Esekeeli 28

Obunabbi bwoolobya omutuki wa Tiiro

1Omwaami haandi yalomaloma naange, niyamboolera ati: 2“Ewe omwaana w'omuundu, boolera omutuki wa Tiiro bi Ese Omwaami w'Obunyala, ndi ohumuboolera endi:

“Olwohuba weeniinia mu mwooyo kwao,

mani waboola oti: ‘Ndi nasaae,

haandi njihaale hu sisaala sya banasaae,

akatikaati w'enyaanja’

Nae mubwadyeeri bweene, oli omuundu sa, haba sooli nasaae daawe,

kata wahabaasa mu mwooyo kwao oti, oli nasaae.

3Obaasa oti oli omukesi ohuhira Danieli;

mani sibulao esyaama sibanyala ohuhukisa.

4Amakesi kao neende ohumanya hwao

byahoonyera obuyiinda;

weebihira esaabbu neende efeesa

mu bibiihiro byao.

5Olwohuba oli neende amakesi maangi mu by'obuchurusi,

weemeedere ohuba omuyiinda,

wehuduumbasa olw'obuyiinda bwao.

6“Mani sakira, Ese Omwaami Nasaae mboola endi:

Olwohuba omweene weeyira

ohuba neende amakesi kali koti aka nasaae,

7mani sakira, bona, njia ohutuma ebyaalo bihiramo obwaalaba

bihuseete mani bihulwaanie.

Bicha ohusobolayo embaanga chaabwe mani bisihirise ebiindu bilai bi wanyoola olw'amakesi kao

haandi banyaase oluyaali lwao.

8Bahahwiite mani baahwiisa aasi mu liina,

olifwa waaba koti abo

abeeterwa akatikaati w'enyaanja.

9Wahabe n'onyala ohuboolera abo abali ohuhwiita,

‘Ndi nasaae?’

10Mu mahono k'abo abali ohuhwiita,

wahabe omuundu sa, otaali nasaae.

Wahafwe koti embwa mu mahono k'abateende

bataamanyire Nasaae.

Ese Omwaami Nasaae, Niise olomaloome.”

Ohuwaambwa hw'omutuki wa Tiiro

11Omwaami haandi yalomaloma naange, n'aboola ati: 12“Ewe omwaana w'omuundu, siingira olirire omutuki wa Tiiro, omuboolere oti, Omwaami Nasaae aboola ati:

Wali esyohuboneraho esy'omuundu mulai muno,

niwichuule amakesi

haandi nooli omulai muno mu mboneha.

13Wali niwamenya mu Edeni, endalo ya Nasaae;

niwefwaala buli kina ly'engaanga y'aakulu muno:

rubbia neende daimoondi, karinelia, topaasi, yasipa,

kurisoliti, bberili, neende onikisi,

safire, kabbako, neende emeraadi.

Wefwaalaanga ebiindu by'esaabbu

neende ebbaangili chao choosi chali ech'esaabbu.

Ebyo byahutekeherwa hu ludaalo

lu waloongerwaho.

14Ndadoola omukerubbi ohuhuliinda;

ewe wali hu lugulu lwoolerefu lwa Nasaae;

n'okeendera akatikaati w'amakina kamesa-mesa koti omuliro.

15Ebiima byao byali ebilai

ohutula hu ludaalo lu waloongwaho,

ohwoola lu wachaakira ohwonoona.

16Ebibaaso byao wabimalira hu by'obuchurusi

mani nibihuleetera obwaalaba neende ohwonoona.

Mani sakira ndahwiirusa ohutula hu lugulu lwaange lwoolerefu.

Omukerubbi owali niyahuliinda,

nahwiirusa ohutula akatikaati w'amakina kamesa-mesa koti omuliro.

17Omwooyo kwao kwehuduumbasa olwohuba wali n'oboneha bulai;

efuma yao niyikera weyira koti omuundu musiru.

Mani sakira husukuune aasi hu loba;

mani nihuta mu moni w'abatuki baandi,

bahutingaaleho mani balabuha.

18Olwohuba ebyonoono byao biingi,

neende obuchurusi bwao butaali obuluungifu,

wachaafukya abuundu wao woolerefu

Sakira ndatubulira omuliro akatikaati wao;

okwahuhusaamba,

waweera aasi, weehola ekohe abaandu boosi nibabona.

19Abaandu bomu byaalo boosi abali nibahumanya

bawukaho sa esihukwiireho,

mani n'obatiisa, koti luosihiriiswe.

Olwohuba woolere hu njakamo mbi muno;

haba siwahabeeo haandi daawe.”

Obunabbi budiira hu Sidoni

20 # Yoel 3:4-8; Sak 9:1,2; Mat 11:21,22; Luk 10:13,14. Omwaami haandi yalomaloma naange, niyamboolera ati: 21“Ewe omwaana w'omuundu,” tingaala eyiri esiko sya Sidoni, olaangirire ebidiira hu masira kachia ohusikwaaho. 22Boolera abaandu basimenyamo oti, Omwaami Nasaae aboola ati:

“Ewe Sidoni, bona, bulaanu Ese ndi omusuku wao,

njia ohweekesa oluyaali lwaange eyiri abaandu bahumenyamo.

Mani bachia ohumanya bati Niise Omwaami.

Njia ohubaheengera omusaango, mbasaandye,

mani njekese oluyaali lwaange.

23Njia ohuhusiindihamo amalwaae,

mani amabaanga kahulukuse mu makira kao.

Abaandu badiirire olugaanga bahahuseete nibatulira hu nyaande choosi,

mani beete abaandu bao.

Ao niwo yibahamanyire bati, Niise Omwaami.”

Yisiraeli syahanyoole ehabi

24Omwaami aboola ati: “Sibulao kata silala hu byaalo by'aambi ao byoosi, ebyasaandyaanga Yisiraeli, esyahabe koti amawa kafumita oba olunani lunyaala Abaisiraeli. Ao niwo yibahamanyire bati, Niise Omwaami Nasaae.

25Omwaami Nasaae aboola ati: “Njia ohubuusa Abaisiraeli mani mbatuse mu byaalo bi basalaaniramo byoosi. Njia ohweekesera oluyaali lwaange mu moni w'ebyaalo ebyo mani ngere Abaisiraeli bamenye mu syaalo syaabwe syeene, esyo si ndaberesa Yakobbo, omuhalaabani waange. 26Bahasimenyemo nibaliindirwe bulai, boombahemo amayuumba haandi balimemo endalo ch'emisabbiibbu. Mubwadyeeri bweene, bahamenyemo nibali n'omuleembe, nae nisaandya ebyaalo bisibiraane nabo ebyabasaandyaanga. Ao niwo yibahamanyire bati, Niise Omwaami, Nasaae waabwe.”

Currently Selected:

Esekeeli 28: SAMIA

Highlight

Copy

Compare