Omuyaali 10
10
1Esiiye chifwiire nichiba mu chupa y'amafuta k'esing'aari, chikawunyisa esifuundu;
mu ngeri nasilala, esy'obusiru sidiidi, simalao amakesi maangi haandi neende oluyaali.
2Sya buli ludaalo omuundu mukesi ohuhola ebiluungifu,
nae omusiru ahola ebihyaamu.
3Kata omusiru n'akeenda hu ngira, haba sadeebaangayo daawe,
nae yeyekesaanga eyiri buli muundu koti lu ali omusiru.
4Omuundu ohutuka n'ahuholereraanga, otalehuliraanga abuundu wao,
olwohuba ohwefunaka hukera waleherwamo ebyonoono bihoongo.
5Waliwo esibi simbweene hu syaalo, nisyo obudoondobanu bu abatuki bahola. 6Baberesa abaandu basiru mu bunyala bw'aakulu ebihoyerwa abaandu bakesi, nae abaandu bakesi babereswa ebifwo by'aasi ebihoyerwa abaandu basiru. 7Ndabona abakulwa nibeeruhira hu faraasi, nae abachweenufu nibakeesa amakulu koti abawaambe.
8 #
Sab 7:15; Eng 26:27. Oyo olima obuko anyala ohubukwaamo omweene;
haandi oyo olikula esida sikofu, endemo yinyala ohumuluma.
9Oyo owaata amakina, kanyala ohumunyaala;
haandi neende oyo owasyaaka eehwi, chinyala ohumukwiisaho esidinyu.
10Esyuuma nisiwaaho obwooki mani wahaya ohusyaakala,
sidaha amaani maangi ohusyehoonyera;
nae amakesi kakera omuundu yayiingira bwaangu.
11Enjuha niyiluma oyo oloka n'asisiiri ohuloka,
buba bubulao obuhoonyi bw'omulosi.
12Emboosi chi muundu mukesi alomaloma chimuberesa oluyaali,
nae bi musiru by'alomaloma bimusihirisa.
13Muhuchaaka, emboosi chae chiba ech'obusiru,
nae enjakamo y'enomanoma yae y'esifwaabi.
14Omuundu musiru yeengiya emboosi.
Abulao omanyire ebichia ohubaao,
haandi abulao onyala ohutuboolera ebichia hukwaao nihumalire ohufwa.
15Ebiindu bi musiru ahola bimujoong'a bwaangu muno,
mani yahaya ohumanya engira yohubitaho naachia mu siko.
16Chiba chakaanire esyaalo, omutuki wasyo naaba omwaana muyere,
haandi abachweenufu basyo nibawuuna echuli-chuli muno mu bidyaalo.
17Esyaalo esyo sy'ehabi muno, omutuki wasyo naaba omwimirisi mulai,
haandi bachweenufu basyo bahola ebidyaalo mu biha bihoyera,
abeene abeetuka haandi ataali ohumeera-bumeera.
18Omuundu mukata, olwohuba haba s'adaha huhalaabana sikera esirama enyuumba yae nisiibira,
haandi ohuba ao n'otahola esiindu sikera enyuumba niyitoonya.
19Ebidyaalo bibaao hulw'ohwesangaasa,
haandi amalwa kasangaasa obulamu,
nae esituka byoosi nicho eseende.
20Otalomalomaanga bubi hu mutuki kata ayahaba mu bweekisi,
haandi otalomalomaanga bubi hu muyiinda kata ayahaba mu siseenge sy'okonamo;
olwohuba amayoni kabburuha mu bbanga kanyala ohumuyirira emboosi chao,
mani byaamuboolere ebyo bi oboolere.
©Bible Society of Kenya, 2019
©Bible Society of Uganda, 2019