Esekeeli 25

Obunabbi budiira hu Abaamooni

1 # Yer 49:1-6; Esek 21:28-32; Amos 1:13-15; Sefa 2:8-11. Omwaami yalomaloma naange, n'aboola ati: 2“Ewe omwaana w'omuundu,” tingaala eyiri Abaamooni, mani olaangirire ebidiira hu bichia ohubakwaaho. 3Boolera Abaamooni oti: Wulire bi Omwaami Nasaae aboola. Omwaami Nasaae aboola ati, koti lu mwasaangaala ohubona muti abuundu waange woolerefu anyaasirwe, haandi ohubona muti esyaalo sya Yisiraeli nisyeholere ekuunda, haandi mwaasaangaala ohubona Abayudaaya nibayirirwe mu buwaambe. 4Mani sakira njia ohuleha abaandu batula ebukwe babaambe. Bachia ohwoombaha amayeema kaabwe mu syaalo syeeng'we, bamenye mu syaalo syeeng'we. Bahalye ebyaamo bi mulimire haandi baang'wa amabeere k'ebyaayo byeeng'we. 5Njia ohuhola esiko sya Rabba sibe esidwooli sy'engamia, haandi hole ebiko by'Abaamooni bibe obwaayiro bw'ebyaayo. Ao niwo yimwahamanyire muti, Niise Omwaami.

6“Olwohuba Omwaami Nasaae aboola ati: Koti lu mwapaama amayu haandi mwaaduuma-duuma nimweehoya, mweekesa emyooyo kyeeng'we kimuli nakyo eyiri esyaalo sya Yisiraeli. 7Mani sakira, bone, njia ohubasaandya mani mbalehe mu bunyala bw'ebyaalo biindi. Njia ohubasihirisira elalira muhaye haandi ohubaaho esyaalo daawe, oba ohuba neende esyaalo syeeng'we-hu-bweeng'we. Olwo nilwo lu mwahamanyire muti, Niise Omwaami.”

Obunabbi budiira hu Moabbu

8 # Yis 15:1—16:14; 25:10-12; Yer 48:1-47; Amos 2:1-3; Sefa 2:8-11. Omwaami Nasaae aboola ati: “Olwohuba abaandu ba Moabbu baboola bati, bone, Ebuyudaaya siri sa koti ebyaalo biindi byoosi, 9mani sakira njia ohuleha ebiko bikayirira enjaho cha Moabbu biseetwe. Omwo nimwo omuli ebiko bino: Bbetiyesimooti, Bbaalimeyooni, neende Kiriataimu. 10Njia ohuleha abaandu batula ebukwe baseete Abamoabbu neende Abaamooni mani babayiingire, muhaye haandi ohuba esyaalo daawe. 11Njia ohusaandya Abamoabbu, ao niwo yibahamanyire bati, Niise Omwaami.”

Obunabbi budiira hu Edomu

12 # Yis 34:5-17; 63:1-6; Yer 49:7-22; Esek 35:1-15; Amos 1:11,12; Oba 1:1-14; Mal 1:2-5. Omwaami Nasaae aboola ati: “Abaandu b'Edomu bahola bubi muno ohwetuungira hu Bayudaaya ataali ohubakwiira esisa kata nabudiidi. 13Mani sakira, Ese Omwaami Nasaae mboola endi, njia ohusaandya Edomu, mani njite simalemo buli muundu neende buli sisolo. Njia ohuhola esyaalo sy'Edomu sibe ekuunda. Abaandu baamwo baheeterwe mu biita, ohutula Temani ohwoola Dedani. 14Njia ohwehoonyera abaandu baange Abaisiraeli ohwetuunga hu Edomu, mani bachia ohuhola hu Edomu bi ndaha ohweema hu tima lyaange neende obwaalaba bwaange. Ao niwo yi baandu b'Edomu bahamanyire ohwetuunga hwaange.” Ese Omwaami Nasaae, Niise oboolere.

Obunabbi budiira hu Filisitia

15 # Yis 14:29-31; Yer 47:1-7; Yoel 3:4-8; Amos 1:6-8; Sefa 2:4-7; Sak 9:5-7. Omwaami Nasaae aboola ati: “Olwohuba Abafilisiti betuungira hu basuku baabwe b'endaalo choosi, beekesa emyooyo ky'ohwetuunga, mani baabasihirisa nibechuule etima; 16Omwaami Nasaae aboola ati; bone, njia ohusaandya Abafilisiti abo mani mbasihirisire elalira. Njia ohusihirisira elalira Abakereti, malireyo elalira abahabe nibawonereo abali hu lwaasi lw'enyaanja. 17Njia ohubasaandya neende obwaalaba buungi, mani ndetuungire hu syaalo syaabwe. Olwo nilwo lu bahamanyire bati, Niise Omwaami, nindahetuungire hu syaalo syaabwe.”

Currently Selected:

Esekeeli 25: SAMIA

Highlight

Copy

Compare