Abagalatia 3
3
Amalako ka Musa, kose efukiirira
1Eng'we Abagalatia basiru! Wiina mweene owabaloka? Mweekeswa bulai bweene mani mwabona koti Yesu Kristo yafwiira hu musalabba. 2Ndaha mumboolereho sino syoong'ene: Mwanyoola Mwooyo wa Nasaae hulw'ohwooseresa bi Malako ka Musa kadaha, oba hulw'ohuwulira Emboosi Ndai mani mwayifukiirira? 3Munyala mutye ohusiruwala mutyo? Eng'we abachaakira mu maani ka Mwooyo Mwoolerefu, munyala mutye ohumaliirisira mu maani k'eng'we beene? 4Ebidinyu bi mwabitamo ebyo byoosi byali byabuhaya? Mubwadyeeri bweene sibyali ebyabuhaya! 5Nasaae obakaba Mwooyo wae, haandi ohola eby'amayia mweeng'we ahola ebyo olwohuba mwoseresa ebyo bi Malako ka Musa kadaha, oba olwohuba eng'we mwawulira mani mwafukiirira Emboosi Ndai?
6 #
Huc 15:6; Rom 4:3. Ebyakwa hu Abburahamu kuuka yeefwe; koti ebyandiiko byoolerefu biboola biti, “Abburahamu yafukiirira mu Nasaae, mani ohweema hu fukiirira yae Nasaae yamufukiirira koti omuluungifu mu moni wae.” 7#Rom 4:16. Mani mubone muti abo abali neende efukiirira nibo abeechuhulu ba Abburahamu. 8#Huc 12:3. Mani ebyandiiko byoolerefu, byabona mu moni biti Nasaae achia ohuhola Abateende babe abaluungifu mu moni wae ohubitira mu fukiirira. Mani sakira ebyandiiko byoolerefu byeekesa Abburahamu hale Emboosi Ndai yiboola yiti, “Ohubitira mu ewe, Nasaae achia ohuberesa ehabi abaandu boosi.” 9Mani sakira, abo boosi abali neende efukiirira babeereswa ehabi koti lu Abburahamu owali neende efukiirira yabeereswa ehabi.
10 #
Amal 27:26. Abo abeesika ohwooseresa bi malako ka Musa kadaha, babwaabwe. Olwohuba ebyandiiko byoolerefu biboola biti, “Oyo yeesi otoseresaanga buli siindu syandiikibwa mu sitabo sy'Amalako ka Musa, Nasaae yamubwaaba!” 11#Hab 2:4. Bulaanu simanyihaane siti, abulao omuundu yeesi onyala ohuba omuluungifu mu moni wa Nasaae hulw'ohwooseresa ebyo bi Malako ka Musa kadaha; olwohuba ebyandiiko byoolerefu biboola biti, “Omuundu wahaone niye oyo yeeng'ene ochia ohuba omuluungifu mu moni wa Nasaae ohweema hu fukiirira.” 12#Lef 18:5. Nae Amalako ka Musa haba sikeemehwa hu fukiirira. Ohutusaho koti lu byandiiko byoolerefu biboola biti, “Oyo yeesi owoseresa bi Malako ka Musa kadaha niye ochia ohuwona ohweema hu Malako keene ako.” 13#Amal 21:23. Kristo ohweehola esibwaabo hulw'efwe, yatununula ohututusa mu sibwaabo si Malako ka Musa kaleeta. Olwohuba ebyandiiko byoolerefu biboola biti, “Oyo yeesi owaanihibwa hu musaala Nasaae aba yamubwaaba.” 14Kristo yetaaho esibwaabo esyo hu habi yi Nasaae yalaka Abburahamu yinyale ohubeereswa Abateende hulwa Kristo Yesu, haandi hulw'ohufukiirira hunyale ohunyoola Mwooyo Mwoolerefu yi Nasaae yasuubisa.
Amalako neende esisuubise.
15Basyaange, njia ohwehoonyera esyohuboneraho sya buli ludaalo: abaandu babiri nibahola Endagaano, mani bayaandiika, abulao omuundu onyala ohuyihalaka oba yayimeedaho esiindu syoosi. 16Bulaanu, Nasaae yahola ebisuubise byae eyiri Abburahamu neende omwichuhulu wae. Ebyandiiko byoolerefu haba sibiboola biti “Abeechuhulu bae” nibyeekesa abaandu baandi, nae biboola biti “Omwichuhulu wae” nibyeekesa omuundu mulala yeeng'ene, oyo niye Kristo. 17#Hut 12:40. Si mboola nisyo sino endi, Nasaae yahola Endagaano neende Abburahamu mani yasuubisa ohuyoseresa. Amalako ka Musa, akeecha emyaaka emia chine neende amahumi kadatu nikibitireo, haba sikanyala humalao Endagaano yomiisibwa neende Nasaae koti esisuubise eyiri Abburahamu. 18#Rom 4:14. Olwohuba nikali mbwe esiyaanwa esyo syeema hu Malako ka Musa, mani sisiba nisisyeema hu sisuubise syae. Nae Nasaae yasiba Abburahamu ohweema hu sisuubise syae.
19Nae esifune sy'Amalako ka Musa syali siina? Amalako kemeedaho hu huhola ebibi hunyale ohumanyihana, haandi kali ak'ohubao ohwoola hu hwiicha hw'omwichuhulu wa Abburahamu owasuubisibwa. Amalako ka Musa kaleetwa neende bamalaika, omuundu naahola koti wamwaanda. 20Nae wamwaanda saadahibwa nisidiira hu muundu mulala yeeng'ene; haandi Nasaae ali mulala yeeng'ene.
Esifune sy'Amalako ka Musa.
21Nae sino syeekesa siti Amalako ka Musa kayiingania ebisuubise bya Nasaae? Haba sisinyalihana daawe! Nae mani Amalako ka Musa kaba niko akaleetera abaandu obulamu, ao buli muundu yahabeere omuluungifu mu moni wa Nasaae olwohukooseresa. 22Nae ebyandiiko byoolerefu biboola biti, Esyaalo syoosi siri mu maani k'Esibi, mani sakira esiyaanwa esyasuubiswa, syeema hu fukiirira mu Yesu Kristo mani sibeereswa abo abafukiirira.
23Nae endaalo ch'efukiirira nichali nichitoola, Amalako ka Musa katuliindaanga nihuli koti ababoye, ohwoola lu fukiirira yahamanyihane. 24Mani sakira Amalako ka Musa katuliinda ohwoola lu Kristo yeechera, hu hunyale ohuba abaluungifu mu moni wa Nasaae ohubitira mu fukiirira. 25Nae bulaanu, ohufukiirira koti lu hwamala ohwiicha, haba sihusisiiri mu butuki bw'Amalako ka Musa. 26Olwohuba ohubitira mu fukiirira, eng'we mweesi muli abaana ba Nasaae mu Yesu Kristo. 27Olwohuba eng'we mweesi mwabatiisibwa mu Kristo, mani bulaanu mwefwaala Kristo. 28Abulao engabuhana akatikaati w'Abayudaaya Abateende, akatikaati w'abawaambe neende abalehuule, akatikaati w'abasaacha neende abahasi; mweesi muli nasilala mu Kristo Yesu. 29#Rom 4:13. Koti lu muli abaandu ba Kristo, muli abeechuhulu ba Abburahamu, mani muchia ohunyoola si yasuubisabwa.
©Bible Society of Kenya, 2019
©Bible Society of Uganda, 2019