Yisaaya 19
19
Nasaae achia ohusaandya Misiri
1 #
Yer 46:2-26; Esek 29:1—32:32. Bino nibyo ebiindu bilomalomwa hu Misiri.
Bone, Omwaami yehaale hu maleesi keeruha embiro ch'amaani
mani yeecha mu Misiri.
Mani ebiloongaloongwe bya Misiri byahateengerehere mu moni wae;
haandi Abamisiri bahaweemo amaani.
2Mani njia ohusiingisa ebiita akatikaati w'Abamisiri neende Abamisiri basyaabwe,
mani bachia ohulwaana, buli muundu alwaanie mwaanang'ina,
haandi buli muundu alwaanie owaasye,
esiko sichia ohulwaania esiko syaasye, haandi obwaami bulwaanie obwaami bwaasye.
3Ndahadoondobanie ebiindu bi Bamisiri badaha ohuhola mani mbamalemo amaani,
haandi ebiindu bi batekeha ohuhola haba sibyahabitemo.
Bachia ohweteeba hu biloongaloongwe byaabwe neende hu balakusi baabwe,
neende hu misaambwa kyaabwe neende abo abalomalomera emisaambwa kyaabwe.
4Mani njia ohuleha Abamisiri
batukwe neende omwaami mwaalaba muno;
haandi omutuki mwaalaba muno niye ochia ohubatuka.
Omwaami w'Obunyala niye oboola.
5Mani amaachi k'omwaalo kwa Naili kachia ohuhama;
mani omwaalo kuchia ohuhama mani kwoomerere.
6Mani emitaro kyakwo kyahawunye,
haandi amasaga k'omwaalo Naili kuli mu Misiri kachia ohuhendeera kala-kala mani kahame,
amadutu neende amakada bichia ohubola.
7Sibulao esiindu syahamere hu ndulo w'omwaalo kwa Naili,
hu genya ly'omwaalo kwa Siira,
haandi buli siindu sibahataake hu ndulo w'omwaalo kwa Siira syahoome,
omuyaka kwahasiwuuche, mani syasihirira elalira.
8Abanaabi baheyendeherere mani baalira,
abo boosi abaloba mu mwaalo kwa Naili;
abo boosi abateka eng'eeni neende enjero
sibulao esiindu sibahanyooleenge.
9Abo abaluha ebiindu ohutula mu bukoohwe baheeralihire,
neende abo abasona engubo ch'epaamba byahabahae mani baateng'eng'ala.
10Abo abali esiiro ch'esyaalo bahasaasakule,
haandi abo abapaangiswaanga ohuhola emirimo baheewunamire mani babula esuubi lyoosi.
11Abeemeresi aba Sowani beeholere abasiru beene;
abakeraki baberesa omutuki wa Misiri amakesi bulaanu bakeraka eby'obusiru bwereere.
Muboolera mutye omutuki wa Misiri muti,
“Ndi omwaana w'abaandu bakesi,
omwaana w'abatuki ba hale?”
12Ewe omutuki wa Misiri, bulaanu abaandu bahuberesa amakesi bali yeena?
Leha nibamanyire, bahuboolere
esiindu si Omwaami w'Obunyala atekeheere Misiri.
13Abeemeresi ba Sowani baweeremo amakesi,
neende abo abahulira Mefisi bawuungire;
abo abahahoonyere enono
nibo abakosere Misiri.
14Omwaami abateeremo
omwooyo kuwuungya;
mani bakerere Misiri syadandaamira mu buli siindu sisihola
koti lu mumeesi aterera mu biindu byaasalire mani yadandaamira. 15Mani mu syaalo sy'e Misiri, sibulamo esiindu
si muundu muhuluundu kata omuyere, omweemeresi kata yibatuka, sibanyala ohuhola esirimo obuhoonyi.
Misiri syaheenamire Omwaami
16Ebiha ebyo nibyahoole, Abamisiri bahatye koti abahasi. Bahakweemo oluteengo mani batye nibahabone Omwaami w'Obunyala n'akoloole omuhono kwae ohubasaandya. 17Mani esyaalo sya Buyudaaya syahakwiise oluteengo mu Bamisiri. Buli muundu owahawulire nibabilomalomaho yahaticheenge sa, hulw'esichiririrwa si Omwaami w'Obunyala atekeehe ohubakwiisaho.
18Ebiha ebyo nibyahoole, wahabeeo ebiko bitaanu mu syaalo sy'e Misiri ebilomaloma olulimi Lukanaani, abaandu baamwo baheelayire nibafukiirira mu Omwaami w'Obunyala. Esiko silala hu biko ebyo syahalaangwe siti, “Esiko sy'Elyuuba.”
19Ebiha ebyo nibyahoole, wahabeeo alutaari y'Omwaami mu syaalo sy'e Misiri, haandi hu lwaaho lw'esyaalo esyo, hwahabeeho esiiro ly'ekina libombahira Omwaami. 20Obwo nibwo obwahabe obulolero bweekesa haandi obwomiisa buti Omwaami w'Obunyala ali mu syaalo sy'e Misiri. Abamisiri nibahafwiinyirirwe mani baalirira Omwaami, yahabatumire obuhoonyi bw'amaani ohubakayirira neende ohubawonia. 21Omwaami mweene yaheyekese mani Abamisiri bamumanye. Mu biha ebyo, Abamisiri bahamanye haandi beenamira Omwaami, mani nibamuyaanira ebiyaanwa neende ebiyaanwa bisaambwa. Baheeyamire Omwaami haandi booseresa obweyamo bwaabwe. 22Mani Omwaami yahasaandye Abamisiri, nae haandi yahawonie abo bayahabe nasaandiisye. Mani bahakobole eyiri Omwaami, mani yahawulire ohwekongooya hwaabwe haandi yahabawonie.
23Ebiha ebyo nibyahoole, wahabeeo engira hoongo ohutula mu Misiri ohuchia mu Asiria. Abasiria baheeche mu Misiri, haandi Abamisiri bachia mu Asiria. Mani Abamisiri neende Abasiria baheenamire Omwaami.
24Ebiha ebyo nibyahoole, Yisiraeli syahabe nasilala neende Misiri neende Asiria. Ebyaalo bidatu ebyo byahaberese esyaalo syoosi ehabi, 25olwohuba Omwaami w'Obunyala yahasibe ehabi n'aboola ati, “Misiri esyaalo syaange, neende Asiria esyaalo si ndaloonga, neende Yisiraeli esyaalo sindedoolere ohuba esyaange, binyoole ehabi.”
©Bible Society of Kenya, 2019
©Bible Society of Uganda, 2019