiira hu Yerusalemu
1Yino niyo emboosi yidiira hu Hooho ly'Ohuboneherwa.
Siina esiboolereho, esikera mwaniina aakulu,
hu birama by'enyuumba, eng'we mweesi?
2Ewe esiko sichuule esiyoka,
esihayuuhe, haandi esichuulemo esangaalo.
Abaandu bao abeeterwe, haba sibeeterwe neende olugaanga
kata bafwiira mu biita.
3Abeemeresi bao boosi beeruhire alala,
mani bawaambirwe nibasisiiri ohulasaho ahasaale kata halala hati.
Abo boosi babanyoolere bawaambirwe,
kata abahaba niberuuhe boola eyale muno.
4Mani sakira ndaboola endi:
“Mutuleyo, haba simundingaalaho daawe,
muundehe ndire amasika kaange,
mutateemaho ohuunemya omwooyo daawe
olw'ohusihiriswa hw'abaandu baange.”
5Luno nilwo oludaalo lw'ohuteengereha, ohuyiingirwa, neende ohudiikaana
mu Hooho ly'Ohuboneherwa,
lu Omwaami Nasaae w'Obunyala atukwiisireho.
Ebida by'esiko syeefwe bifunaakwe,
haandi ohulira hw'abaandu badaha obuhoonyi huwuliirihanire mu ngulu.
6Mani abalwaani b'amaye abomu syaalo sy'Elamu badiirire obuyiingo neende obusaale
beechera hu bigaari neende hu faraasi,
haandi abalwaani b'amaye ba Kiiri beecha nibaboloole engabo chaabwe.
7Mani amahooho k'Abayudaaya akahiramo obulai, amahooho keechulamo ebigaari
abasikaari beerusa efaraasi nibeema mu moni w'esiruwa sy'esiko sya Yerusalemu.
8Mani ao nibamala ohwaambula ebilwaaniso byoosi ohutula hu Yuda.
Mani ebyo nibyali nibiweere, ewe wakisulayo ebilwaaniso ebyali nibyeekisa mu sichiimi. 9Mwabona ebituli ebiingi ebyadomolwa hu sida sy'esiko sya Daudi ebyali nibidaha ohutereeswa, mwachia mwaadaya amaachi kali mu sidiba sy'aasi. 10Mwabala enyuumba chali mu Yerusalemu choosi, haandi nimweemao nimulikula-likula echiindi hu munyale ohunyoola ebiindu bimwehoonyera ohwoombaha esida sy'esiko syalikuha. 11Mani nimuyaba omwaalo akatikaati w'ebida byoombi, yimubuusira alala amaachi komu sidiba sihale. Nae haba simwakoonya oyo owahola sino, kata mwadeebaho hu oyo owatekeha hale sino.
12Ebiha ebyo nibyahoole, Omwaami Nasaae w'Obunyala
niye olibalaanga eng'we ohulira amasika haandi ohuba neende esibeera,
mweebeke efwiiri haandi mwefwaale ebigunia.
13 #
1 Kor 15:32. Nae bone, mu siha sy'ebyo, eng'we muchaakire ohusangaala neende ohwehoya,
ohusiinja eng'oombe neende ohwiita amakoondi,
ohweliira enyama neende ohweng'weera amalwa, nimuboola muti,
“Lehe hulye haandi hung'we,
olwohuba hunyala ohwefwiira muchuli.”
14Omwaami w'Obunyala omweene niye owumbooleere ati:
“Mubwadyeeri bweene, esyonoono sino, eng'we haba sisyahabaleherwemo daawe,
ohwoola lu mulifwa,”
Omwaami Nasaae w'amaye nilwo lu aboola.
Ohulabula Sebbina
15Omwaami Nasaae w'Obunyala aboola ati, “Yicha mani ochie eyiri omuliindi wuno, ochie eyiri Sebbina, omuliindi ohulira edooho ly'omutuki, mani omuboolere oti: 16‘Oli neende siina ano, haandi oli neende wiina ano, hu onyale omweene ohweyabira eng'ani ano, ewe oweyabira eng'ani aakulu, haandi omweene werimira obumenyero mu lwaanda? 17Nae Bona, Omwaami achia ohuhusihulayo neende amaani, mani ahusukune eyale muno. Ewe omusaacha w'amaani. Achia ohuhudiira ahwomiise, 18mani ahuwuube, mani ahuduruuse koti omupiira mu syaalo sibaambalafu. Eyo niyo yiwahafwiire, haandi eyo niyo yi bigaari bi wesikaanga yi byahadoong'e. Wahadiise esoni ab'enyuumba y'omwaami wao. 19Omwaami achia ohuhutusa hu mulimo kwao, mani ahwaanula ohutula abuundu wao w'aakulu.’ ” 20Omwaami aboolera Sebbina ati, “Ebiha ebyo nibyahoole, ndahalaange omuhalaabani waange, Eliakimu, omwaana wa Hilikia, 21mani mufwaale engubo chao, haandi muboye neende oluhoba lwao, mani muberese obunyala bwao. Yahabe laatang'ene abaandu bali mu Yerusalemu neende mu Buyudaaya.” 22#Hub 3:7.Ndahamuberese obunyala bwoosi ohuliinda abomu nyuumba ya Daudi; haandi ndahamuberese obufuunguo, mani n'afungula, abulao onyala ohufuunga; haandu nafuunga, abulao onyala ohufuungula. 23Njia ohumwomiisa mu bwiihalo bwae obwo, koti esihoongo, mani abomu nyuumba ya laatang'ene bamwiisemo oluyaali. 24Nae bamwanaang'ina neende abanaluyia bae boosi bahamuteeho buli sidinyu syomu nyuumba ya laatang'ene. Bahamulereechereho koti endamu neende enuungiro birereechera hu lusereeswa. 25Omwaami w'Obunyala aboola ati, “Ebiha ebyo nibyahoole, esihoongo esyali nisyahomwa nisyomiirire, syahasihulwe; syahatemwe syaakwa aasi, haandi omugugu musito okwali hu mabeka kae kuchia ohudwiihulirwa elalira.” Olwohuba Omwaami niye olomaloome.
©Bible Society of Kenya, 2019
©Bible Society of Uganda, 2019