Esekeeli 19
19
Olweembo lw'engisa
1Omwaami yamboolera ati: “Bulaanu chaaka ohulirira abachweenufu ba Yisiraeli:
2Obaboolere oti, ‘Makoo yali edalang'i ehasi ey'amaani.
Yahusira abaana bae akatikaati w'edalang'i saacha enjalaba.’
3Yahusa mulala hu baana bae yaaba edalang'i ndaaga, yayeekesa ohuyiima;
mani niyichaaka ohulya abaandu.
4Ebyaalo nibimuhubbira embuungu;
nibamuwaambiisye mu buko bwaabwe;
baamuhweesa neende amalobo
nibamuyira mu syaalo sy'e Misiri.
5Ng'ina n'aliinda ohwoola lu yabona ati esuubi libulao.
Yahusa omwaana wae wuundi,
yahula niyehola edalang'i njalaba.
6Nae niyahula yaangala,
yahuumbira mu dalang'i chaasye.
Yesi yeeka ohuyiima alala neende ohulya abaandu.
7Yafunaka-funaka enyuumba chaabwe,
niyisihirisa ebiko byaabwe.
Esyaalo syoosi neende abaandu bamwo boosi batichaanga
n'abawuliraanga nabuluula.
8Ebyaalo byebuusa alala ohumulwaania;
abaandu nibeecha ohutula mu buli mbeka.
Bayiteka neende omuteego;
mani niyikwa mu buko bwaabwe niyidiirwa.
9Bayihweesa neende amalobo nibayiikalira mu sikaali,
bayiyirira omutuki w'e Bbabbilooni.
Mani nibamuliindira mu buwaambe,
ohubuluula hwayo huhaye ohuwulirihana haandi
muungulu cha Yisiraeli.
10“Mao yali koti omusabbiibbu kwataakwa mu ndalo
aambi neende amaachi.
Olwohuba kwali aambi neende amaachi,
kwahula kweechulaho amasaafu neende ebyaamo.
11Amasaga kakwo moomu,
babaachamo emikwaajo ky'abatuki.
Omusabbiibbu kwahula kwaleeya ohwoola hu bireesi;
buli muundu amasaafu kakwo maangi neende obuleeyi bwakwo.
12Nae abasuku baakwo nibakwiiya, nibakung'uluula neende emisi kyakwo
mani nikukwa aasi.
Omuyaka kutula ebukwe kweecha kwoomya ebyaamo byakwo.
Amasaga kaakwo nikafunakwaho;
nikooma mani nikasaambwa omuliro.
13Bulaanu omusabbiibbu okwo kutaakirwa haandi mu siparara,
mu syaalo syomu haandi esibulamo amaachi.
14Omuliro kutulire hu sisina syakwo;
mani nikusaamba amasaga kakwo neende ebyaamo byakwo.
Amasaga kakwo haba sikasisiiri amoomu,
sikacha hubaachwamo emikwaajo ky'abatuki.
Luno nilwo olweembo lw'engisa; balweembere nibaluloonda-loondamo.”
Currently Selected:
Esekeeli 19: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
