Omuyaali 11
11
Bi muundu mukesi ahola
1Bechaanga omuwaani, wanyeenge ebyohulya byao hu maachi,
olwohuba endaalo nyiingi nichibitireo, wahanyoole engaanga.
2Hu biindu byao, kabiraangaho abaandu baangi, kataanu-na-babiri oba bataanu-na-badatu,
olwohuba haba s'omanyire esibi siina esinyala ohuhukwaaho hu syaalo.
3Ebireesi nibiichula,
ao ni ebyeene biweera hu syaalo koti efula.
Omusaala nikukwiira olwaande lw'emwaalo oba olw'emukulu,
abuundu yi kukwiire niwo yi kukona.
4Oyo oliinda omuyaka neende ebiha bimale ohuba ebilai, haba siyahataake daawe;
haandi oyo odeeba hu bireesi, haba siyahakese daawe.
5Koti lu otanyala ohumanya engeri yi bulamu buchaakiramo mu nda y'omuhasi oli aasito, olwo lwosi lu otanyala ohumanya ebyo byoosi bi Nasaae ahola.
6Yanyaanga emwo yao echuli, haandi neende engoloobe yosi. Olwohuba haba s'omanyire oba y'owaanyire echuli oba engoloobe, eyiriina eyinaahule bulai, oba choombi chinaabe endai mu ngeri nasilala.
7Obulafu bulai nibwo, haandi omuundu ohuba elyuuba, likera yasangaala.
8Omuundu n'ayiindira emyaaka miingi, leha akisangaaliremo choosi, nae leha yechulise ati endaalo ch'esiirima chi yahabeemo n'amalire ohufwa chahabe enyiingi. Ebyo byoosi ebyaheeche, bihaya byeene.
Ohukerakira abaraaga
9Ewe omuraaga, sangaaliranga mu buraaga bwao, haandi leha weheerenge n'osisiiri omuraaga. Haandi loondakanaanga neende bi mwooyo kwae kwekoomba. Nae manyaanga oti Nasaae achia ohuheengera omusaango hulw'ebiindu ebyo byoosi.
10Mani wetuseengeho ebyo ebikera niweelalihira mu mwooyo, neende ebihuleetera obuchuuni mu mubiri; olwohuba oburaaga neende obuyere, bihaya byeene.
©Bible Society of Kenya, 2019
©Bible Society of Uganda, 2019