Yisaaya 14
14
Ohukobola ohutula mu buwaambe
1Omwaami haandi yahakwiire Yakobbo esisa, haandi yahadoole Abaisiraeli babe abaandu bae, haandi yahabakoboseyo bamenye mu syaalo syaabwe. Abateende baheeche bamenye alala neende abeechuhulu ba Yakobbo, mani baboomiirireho elalira. 2Abaandu b'ebyaalo biindi bachia ohuhalaabaniraanga Abaisiraeli mu syaalo syaabwe si Omwaami yababeresa; haandi Abaisiraeli bachia ohubabukula babe abahalaabani bawaambe baabwe, abasaacha neende abahasi sidubaanie. Abaisiraeli bahawaambe abo abali nibabawaamba, haandi bahatuke abo abali nibabeehalaho baabafwiinyirira.
Omutuki wa Bbabbilooni naali mu syaalo sy'emakoombe
3Ebiha byahoole Omwaami abawuluuse mubuchuuni neende mu husaanda neende muhudidiihana neende emirimo chibabayikaanga ohuhola. 4Mwahaduulireenge omutuki wa Bbabbilooni nimuboola muti:
“Omutuki mwaalaba akwiire!
Obwaalaba bwae bulaanu bwakaame!
5Omwaami afunaake endawusi y'abatuki babi,
yaakaamye obunyala bw'abatuka bubi,
6abo abasandyaanga abaandu neende obwaalaba
abatakamaanga ohubahuya,
abo abatukaanga ebyaalo neende etima
mani bahaya ohutalwaho daawe.
7Esyaalo syoosi-syoosi bulaanu siwuluuhire haandi siri mu muleembe;
mani buli muundu atunduuhe neende ohweemba hulw'esangaalo.”
8Emisaala migasya chisangaalire ohukwa ohwo,
emituumba kya Lebbanooni cheehoya nichiboola chiti,
“Ohutula nookwa aasi,
abulao omuundu otutuma daawe.”
9Ab'emakoombe aasi, beetekehe
ohuhubukaanira niwiicha,
basiingisa abo boosi-boosi abaliyo ohwiicha ohuhuheesa;
abo boosi abali abatuki b'esyaalo;
basingiire ohutula hu bisaala byaabwe by'obutuki
abo boosi abali abatuki b'esyaalo.
10Boosi-boosi bachia ohulomaloma nibaboola bati:
“Ewe wesi weeholere omukata koti efwe!
Okatayaliire elalira koti efwe!”
11Oluyaali lwao
neende enyembo chi bahwemberaanga hu buhana byoosi biisirwe aasi emakoombe;
weyaliise hu nyeende,
haandi enyeende nicho chi webwiihire.
12 #
Hubwi 8:10; 9:1. “Ewe Eng'ining'ini y'Echuli, Esulwe yomu Mabwiibwi!
Ewe hane wanuuhe ohutula aakulu waakwa aasi.
Ewe owasaandyaanga ebyaalo biindi,
otemerwe waakwa aasi hu loba.
13 #
Mat 11:23; Luk 10:15. Mu mwooyo kwao waboolaanga oti,
‘Njia ohuniina aakulu muukulu;
mbe aakulu w'eng'ining'ini cha Nasaae
njia ohuta esisaala syaange sy'obutuki aakulu;
haandi njia ohwiihala hu lugulu lw'ohuhung'aaniraho
oluli emukulu bweene.’
14Waboola oti ochia ohuniina obe aakulu w'amaleesi,
mani omweene wehole koti oyo oli Aakulu Muno.”
15Nae wiisirwe aasi Emakoombe bweene,
aasi mu lwaalo lw'Eliina.
16Abo abahubona bahutingaale
mani beteebe bati:
“Mani wuno niye omuundu owakeraanga esyaalo nisiteengereha,
haandi owadenganianga obwaami?”
17Wuno niye owakeraanga esyaalo nisiba esiparara,
haandi owawambaanga ebiko;
otaleehulaanga ababoye bae, naatabaleha baakobolaanga mu ngo waabwe daawe?
18Abatuki b'esyaalo boosi bahasiihibwe mu luyaali,
buli otulayo mu ng'ani yae;
19nae ewe wahasukunwe erwaanyi, eyale neende eng'ani yao,
koti esituluucho.
Bahahubwiiheho emilaambo ky'abasikaari babetera mu biita, baabafumita neende engaanga,
babasukune mu liina ly'amakina,
nooba omulaambo ku baseenakira mu makulu.
20Olwohuba wasihirisa esyaalo syao,
haandi weeta abaandu bao,
haba siwahasiihwe koti abatuki basyo.
“Lehe olwibulwo lw'abonooni
luhaye ohwiichuliswa!
21Mutekehere abaana bae ohwiitwa
hulw'ebibi bya bakuuka yaabwe,
bahaye ohusiingira mani batuka esyaalo,
haandi beechusa esyaalo syoosi neende ebiko byaabwe.”
Nasaae achia ohusihirisa Bbabbilooni
22Omwaami w'Obunyala aboola ati, “Njia ohuseeta Bbabbilooni mani sireetere ohusihirira, eliita lyaasyo lihaye ohudoong'ao, yibuleo omwaana yeesi owonao, kata omwiichuhulu. Ese Omwaami nilwo lu mboolere. 23Njia ohuhola Bbabbilooni sibe esyaalo syadebeeramo amaachi, mani amahirihiihi kachia ohumenyamo, haandi njia ohusyeyera neende olweyo lw'ohusihirira. Ese Omwaami w'Obunyala nilwo lu mboolere.”
Nasaae achia ohusihirisa Abasiria
24 #
Yis 10:5-34; Nah 1:1—3:19; Sefa 2:13-15. Omwaami w'Obunyala yechubire n'aboola ati:
“Koti lu tekeehe,
nilwo lu sichia ohuba,
haandi koti lu heengereo,
nilwo lu sinaholehane.
25Njia ohwiitira Abasiria mu syaalo syaange,
haandi mbaseenakire mu makulu hu ngulu chaange.
Olwo ekoombo libababoyaho lyahabatuleho,
haandi omugugu musito ku babadwiiha kuchia ohutula hu mabeka keeng'we.”
26Sino nisyo esichiiririrwa si tekeehe
esidiira esyaalo syoosi;
haandi ngoloole omuhono kwaange
hu syaalo syoosi.
27Omwaami w'Obunyala amalire ohuheengao,
mani abulao omuundu onyala ohumukayira.
Amalire ohukolola omuhono kwae,
mani abulao onyala ohumwaakamya.
Nasaae achia ohusihirisa Abafilisiti
28 #
2 Abat 16:20; 2 Biha 28:27. Mu mwaaka ku omutuki Ahasi yafwiiraho, bino byalaangwa biti:
29 #
Yer 47:1-7; Esek 25:15-17; Yoel 3:4-8; Amos 1:6-8; Sefa 2:4-7; Sak 9:5-7. “Eng'we Abafilisiti, mutasangaala daawe, mweesi mutasangaala,
nimuboola muti, endawusi yabahuyaanga yimalire ohufuniha,
olwohuba yi njuha yibeere, yichia ohukobolao eefubi,
haandi mu buyu lyao, muchia ohwalulwamo enjuha yibburuha.
30Mani Omwaami niye ochia ohuliisa abaandu bae bamanani muno,
haandi abali mu ngisa bahamenye mu muleembe.
Nae eng'we Abafilisiti, Omwaami yahabeete neende enjala y'amaani yitiisa
haandi abahabe nibawonereo, bosi bachia ohwiitwa.
31Muchereenjese, Eng'we abali hu biruwa; mulire, Eng'we abali mu siko;
Lehe amatiichasi kabadiire, Eng'we Abafilisiti mweesi!
Olwohuba omwoosi kuli ohuniooha nikutulira emukulu,
elyo nilyo eye ly'abasuku beeng'we omubulamo omuundu otya yeesi.”
32Mani bawamwaanda b'esyaalo esyo bahakobolemo batye?
Bahaboole bati, “Omwaami yataao Siyooni,
mani omwo nimwo mu baandu bae basaanda baheeruhire.”
©Bible Society of Kenya, 2019
©Bible Society of Uganda, 2019