Esekeeli 18

Obuluungifu oba obubi bwa buli muundu bweema hu biholwa byae omweene

1Omwaami haandi yalomaloma naange, yandeeba ati: 2#Yer 31:29. “Lwasiina musiikaadanga olukaado luno mu syaalo sya Yisiraeli nimuloonda-loondamo nimuboola muti: ‘Abeebusi balya emisabbiibbu kiita ameeno, nae ameeno k'abaana baabwe kaafwa’? 3Ese Omwaami Nasaae ndeechuba endi, koti lu ndi Nasaae mulamu, olukaado luno simuchia ohulwehoonyeraho haandi mu Yisiraeli. 4Bone, niise otuka obulamu bwa buli muundu; obulamu bw'omwiibusi neende obulamu bw'omwaana bwoosi bwaange. Oyo onaholaanga esyonoono, niye onafwichaanga.

5“Omuundu n'aba naali omuluungifu, aloondakana neende obwadyeeri haandi yaahola ebilai. 6Haba saaliira hu ngulu ebyohulya bi bayaaniire ebiloongaloongwe oba Yeenamira ebiloongaloongwe bi Abaisiraeli beenamira. Haba saakwa hu muhasi w'owaasye, oba yaakona neende omuhasi oli mu mwoosi. 7Haba safwiinyirira omuundu yeesi, nae akobosera omweeyoli esiindu sy'aaba n'amweyosereho. Haba simuliichaki daawe. Aberesa ebyohulya abo ababula nabyo, neende abo ababula esy'ohwefwaala, ababeresa ebyefwaalo. 8Haba siyeosa eseende naali neende esifune syohunyoolamo engaanga oba ohweehola omuyiinda daawe. Haba saafukiirira ohwonoona haandi naakaya abaandu, abaheengera emisaango ataali ohwehubbira daawe. 9#Lef 18:5.Omuundu oyo adiira amalako kaange haandi yooseresa bulai bi mulagira. Omuundu oyo muluungifu niye, haandi achia ohuba omulamu.” Nilwo lu Omwaami Nasaae aboola.

10“Nae omuundu oyo niyeebula omwaana, mani omwaana wae yaaba omunyaka haandi omutemo, 11haandi natooseresa bi ahoyere ohuhola, ohutusaho aliira hu ngulu ebyohulya bi bayaaniire ebiloongaloongwe, oba yaakwa hu muhasi w'owaasye. 12Muliichaki haandi afwiinyirira abamanani neende abo abali mu budahano. Haba sakoboseraanga omuundu omwewolereho esiindu syaaba namusereho. Yeenamira ebiloongaloongwe haandi yaahola eby'emisiro. 13Niyeosa eseende, aba neende esifune sy'ohunyoola engaanga neende ohweehola omuyiinda. Mani omuundu oyo ahoyere ohuba omulamu? Haba daawe, saacha huba omulamu. Aholere eby'omusiro ebyo byoosi, mubwadyeeri bweene achia ohufwa, olwohuba omweene niye oweleteere ohufwa ohwo.

14“Nae omuundu w'engeri yino niyeebula omwaana, mani omwaana oyo yabona ebyonoono bi laatang'ene ahola, mani yaatya, yaahaya ohuloondakana neende ebiholwa bya laatang'ene, 15otaliiranga hu ngulu ebyohulya bi bayaaniire ebiloongaloongwe, oba yeenamira ebiloongaloongwe bi Baisiraeli beenamira. Haandi haba sakwiichanga hu muhasi w'owaasye, 16oba yeehola omuliichaki. Nae akabanaanga ebyohulya byae neende abo ba enjala yiluma haandi afwaasa abo ababula esy'ohwefwaala. 17Mani niyebwaaba ohuhola obubi hu bamanani, haandi n'atafukiirira ohweosa eseende naali n'esichiririrwa sy'ohunyoola engaanga neende ohuba omuyiinda. Yadiira amalako kaange haandi naahola koti lu mulagira. Oyo haba saacha hufwa hulw'ebyonoono bya laatang'ene, nae mubwadyeeri bweene, achia ohuba omulamu. 18Nae laatang'ene, olwohuba yeeyira bubi, haandi yaanyaka abaandu baasye, haandi yaahola ebyo ebitaali ebilai mu baasye, bone, achia ohufwa hulw'ebyonoono byae.

19“Nae mweteeba muti, ‘Lwasiina Omwaana haba siyoolobwa hulw'ebyonoono bya laatang'ene?’ Omwaana n'ahola ebyadyeeri haandi ebilai bi ahoyeere ohuhola, yaadiira amalako kaange koosi haandi yaakoseresa, omwaana oyo mubwadyeeri bweene achia ohuba omulamu. 20#Amal 24:16.Omuundu yonoona niye olifwa. Omwaana haba saachia husaanda hulw'ebyonoono bya laatang'ene, noomba omwibusi yaasaanda hulw'ebyonoono by'omwaana wae. Omuudnu muluungifu ananyooleenge omukabo ohweema hu buluungifu bwae. Haandi omuhola-mbi, yesi ananyooleenge omukabo ohweema hu bibi byae.

21“Nae omuundu mubi, n'akaluuhana mani yaalehana neende ebyonoono byoosi bi yahola, mani n'adiira amalako kaange koosi haandi yaahola ebyadyeeri neende ebilai, mubwadyeeri bweene, achia ohuba omulamu, haba saacha hufwa daawe. 22Ebyonoono byae byoosi bi yahola bichia ohumuleherwamo, mani abe omulamu; hulw'ebiholwa biluungifu byaaba n'aholere, aba achia ohuba omulamu. 23Mubaasa muti, saangaliraanga ohufwa hw'omuundu mubi? Haba daawe, nae ndaha yeyolobye mani abe omulamu. Nilwo lu Omwaami Nasaae aboola.

24“Nae omuundu muluungifu, n'alehana neende obuluungifu bwae, mani yaahola ebiindu nasilala koti bi muundu mubi ahola, mubaasa muti aba anaba omulamu? Haba daawe, sibulao esilai kata silala hu biholwa bi yahola esiba nisichia ohwiichuliswa daawe. Aba achia ohufwa olwohuba yahaya ohuba omweesikwa haandi neende hulw'ebyonoono bi yahola.

25“Nae eng'we muboola muti: ‘Esiindu si Omwaami ahola haba si syadyeeri.’ Wulire eng'we Abaisiraeli. Mubaasa muti Ese esiindu si ndi ohuhola haba si syadyeeri? Mubaasa muti ebiindu bi muhola nibyo ebyadyeeri? 26Omuundu muluungifu n'akaluuhana mani yaleha obuluungifu bwae, yaahola ebyonoono, achia ohufwa hulw'ebyonoono ebyo. Achia ohufwa ohweema hu bibi bi yahola. 27Haandi omuundu mubi, n'akaluuhana mani yaaleha obubi bwae, yaahola ebiindu biluungifu haandi ebilai, aba aliwonia obulamu bwae. 28Olwohuba omweene yabona bi yali naahola mani yakaluuhana ohutula hu bubi bu yali n'aholere, mubwadyeeri bweene, achia ohuba omulamu, haba saachia hufwa. 29Nae eng'we Abaisiraeli muboola muti, ‘Esiindu si Omwaami ahola haba si syadyeeri.’ Eng'we Abaisiraeli, mubaasa muti bi hola haba si byadyeeri? Mubaasa muti ebiindu bi muhola nibyo ebyadyeeri?” 30“Mani sakira njia ohuheengera buli muundu omusaango ohweema hu biholwa byae omweene. Nilwo lu Omwaami Nasaae aboola. Mweyolobye mutule mu byonoono byeeng'we byoosi, ataali ao, ebyonoono byeeng'we bichia ohubasihirisa. 31Mweetuseho ebyonoono byeeng'we byoosi bi mwahola, munyoole ebibaaso biyaaha neende omwooyo muyaaha. Eng'we Abaisiraeli, lwasiina mwedahisa ohufwa? 32Olwohuba Ese haba sisaangalira mu hufwa hw'omuundu kata mulala. Mukaluuhane mutule mu byonoono byeeng'we, mani mube abalamu. Nilwo lu Omwaami Nasaae aboola.”

Currently Selected:

Esekeeli 18: SAMIA

Highlight

Copy

Compare