Esekeeli 26

Obunabbi budiira hu Tiiro

1 # Yis 23:1-18; Yoel 3:4-8; Amos 1:9,10; Sak 9:1-4; Mat 11:21,22; Luk 10:13,14. Hu ludaalo lutaangira, olw'omwoosi, mu mwaaka kw'ehumi neende mulala nihuli mu buwaambe, Omwaami yalomaloma naange n'aboola ati: 2“Ewe omwaana w'omuundu, “ohweema hu koti lu Tiiro silomaloome hu Yerusalemu nisiboola siti, ‘A-haa! Yerusalemu esyali esiruwa syobuchurusi sy'ebyaalo sifunaakwe, syeehola ekuunda, mani simbereese obweyaango. Niise ochia ohukobola mu bweyaango bwasyo. Njia ohuba omuyiinda.’

3Mani sakira Omwaami Nasaae aboola ati: “Ewe Tiiro, bona, njia ohuhulwaania, haandi koti lu enyaanja yiiyire yisiingisa amafwiinda, nilwo lu syesi njia ohusiingisa ebyaalo biingi bihulwaanie. 4Ebyaalo ebyo bicha ohusihirisa ebida byao haandi bifunake eminaara chao. Byahahwaalakateho eloba mani odoong'e sa olwaanda lwoong'ene. 5Ochia ohweehola obe sa abuundu yi banaabi baaniha enjero chaabwe akatikaati w'enyaanja. Ese Omwaami Nasaae, Niise oboolere. Ebyaalo bicha ohunyaka Tiiro. 6Abaandu bali mu biko biri hu loba baheeterwe mu biita. Ao niwo yi Tiiro syahamanyire siti, Niise Omwaami.”

7Olwohuba Omwaami Nasaae aboola ati: “Bona, njia ohuleeta Nebukadineesa, omutuki wa Bbabbilooni, omutuki ahira abatuki boosi amaani, yeechie aseete Tiiro. Yahatule emukulu, yeechie neende eye hoongo muno, yeechie neende efaraasi neende ebigaari, neende abeerusi b'efaraasi. 8Abaandu bamenya mu biko biri hu loba, yahabeetere mu biita. Abasuku bahahuyabeho obuko, mani bahubuungiheho ebituuli by'eloba bahwebodohaanie. Bahahuseete nibadiirire engabo ch'amaani. 9Omutuki oyo yahafunake ebida byao niyehoonyera ebyuuma bifunaka, haandi yahakwiise aasi eminaara kyao niyehoonyera embaachi. 10Efaraasi chae chaheeyihe mu buungi, chisiingise olufu lwacho luhwebbuukeho. Amakono k'efaraasi neende ak'ebigaari bichihwehweesa, neende ak'emisiinga, kahadengaanie ebida byao nichibita mu biruwa byao, koti omuundu yahabita mu siko syasihiriswa. 11Yahaseenakire engira chao neende ebirekeyi by'efaraasi chae. Yaheetere abaandu bao mu biita. Esiiro chao ch'amaani chahakwiiswe aasi. 12Ebiindu by'obuyiinda neende eby'obuchurusi, byahanyaaswe. Bahafunake ebida byao haandi basihirisa enyuumba chao ndai. Amakina kao, neende embaao chao, neende eloba lyao bi baanyaasa, bahabisukune mu nyaanja. 13#Hubwi 18:22.Ndahaakamye amakono k'abeembi bao, haandi amakono k'obuhana haba sikahawulirihane haandi. 14Ndahahuhole obe olwaanda luhaya, lu banaabi bahaaniheho enjero chaabwe. Abulao omuundu wahahwoombaheho daawe. Olwohuba Ese Omwaami Nasaae, Niise oboolere.”

15Omwaami Nasaae aboolera Tiiro ati: Obaasa oti aboohu bisiinga nibahawulire n'obbwomwooha aasi, haandi abaandu babasiinjire nibaworootana, haba sibahakweemo oluteengo? 16#Hubwi 18:9,10.Ao mani abatuki boosi ab'ebyaalo byebodohaanie enyaanja, bahatule hu bisaala byaabwe by'obutuki, befwaalulemo amakaanju kaabwe, neende engubo chaabwe chasaatwa bulai nibakwiiremo oluteengo. Baheehale aasi mani baadoong'a nibahinakiriha buli siha, nibawukaho sa ebihukwiireho. 17Bahahulire nibaboola bati:

‘Ewe esiko syafumaanga, osihiriiswe!

Wali ow'amaani hu nyaanja,

ewe neende abaandu bahumenyamo,

nimutiisa abaandu boosi abamenya hu syaalo.

18Bulaanu ebisiinga bikwiiremo oluteengo,

hu ludaalo lwokwiirireho aasi.

Ebisiinga biri mu nyaanja bikwiiremo oluteengo

ohubona koti lu osihiriiswe.’

19Olwohuba Omwaami Nasaae aboola ati: “Nindahahuhola waaba esiko syalehwa ao sityo, weehola esiko sitalimo abaandu, nindahahubbwomooleho enyaanja, mani amaachi maangi kahubwiihaho, 20ao njia ohuhusereengesa wiihe aasi alala neende abo abeehirira emakoombe, eyiri abaandu b'endaalo hale. Njia ohuhuleha omenye mu syaalo sy'aasi, abuundu yeehola hale ekuunda, obe alala neende abafu bali emakoombe, mani abuleo omuundu ohumenyamo daawe, oba kata waabalirwaho alala neende esyaalo sy'abaandu balamu. 21#Hubwi 18:21.Njia ohuhola obe esy'ohutiisa hwaakamayo, mani ochia ohusihirisibwa elalira, kata balihukoonya batye, haba siwahabonehane ehabi liindi. Nilwo lu Omwaami Nasaae aboolere.”

Currently Selected:

Esekeeli 26: SAMIA

Highlight

Copy

Compare