Omuyaali 12
12
1Mani yichuliseenge Omuloongi wao n'osisiiri omuraaga, endaalo ndinyu nikisisiiri ohwoola, neende emyaaka nichisisiiri ohwoola ky'olibooleramo oti, “Haba sisiisyehoyera obulamu.” 2Ebiha ebyo nibyahoole, ao wahabone oti elyuuba, n'obulafu, n'omwoosi, neende eng'ining'ini, byeholere esiirima haandi ebireesi-reesi bikobooleo efula niyamalire ohukwa. 3Ao mani amahono kao akabeere nikahuwaabina kahahinaakirihe, haandi amakulu kao akalimo amaani bulaanu, kaheebokoye. Ameeno kao kahabboongohe mani kadoong'amo amadiidi, haandi nikatanyala ohunyaanya ebyohulya. Emoni chao chahabe nichibona amabulyeesi. 4Amatwi kao kahabe nikatanyala ohuwulira abo abayokerera hu ngira, kata neende ohuwulira olukina nilusya, oba amakono k'abaandu nibeemba, nae eyoni lyeemba lyahahusiingise mu ndoolo. Mani enyembo ndai choosi chahabe nichiduduuye. 5Ao mani olichaaka ohutya ohuniina ebiniino, haandi byahahudinyire ohukeenda. Omutwe kwao kwahabe nikwiichuulemo embuchi, haandi wahawulireenge oti amakulu kao kahusidoyeere ohukiinga, mani wehwehweesa-bwehwehweesa. Wahabe n'otaali neende esiindu si wekoomba ohulya. Ao mani omuundu naachia mu siwuluuhiro syae esy'endaalo choosi pe, haandi engira nichileeta abalisi. 6Omukoye kw'efeesa kwahabe nikuhaliihe, oba etaara ly'esaabbu lyahabe nilikwiire aasi mani nilyadiihe. Haandi omukoye kuhweesa amaachi mu sisima kwahabe nikuhaliihe, haandi esyoongo niyaadihe-yadiihemo. 7Ao omubiri kwahakobole mu loba mukwatula, nae omwooyo nikukobola eyiri Nasaae owakutuberesa. 8Omweekesa aboola ati, byoosi bihaya byeene.
Efuundihira
9Omweekesa yali omuundu w'amakesi, haandi yemeeda ohweekesa abaandu ebyo bi yali n'amanyire. Yatekeeresaanga mani n'awulira nibakaada engaado, n'achehaliirisa bulai muno, n'atereesa engaado nyiingi muno. 10Omweekesa yateemaho muno ohwandiika emboosi chisangaasa, haandi mu buluungifu, yandiika emboosi chadyeeri. 11Emboosi ch'omuundu mukesi chiri koti endawusi njoki yi mwaayi yehoonyera ohwirusira ebyaayo byae. Emboosi echo, omwaayi ochikaba ali mulala, haandi nichibuuswa alala, chiri koti emisumaari chihomerwe bulai. 12Mwaana waange, siluwo esiindu siindi sy'oli neende ohwehaliirisa bulai. Ohwandiika ebitabo haba sihuwa daawe, haandi ohusoma hubitiirifu hujoongi'a omubiri.
13Emboosi chaange chakaame ao, haandi choosi chiwuliirwe. Wisaanga mu Nasaae oluyaali, haandi oliindaanga amalako kae. Olwohuba sino nisyo si buli muundu ahoyere ohuhola. 14Olwohuba Nasaae yahaheengere buli muundu omusaango kwa buli siindu si huhola, omuli buli siindu siholwa mu bweekisi, kata sibe esilai oba esibi.
©Bible Society of Kenya, 2019
©Bible Society of Uganda, 2019