Abagalatia 4
4
1Ndi ohweekesa endi, omwaana oyo naaba n'asisiiri omuyere, haba saaba naahira omuwaambe, kata neende naaba naali niye omweene busiha; 2nae aba n'asisiiri aasi w'abaliindi neende abahoonyi ohwoola hu ludaalo luba nilwateebwao neende laatang'ene. 3Nilwo lu siri neende efwe fwesi; nihwali nihusisiiri abayere, hwali abawaambe neende emyooyo kyomu syaalo muno. 4Nae esiha nisyali nisimalire ohwoola, Nasaae yatuma Omwaana wae, owebulwa neende omuhasi, owebulwa naali aasi w'amalako ka Musa, 5#Rom 8:15-17. ohununula abo abali aasi w'amalako ka Musa, hu hunyale ohunyoola ohudoolwa hube koti abaana ba Nasaae. 6Mani olwohuba muli abaana bae, Nasaae yatuma Mwooyo w'Omwaana wae yeengire mu myooyo kyeefwe Olira ati “Laata! Laata!” 7Mani ohubitira mu Nasaae, eng'we haba simusisiiri abawaambe, nae muli abaana, mani nimuba nimuli abaana, mani muli abomusiha.
Esiindu si Paulo adahisa Abagalatia
8Hale nimwali ni mutaamanya Nasaae, mwali nimuli mu buwaambe bw'ebiindu bitaali nasaae daawe; 9nae bulaanu koti lu mumalire ohumanya Nasaae, oba awuundi Nasaae ohubamanya, munyala mutye haandi ohukobola enyuma haandi eyiri emyooyo mikata, emisabirisi eky'omusyaalo muno, nimudaha ohuba abawaambe baakyo ehabi liindi? 10Muhusaanga endaalo chiindi, neende emyoosi kiindi, neende ebiha biindi, neende emyaaka kiindi! 11Ese ndi omuti olwohuba ndi koti owabanyahaniraho endyo olwebihaya byeene.
12Basyaange, mbekweeda mube koti lu undi, olwohuba ese syesi ndamala ohweehola ohuba koti lu muli. Simwaholaho esibi syoosi daawe; 13mumanyire ebilai byeene muti ohulwaala hw'omubiri kwaange nihwo ohwakera ndaanyala ohubayaalira Emboosi Ndai olwataangira; 14nae haandi kata neende obulamu bwaange bweecha bwaaba koti esiteemo yi muli, haba simwaambisamo emoni kata ohuundekeresa daawe, nae mwanjakaanira koti abakaanira malaika wa Nasaae, haandi koti lumubukaanira Kristo Yesu. 15Siina syeene haandi esyeecha syatula mu bwiichufu bu mwali nabwo obwo? Olwohuba ese nyala ohubatusira obuloli endi, siba nisyali nisinyaliha, mwahanyalire kata ohweyiyamo emoni cheeng'we mwachiimberesa. 16Haandi hane ndeeholere ohuba omusuku weeng'we hulw'ohubaboolera obwadyeeri? 17Abaandu baandi abo bali sa ohubeniinisiryaho hulw'ebihaya byeene; bali sa ohudaha babeekalire erwaanyi, hu munyale ohubekoomba muno. 18Olwohuba siba esichiiririrwa silai nikali mbwe onyala wekoombebwa muno, nae haba sikali mbwe nimba ni ndi alala naang'we lwoong'ene. 19Eng'we baana baange basisiiri abayere, mbachuunirwa koti omuhasi olumwa lwachuunisibwa ohwoola lumwaheehole koti lu Kristo mweene lu ali. 20Ndahekoombere muno ohuba aambi naang'we, mani ndaanyala ohukaluhaniaho enomanoma yaange olwohuba mbelalihiire muno.
Esyohuboneraho sya Hagari neende Saara.
21Eng'we abekoomba ohuba aasi w'amalako ka Musa mumboolereho, haba simuli huwuliraanga bulai bi Malako kadaha? 22#Huc 16:15; Huc 21:2. Olwohuba syandiikwa siti, Abburahamu yali neende abaana basyaani babiri, mulala yi yeebula neende omuhasi muwaambe, neende owuundi yi yeebula neende omuhasi mulehuule. 23Nae kali mbwe omusyaani w'omuhasi muwaambe yebulwa ohweema hu bwekoombi bw'omubiri, nae omusyaani w'omuhasi mulehuule yebulwa ohweema hu sisuubise. 24Bulaanu huno n'ohukeraania mbwe: abahasi bano bali koti Endagaano chibiri. Ndala yohu lugulu lwa Sinai, ni yibulira abaana obuwaambe; niye Hagari. 25Bulaanu, Hagari ali Olugulu lwa Sinai mu Buwaraabbu; mani akeraanisibwa neende Yerusalemu syaleero, olwohuba ali mu buwaambe alala neende abaana bae. 26Nae Yerusalemu siri Muukuulu silehuule, haandi niye oli ng'ineefwe. 27#Yis 54:1. Olwohuba syandiikwa siti,
“Weehoye, ewe omuhasi mukuumba;
Tuunduhe mani mwehuume, eng'we abatalumwaangaho ohwiibula;
olwohuba abaana b'omuhasi walobwa bachia ohuba abaangi muno
ohuhira abaana b'omuhasi oli neende omusaacha.”
28Nae efwe, basyaange, koti sa Yisaka, huli abaana b'esisuubise. 29#Huc 21:9. Nae koti sa lu siha syeene sira, koti omusyaani webulwa ohweema hu bwekoombi bw'omubiri yaboneresaanga omwaana wali niyeebulwa ohweema hu Mwooyo wa Nasaae, mani nilwo lu siri kata neende bulaanu buti. 30#Huc 21:10. Nae ebyandiiko byoolerefu biboola bitye? Biboola biti, “Yirusa omuhasi muwaambe oyo neende omwaana wae mweene; olwohuba omusyaani w'omuhasi muwaambe oyo, haba saachia husihira alala neende omusyaani w'omuhasi mulehuule.” 31Mani sakira basyaange, efwe haba sihuli abaana b'omuhasi muwaambe, nae huli abaana b'omuhasi mulehuule.
©Bible Society of Kenya, 2019
©Bible Society of Uganda, 2019