Esekeeli 27

Olweembo lw'ohulira Tiiro

1Omwaami yalomaloma naange, n'aboola ati: 2“Ewe omwaana w'omuundu, yemba olweembo lw'ohulira Tiiro, 3mani oboolere Tiiro oti: Ewe Tiiro, oli yi nyaanja yichaakira, haandi ochurusaanga neende abaandu batula hu bisiinga biingi, Omwaami Nasaae aboola ati;

Ewe Tiiro, waboola oti,

‘Ndi omulai muno, mbulaho embala yoosi.’

4Enjaho chao chiri akatikaati w'enyaanja;

aboombahi bao bahunyirisa mani nooboneha bulai muno.

5Embaao choosi chi beehoonyera ohuhwoombaha,

bachitusa mu misaala kyohu lugulu lwa Herumooni.

Mu mbaao ch'emiseengese kya Lebbanooni nimwo mubahuholera emilongooti.

6Mu mituumba kya Bbasani,

nimwo mu babaacha engasi chao.

Bahwaaliramo embaao ch'emituumba chitula mu bisiinga bya Saipurasi,

chibabaachamo ameeno k'enjofu.

7Amataanga kao bakahola ohutula mu ngubo ndafu,

eyiriho elaasi ohutula Misiri.

Ako niko ebbeendera yao eyibonehera eyale.

Bahubwiihaho engubo ndai

cha bbulu neende ech'omusaambarao,

echatula mu bisiinga by'Elisa.

Abaandu bamenya Sidoni neende Arufaadi,

nibo abali nibafuka amaato kao.

8Abasaacha bamanyirifu ohutula Sidoni neende Arifadi, abali nibahumenyamo,

nibo abeerusaanga emeeri.

9Abaandu bahuluundu bomu Gebbali, neende ab'amakesi bayo bali nibahumenyamo,

nibateresaanga emeeri chao.

Emeeri chohu nyaanja choosi neende abaandu bakeendera mu meeri,

bakaluuhaniaanga eby'obuchurusi byaabwe neende ebyao.

10“Abasikaari ohutula Perisia, Ludi neende Libbya, bali mu maye kao. Bahwaanihaangamo engabo neende ekofia ch'ebichuuma, nibakera nonyoola oluyaali. 11Abasikaari ohutula Arufaadi neende Heleki nibo abaliindaanga esida syao ohusyebodoohania. Haandi abasaacha batula Gamadi, nibo ababeechaanga mu minaara kyao. Baanihaanga engabo chaabwe hu bida byao nibabyebodoohania mani nibakera nooboneha bulai muno.

12“Abaandu ba Tarusiisi bachurusaanga naawe eby'obuchurusi byao bya buli ngeri. Olwohuba wabeechaanga neende eby'engaanga biingi, bahutuungaanga efeesa, ebichuma, amabbaati neende amasasi. 13Waholera obuchurusi mu Yunaani, Tubbali, neende Meseki. Bakaluuhaniaanga abaandu bawaambe baabwe neende emigasa kyaabwe, nibahukulaho ebiindu by'obuchurusi byao. 14Abaandu ba Bbetitogarima bahukulaangaho ebiindu by'obuchurusi bwao, nibahuberesa efaraasi cha buli ludaalo, neende echo chibehoonyera mu biita, neende esuhiri njere. 15Abaandu ba Dedani nibo abaholaanga obuchurusi naawe. Haandi wabeechaanga neende esiito chao endai muno mu bisiinga biingi. Bahuleeteraanga emeeno k'enjofu, neende embaao ohwofwaang'amo ebiindu byao. 16Abaandu b'Edomu bachurusaanga naawe ebiindu biingi bi wetaniaanga. Bofwoong'aniaanga ebiindu byao neende amakina k'engaanga, engubo ch'elaasi, neende engubo ndafu, neende amakina ka koro, neende amakina ka rubbia. 17Ebuyudaaya neende esyaalo sya Yisiraeli byaholaanga naawe obuchurusi. Bofwoong'aniaanga ebiindu byao neende engaano, amafuta k'esing'aari, obuuhi bw'enjuhi, neende ebiindu biindi by'engaanga. 18Abaandu ba Damasiko, bahukulaangaho ebiindu biingi muno, olwohuba wali neende ebiindu by'engaanga biingi muno ebyabuli ngeri. Bahukulaangaho efiini yitula Helubbooni, neende obwooya bulafu bw'amakoondi. 19Abaandu ba Wusali bahukulaangaho ebiindu; bakaluuhaniaanga ebyuuma, eby'obuchurusi bilaangwa biti, kasia neende kalamuusi, bino babikaluuhaniaanga neende ebiindu bi wali noochurusa. 20Abaandu ba Dedani bachurusaanga naawe engubo ch'ohwaala hu mikoongo ky'efaraasi chibeerusa. 21Waholeraanga alala neende Abaaraabbu neende abachweenufu ba Kedari boosi, mu buchurusi bw'amakoondi madoto, emiiku neende embusi. 22Abachurusi ba Seebba neende Raama, baleetaanga ebiindu biwunya esing'aari siingi muno, neende amakina k'engaanga y'aakulu muno neende esaabbu mani nibakaluuhania neende ebiindu byao. 23Wachurusaanga neende ebiko bya Harani, Kane, Edeni, Asuuri neende Kilimadi. 24Wachurusaanga nabo mu biindu bilai muno, engubo cha papo, neende emikeeka kya bbulu, neende emikoye kyaluhwa bulai muno. 25#Hubwi 18:11-19.Emeeri hoongo muno echa Tarisiisi nicho echakiingaanga eby'obuchurusi byao.

“Mani weechula waaba koti emeeri

yibadwiihire muno akatikaati w'enyaanja.

26Abafuki b'engasi bao ni bahuleeta baahwoosa eyiri amaachi maangi,

Omuyaka kutula ebukwe kwawuucha kuhwaandya mu busiba bw'enyaanja.

27Obuyiinda bwao, eby'obuchurusi byao, abahalaabani bomu meeri bao neende abeerusi b'emeeri bao,

abahalaabani bao neende abahola eby'obuchurusi bao,

neende abasikaari bao boosi,

neende abaandu baandi boosi abamenya mweewe,

boosi beebira baahamira mu busiba bw'enyaanja hu ludaalo lw'ohusihirira olwo.

28Ohulira hw'abeerusi b'emeeri bao

hwateengeresa ebyaalo biri aambi naawe.

29“Abahubbi b'engasi boosi

neende abakeendera mu meeri bao boosi,

bamalire ohutula mu meeri mani beema hu genya.

30Bahubba embuungu

niiwe okera nibalira muno.

31Beebekereho efwiiri

nibefwaala ebigunia.

Bahulukusa amasika

nibechuule engisa.

32Bahubba embuungu

beemba olweembo lwohu masika nibeteeba bati:

‘Wiina mweene owahekeraania hu Tiiro’

Tiiro owubuleereere mu busiba bw'amaachi?

33Eby'obuchurusi byao nibyakobaanga hu lwaasi

nibitula mu nyaanja,

wamalaangao obudinyu bw'abaandu baangi muno.

Wakeraanga abatuki bohu syaalo nibaba abayiinda.

34Nae bulaanu ofunihiire mu nyaanja,

mu busiba bw'amaachi.

Eby'obuchurusi byao

neende abahalaabani bomu meeri bao boosi

beebiire mu maachi mani basihirira mu nyaanja alala naawe.

35“Buli muundu yeesi owamenya hu ndulo w'enyaanja, beesinduuhe muno ohubona ebihukwiireho. Kata abatuki baabwe bosi batiire muno, haandi beyendehereere muno. 36Abachurusi bomu byaalo bahubba omulosi nibawukaho sa. Olwohuba osihirisiirwe elalira. Weholere esitiisa hu syaalo syoosi haandi haba soocha hubaao haandi daawe.”

Currently Selected:

Esekeeli 27: SAMIA

Highlight

Copy

Compare