Yisaaya 15
15
Nasaae achia ohusihirisa Moabbu
1 #
Yis 25:10-12; Yer 48:1-47; Esek 25:8-11; Amos 2:1-3; Sefa 2:8-11. Omulaanga kuno kudiira hu Moabbu.
Olwohuba esiko Ari sisihiriiswe mu siro silala
Moabbu siwereyo;
olwohuba esiko sya Kiiri sisihiriiswe mu siro silala,
Moabbu siwereo.
2Abaandu ba Dibboni baniinire ebigulu
balirire eyo amasika;
Abamoabbu baayulira
ebiko bya Nebbo neende Medeba.
Ohweekesa engisa yaabwe,
beebekereho efwiiri neende ebirefu.
3Abaandu bali hu ngira befwaalire ebigunia;
aakulu hu birama by'enyuumba chaabwe, neende mu masang'aangira k'ebiko byaabwe,
buli muundu alira n'ahulukusa amasika.
4Abaandu ba Hesibboni neende aba Eleyale bahubba embuungu,
mani amakono k'enduulu kaabwe kawuliirihana ohwoolera elalira mu Yahasi;
mani sakira kata abasikaari ba Moabbu balira nibahuumula;
eholo yiboobba.
5Ese njuunirwa Moabbu;
abaandu basyo beeruhira Soyaari,
neende Egilaati Selisiya.
Abaandi baniinire esiniino sya Luhiti
baniina nibalira.
Abaandi badiirire engira ya Horonaimu
bahubba embuungu olwohuba bachia ohusihirira.
6Omwaalo kwa Nimurimu
kuhamire;
obunyaasi buli hu ndulo wakwo buhoohere, haba sibunyala huloha haandi,
sibulao esiindu si nyala ohukumeraho daawe.
7Mani sakira, ebiindu biingi bi banyoola
neende ebyo bi bali nibabiiha
bahabikiinge nibeeruha ohubiwonia
nibabitira mu Hooho lya Wiloowi.
8Olwohuba ohulira huwuliirihaniire buli abuundu
ohwebodoohania esyaalo sya Moabbu;
embuungu choolere mu Egilaimu,
embuungu choolere mu Beerelimu.
9Olwohuba amaachi ka Dibboni keechulamo amabaanga;
nae haandi Omwaami yahaleete amasira kahiraho ako hu baandu b'ebweene eyo.
Edalang'i chahalye Abamoabbu bahabe nibawonereo,
abo abahabe nibadoong'ereo mu syaalo sya Moabbu.
©Bible Society of Kenya, 2019
©Bible Society of Uganda, 2019