Abagalatia 2
2
Paulo neende abatume baandi
1 #
Biho 11:30; 15:2. Mani emyaaka ehumi neende kine nikyabitao, ndakobola Yerusalemu neende Bbarinabba, alala neende Tito. 2Ndachia olwohuba ndabwiihulirwa neende Nasaae endi hoyeere ohuchia. Mani nindali ni njihaale neende abeemeresi nihuli fweeng'ene, ndabeekesa Emboosi Ndai yi ndayaaliraanga Abateende. Sindadaha omulimo kwaange kwa hale oba okwa bulaanu kube okw'ebihaya. 3Tito yi ndali nae, ayahaba niyali Omugiriki, haba si yayiikwa ohuhebwa. 4Kata katyo, abaandu baandi bali nibadaha mbwe ahebwe. Abaandu bano beebachirisa baaba koti abafukiiriri basyeefwe, mani beyiingisa mu mukaanda kweefwe nihutaamanyire ohutuhema bamanye ebidiira hu deembe li shuli nalyo mu Kristo Yesu nibadaha ohutukobosa mu buwaambe, 5Nae haba sihwafukiiriraho echaabwe kata nabudiidi hwaadaha ohubaliindira obwadyeeri bw'Emboosi Ndai. 6#Amal 10:17. Nae abo abali koti abeemeresi, ese esyo haba sisindiiraho olwohuba Nasaae abulaho abaandu b'akwiiraanga. Abeemeresi abo sibulao esiindu siyaaha sibameedaho. 7Nae babona bati Nasaae yandiisa omulimo kw'ohuyaalira Abateende Emboosi Ndai, koti lu Petero yabereswa omulimo kw'ohuyaala Emboosi Ndai eyiri Abayudaaya. 8Hulw'obunyala bwa Nasaae, ndeehola Omutume w'Abateende, koti sa lu Petero yeehola Omutume w'Abayudaaya. 9Nae Yakobbo, Petero neende Yowaana, abali koti abeemeresi baamanya omulimo kukabuhaane ku Nasaae yali yambereese, mani baatuheesa mu mahono, ese alala neende Bbarinabba, ohweekesa bati hwali esiindu silala nabo, abo abahalaabana mu Bayudaaya neende efwe abahalaabana mu Bateende. 10Ohutusaho batusaba ohwiichulisaanga abaandu baabwe bamanani, esiindu si ndali nindekoomba ohuhola muno neende omwooyo mulala.
Paulo yoolobya Petero nibali mu Atiokia
11Petero niyeecha mu Atiokia, ndamukololosa mu lwichuule, olwohuba yali omuhyamu mweene. 12Abaandu baandi abatula eyiri Yakobbo nibali nibasisiiri ohwiicha, Petero yaba naaliraanga alala neende Abateende. Nae abaandu bano niboola sa bati, Petero yekabula yahaya ohulya neende Abateende, olwohuba yali atiire abo abali nibasiiri ohuhebwa. 13Mani Abayudaaya ba yali nabo bamweyambaaniaho, beebachirisa koti abati, koti lu Petero yahola, Bbarinabba yesi yahola nasilala atyo. 14Mani nindabona endi mubwadyeeri bweene haba sibali nibaloondakana neende Emboosi Ndai, ndaboolera Petero mu lwichuule endi, “Ewe oli Omuyudaaya, nae obeere niweyira mu saambo ch'Abateende echitaali ech'Abayudaaya. Mani onyala otye ohuyiika Abateende ohweyira koti Abayudaaya?”
Abayudaaya neende Abateende baonisibwa hulw'efukiirira
15Efwe huli Abayudaaya beene mu hwiibulwa, sihuli Abateende bahola-mbi, koti lu balaangwa. 16#Sab 143:2; Rom 3:20; Rom 3:22. Nae humanyire huti omuundu aba omuluungifu mu moni wa Nasaae ohweema hu fukiirira mu Yesu Kristo, ataali ohwooseresa bi Malako ka Musa kadaha. Fwesi hwafukiirira mu Kristo Yesu, hu hweemeo hube abaluungifu mu moni wa Nasaae ohubitira muhufukiirira hweefwe mu Kristo, nae ataali ohwooseresa bi Malako ka Musa kadaha. Olwohuba abulao omuundu onyala ohuba omuluungifu mu moni wa Nasaae hulw'ohwooseresa bi Malako ka Musa kadaha. 17Nae bulaanu koti luhuteemaho ohuba abaluungifu mu moni wa Nasaae ohweema hu bulala bw'efwe neende Kristo, mani hwenyoola huti fwesi huli sa abahola-mbi koti Abateende lu bali, mani sino siba syeekesa siti Kristo ahalaabanira abahola-mbi? Sisiri sityo kata nabudiidi! 18Mani ni mba ninjaaka ohusiira ehola y'Amalako ka Musa yindasakuula, ao mba ndeeyekesa omweene koti omuundu muhalaki w'amalako. 19Nae ebidiirana neende amalako, ese ndafwa-ndetwa neende amalako keene, hu nyale ohumenya ohubao omulamu hulwa Nasaae. Ndabaambwa hu musalabba alala neende Kristo. 20Mani obulamu bu ndi nabwo, haba sibwaange-hu-bwaange, ohutusaho Kristo niye omulamu mweese. Mani obulamu bu ndi nabwo bulaanu, ndi nabwo hulw'ohufukiirira mu Omwaana wa Nasaae, owandaha mani yeyaanayo obulamu bwae hulwaange. 21Siindi hwekaana embabaasi cha Nasaae, nae abaandu nibaba abaluungifu mu moni wa Nasaae hulw'ohwooseresa ebyo bi Malako ka Musa kadaha, esyo syeekesa siti Kristo aba niyafwiira bihaya byeene sa.
©Bible Society of Kenya, 2019
©Bible Society of Uganda, 2019